Hiwwe wie Driwwe

In Cooperation with Genealog.de

FAQ
Hiwwe wie Driwwe
Archive
Links
Forum
Webclass
PG Wikipedia
Gallery
Email

This page is powered by Blogger. Isn't yours?

UNESCO Archives Portal

Kutztown Festival


DPAK Webring

<<

#

>>


Copyright 2002-2005
Dr. Michael Werner
3.1.07
'S KATZ DEITSCH SCHTICK



Neiyaahrswinsch


'S iss guud zu saage zu de Leit,
Ich winsch eich all en guudi Zeit
Im neie Yaahr, wu heit erschteht,
Un hoff, 's watt niemand so verleed,
Dass er vergesst zu danke Gott
Fer des, was Er uns gewwe hot;
Fer G'sundheit, Weisheit un Verschtand,
Fer all die Frichte vun dem Land,
Fer Regge, Sunneschein un Hitz,
Uns net gedroffe mit dem Blitz,
So viel gesegnet mit G'sundheit,
Un uns behiedet gege Schtreit.
Mer danke all dem Gott recht schee,
Un winsche, 's mecht uns immer so geh.
Mer danke aa de guude Leit,
Es hot sehr viel zu dere Zeit,
Die ihre Haend alsmol uffmache
Un gewwe aarme Leit viel Sache
Zu esse, drinke, un aa Gleeder,
Un Holz un Kohle fer kalt Wedder;
Un dass sie denke, dass en yeder
Immer hot so en guuder Pedder.
Ich winsch, dass guude Leit lang lewe,
Un dass sie immer reichlich gewwe
Zu dene, die es wohl aawende,
Un es net unneedich verschwende,
Zum Lewe g'heert aa Schpaarsamkeit,
Sowohl ass wie Wohldeedichkeit.
Ich winsch de Buwe un de Meed
Viel Glick un aa all recht viel Freed;
Un dass sie schaffe un recht schpaare,
Dann kenne sie aa alsmol fahre,
Debei sich richte fer zu heire
Un net alleenich immer leire.
Deel wisse oft net, was sie wolle -
So Dummkepp soll der Beddel hole,
Wu schaffe hatt un schpaare Geld,
Un kenn Familie in der Welt.
Des hawwich eich nau all gewinscht,
Un hoff, ihr hett all viel Verdienscht,
Un dass ihr schafft mit neiem Mut,
Dass es eich all recht freehe duht,
Dass mir des neie Yaahr aadreete,
Un dass mer all duhn danke un beete
Fer des, was mir darich's ganz Yaahr geniesse,
Un dass mir Gott niemols verdriesse.

Frank R. Brunner (1835-1908)



Beitrag erstellt 15:01 |
Link

23.12.06

2.12.06
'S KATZ DEITSCH SCHTICK

En Beemg'schicht fer Grischtdaag


Des iss en Schtorie, ass die Gremmem un der Grampap, wu die deitsch Mudderschprooch noch schwetze kenne, lese kennte zu die Kinner un Kinnskinner am Grischtdaag:
Mol ee Zeit waare drei Beem im Busch. Sie waare ihre Hoffe un Draame am iwwerschwetze, wie der erscht Baam g’schwetzt un g’saat hot: “Mol ee Daag, hoff ich, ass ich en Schatzkischt bin. Ich kennt g’fillt sei mit Gold, Silwer un wunnerswert Edelschtee. Ich kennt verleicht g’henkt warre mit feischtenglich ausg’schnitzelt Dinger, un alliebber deet die Scheeheet devun sehne.” No hot der zwett Baam g’saat: “Mol ee Daag bin ich en grefticher Schiff. Ich will en Keenich un en Keenichin iwwer’s Wasser nemme zu die Ecke vun die Welt segle. Alliebber will sicher fiehle in mich, dieweil ass mei Rump so grooss un schtarick iss. Endlich hot der dritt Bamm g’saat: “Ich will uffwaxe fer der heechest un schtrackst Baam im Busch sei. Die Leit sette mich sehne uff’em Gippel vum Barick un duhn nuff an mei Nescht gucke un denke vum Himmel un vum Gott, un wie neegscht, ass ich zu sie am reeche bin. Ich will der groossaardischt Baam vun all Zeit sei, so ass die Leit mich immerfatt meinde welle.”
Naach en paar Yaahre vun Bete, ass ihre Draame wahr kumme deete, sinn en Drupp Buschmenner zu die Beem kumme.
Wie eener zu der erscht Baam kumme iss, hot er g’saat: “Des guckt wie en krefticher Baam. Ich denk, ass ich ‘s Holz guud verkaafe kann zu en Schreiner.” Un er hot aag’fange, der Baam nunnerschneide.
Der erscht Baam waar hallich, weil er gewisst hot, ass der Schreiner ihn in en Schatzkischt mache deet mol ee Daag. Am zwette Baam hot en Buschmann g’saat: “Des guckt wie en schtracker Baam. Ich sett kenne ihn verkaafe zu en Schiffhof. Der zwett Baam waar aa hallich, weil er gewisst hot, ass er uff’em Weg waar fer en mechticher Schiff zu bekumme. Wie die Buschmenner zu der dritt Baam kumme sinn, waar er vergelschtert, ass sie ihn nunnerschneide deete, eb sei Draam wahr kummt deet. Eens vun die Buschmenner hot g’saat: “Ich brauch nix Abbadiches vun mei Baam”, un hot ihn aa nunnerg’schnidde.
Nau, wie der erscht Baam zu der Schreiner kumme iss, henn sie ihm in en Fuderdroog gemacht fer die Gediere. Er waar in die Scheier g’schtellt un g’fillt mit Hoi. Es iss net, was er gebet hot defor.
Der zwett Baam waar uffg’schnidde un zu en Fischboot gemacht. Sei Draame vun en mechticher Schiff bekumme, mit Keenich un Keenichin draage, iss schnell zu en End kumme.
Der dritt Baam waar am End aa uffg’schnidde in groosse Schticker, un alle gelosst im Dunkel. Yaahre un Yaahre sinn verbei gange, un die Beem henn vun ihre Draame vergesse.
No, mol ee Daag, sinn en Mann un en Weibsmensch zu die Scheier kumme. Datt hot des Weibsmensch en Kind gebore, un sie henn‘s Kind uff’s Hoi g’legt im Fuderdroog, ass gemacht waar vum erschte Baam. Der Mann hot gewinscht, ass er en Kribb g’hatt hett fer’s Kind, awwer der Fuderdroog waar guud genunk. Der Baam hot en Bedeiting g’fiehlt vun des Ding, un ass der Fuderdroog ‘s greescht un bescht Schatzkischt vun all Zeit hewe deet.
Yaahre schpeeter sinn en Drupp Mannsleit in en Fischboot gange, ass gemacht waar vum zwette Baam. Der eent Mann waar mied un iss noht schlofe gange.
Weil sie aus uff’em Wasser waare, iss en grosser Schtarem uffkumme, un der Baam hot gedenkt, er waer verleicht net schtarick genunk fer die Menner im Schiff sicher halde.
Die Mannsleit im Schiff henn der Mann wacker gemacht, un wie er uffg’schtanne iss, hot er “Friede” g’saat, un der Schtarem hot sich bumms abg’schtoppt. An seller Zeit hot der Baam gewisst, ass er der Keenich vun alle Keeniche in seim Schiff am draage waar. Zum lengschte End iss ebber kumme, aa noch der dritt Baam gricke.
Er waar yuscht en bissel g’schnitzelt, un no darich die Schtrosse gedraage, weil die Leit der Mann, ass ihn am draage waar, aardlich guud ausg’schpott henn. Wie sie abg’schtoppt henn, henn sie der Mann zu der Baam genaggelt un in die Luft uffgericht zu schtarewe am Gippel vum Barick.
Wie der Sunndaag kumme iss, hot der Baam ausgemacht, ass er schtarick genunk waar fer uff’em Barick schteh, un ass neegscht zu sei zum Gott, ass ‘s meeglich waar, weil Yesus uff ihn gegreizicht waar.
Der Moral vun dem G’schicht iss, wann Dinger net immer dich basse, kannscht immer wisse, ass unser Gott en Blaan hot fer dich.
Wann du dei Draues in ihm duhscht, gebt er dir groossaardiche G’schenke. Allieener vun die drei Beem henn, was sie henn wolle, grickt - yuscht net in der Weg, ass sie sich’s selwer eigebildt henn.
Mer wisse net immer, was’em Gott sei Blaane sinn fer uns. Mir wisse yuscht, ass sei Wege net unser Wege sinn - awwer sei Wege sinn immer ‘s bescht.

Leonard E. Shupp

Beitrag erstellt 22:04 |
Link

31.10.06

1.10.06

2.9.06

2.8.06

2.7.06
'S KATZ DEITSCH SCHTICK

Dihr liewe Leit,

hen dihr schun gwisst, as die Leit, as die pennsylvaanisch-deitsch Encyclopedia uff em Heemetblatt "pdc.wikipedia.org" zammegricke, am gucke sin fer deitsche Blatznaame in Pennsylvaani un ariyets schunscht. Guckt yuscht mol rei un helft mit. Alliebber is eiglaade fer die Naame, as er weess, datt selwert neischreiwe.

Heit will ich en Schtori publishe, as mir der Ed Quinter aus Pennsylvaani yuscht geschter gschickt hot mit en E-Poscht. 'S is ganz wunnerbaar. Mer kennt sell verleicht heesse:

Uff Bsuch bei die Groosseldre

Ich glaab, mir alle, wennigschtens die Leit, wu so um 55 oder meh Yaahr alt sin, misse zugewwe, as mir efters an die vergangni Zeite draame. Ich weess sicher, as ich eens von selle bin. 'S is en guder Zeitverbrauch, weil die Erinnringe sin ebbes, was es Lewe siess macht. Un mir alle breiche scheene Bilder un Gfiehle, as dezu verbunne sin, die Sarige vun heit zu iwwerkumme. Ich denk, mir sette uns devun gewiss nett schemme. Es drickt uns aa, an die Deemiedichkeet zu denke. Die sinn aa wichtich as en Deel vun uns Pennsylfaanisch-Deitsche.
Wie ich en gleener Springer waar, meind ich noch gut, hawwich viel Zeit mit meine Grosseldere verbracht. Sie hen gaar net weit vun uns gwuhnt, un ich hab allee zu ihne zu Fiess gehe kenne. Awwer fer en Sexyahriger waar sell en grosses Abendeier, allee zu laafe. Ich waar eens vun die yingere Kinskinner, un die Grammy un der Pappy waare schun alt. Der Grunn defier waar, as mei Mudder selwert die zwettyingscht vun acht Kinner waar.
Mei Schteddel waar en gleener Taun wie en latt annere im Lechaadaal in den fimfziger Yaahre. Un wie ich uffgwaxe bin, waare alle Leit so meh oder wennicher naemlich. Es hot wennich reiche und aa net viel aareme Leit gewwe. Datt waar aa fer uns Kinner en sichrer Blatz. Alle henn enanner gekennt.
Ich hab aarig viel Zeit mit denne Grosseldere verbrocht, weil mir henn aa vier Kinner in meine Familiye ghatt, un mei Eldere henn schaffe misse. Mei Daadi waar nach em Weltgrieg viele Yaahre bei der Riggelbahn, un die Memm hot gschafft bei der Gleedermiehl un aa bei 'me Dockder as Secretary.
Mei Grossmemm waar die Alice Helena Flick Yoder Frey. Sie hot selwert en hattes Lewe ghatt. Sie waar leddicheweis gebore. Uff ihr Daufschein sinn „diesen beiden Ehegatten“ ausgestriche warre, un „diesen gezeichneten“ eigschriwwe. Ihre Mudder waar Hausmaad un hot sich mit em Suh vum Haus befreindet. Die zwee henn net gheiert, awwer die Alice hot ihr nadierlicher Vadder efters gsehne un hot sogar sei Naame "Yoder" gedraage. Dem Mann sei Eldere henn en Schtor in Bethlehem gfiehrt. Die Alice ihr Mudder hot net lang denooch gheiert, un mit ihrem neie Ehemann hot sie drei annere Dechder zur Welt gebrocht. Mei Grossmemm ihre Mudder hot Mary Flick gheesse un is aus Moore Taunschip in Naddhampton Kaunti gschtammt. Ihre Voreldere hen frieh datt gsiedelt un sin spooter naach Bath gezoge.
Die Alice hot ihr Kinner zur Welt gebrocht vor un naach em erschte Weltgrieg. Sie sinn in die Depressionyaahre uffgwaxe. Sell hot gewiss en grosse Eedruck uff sie gmacht, ebbes as sie en lewelang wegdevun gnumme henn. Sie henn gelannt selbschtennig zu sei, hatt zu schaffe un annere Leit zu helfe. Die ganz Familiye waar sehr spaarsam, kenner zu hochmiedich. Die Alice waar en begabti Naehern un hot all die Kinner ihre Gleeder gemacht. Maag aa sei, sie hen ken Geld dafier gehatt, ihr eegne zu kaafe. Die Leit in der Nochbaarschaft waare allfatt am schtaune, wie sie aus neegscht nix die Mentel, Hemde un Rucke hot erschaffe kenne.
Die Alice ihr Mann waar der Elmo Frey. Er waar en Boss bei dem Zementmiehl. Sell waar en guter Tschabb, awwer acht gleene Meiler im Haus zu fiedere waar aa ken gleeni Arewet. Sie henn ihr Gaarde ghatt. Ich meind noch gut, wie sie selwert Pasching, Chow-Chow, geele Buhne un annere Sache eigemacht hot. Alles hot sie zuerscht uff em Offe sauwer mache misse - die Masongleeser mit dene Gammringe un die Deckli. Alles hot sie noht so addentlich uff Schafde in den feichte, dunkle, und staubige Keller uffgstellt. Ihr Rhubarber-, Rosine-, Siesskasche-, unn Schnitzboie hot sie aa datt in en Henklaade uffbewahrt. Der Draahtkaschde waar fer die Micke wegzuhalte. Es hot en Dier devor ghatt, mit em Latch. Driwwer waar als Stickli Duch. Awwer es allerbescht, was ich gesse hab, waare ihr Melassichkichli und ihre Slapjacks. Die Kichli hot sie in ihrm Essschank versteckt. Sie waare in em Kemmerli in der Kich. Sell waar die Schatztruh fer uns Kinner. Allemol, as ich Bsuch gmacht hab, hawwich glei gucke misse, eb ebbes in die Zinnbaxe mit Waxbabier am waarte waar. Mit kalde Milich waar sell ebbes fer mich, saag ich eich. Un naach em Boibackes hots allfatt iwweriche Gruschtteig gewwe. Im Offe gebacke mit glee bissel Budder druff, mit Zimmit un Zucker dezu, henn die Slapjacks es ganz Haus glockert. Ich kann sie noch rieche - ihr net?
'S waar bei ihr allfatt ebbes am geh! Der Pappy waar in die Garage am Saege, odder am ebbes flicke. Sie waar am Biggle, Abwesche odder am Koche. Wie ich elder warre bin, henn sie mir erlaubt, die Raase maehe fer en vaddel Dahler! Es Luschtigschte dabei waar, wann Aprikose dicht alliwwer am Boddem glege sinn, wie ich hab maehe misse.
Un bei ihr waare stennich Leit am bletzlich neischtobbe, abbadich die Freindschaft: Tante, Onkels, ihre Kinner, Freinde, Nochbere, Kusine, Bekannde. Do hemmer Deitsch gheert! Mir Kinner henn net recht gwisst, was sie gschwetzt un geblaudert henn, awwer mir henn gedenkt, as es en Zaubersprooch sei muss mit magische Wadde. Un ich denk, es sin aa heit magische Wadde, weil sie henn der Klang un die Graft, uns zu en annere Zeit zu bringe un uns glicklich in unsre Draame mache.

En Gruuss zu allibber schickt der
Michel aus'm alte Land,
as allegbott am draa denke is,
wie die Groosseldre so um die Zeit rum als Kasche gerobbt hen
Yaahre zerick im Summer uff die Bauerei.

Beitrag erstellt 17:18 |
Link

3.6.06
'S KATZ DEITSCH SCHTICK

Dihr liewe Leit hiwwe wie driwwe,

heit iss Tschuun 3, un mir henn die yaehrlich Versammling vun unser "German-Pennsylvanian Association" (Deutsch-Pennsylvanischer Arbeitskreis e.V.) in Kaiserslautern (Palatinate). Ich will meh schreiwe vun was mir duh welle in die neegschte Yaahre 's neegscht Mol uff "hiwwe-wie-driwwe.de".

An dem Blatz do will ich en Gedicht drucke, ass der John Birmelin (1873-1950) g'schriwwe hot Yaahre zerick:

Zehe gleene Inschebuwe

Zehe gleene Inschebuwe fische mit der Lein,
Eener fallt ins Wasser, dann waare's yuscht noch nein.

Nein gleene Inschebuwe henn dezu gelacht,
Eener, der grickt Bauchweh, dann waare's yuscht noch acht.

Acht gleene Inschebuwe henn die Gens gedriwwe,
Eener beisst der Genserich, dann waare's yuscht noch siwwe.

Siwwe gleene Inschebuwe blooge 'n alti Hex,
Eener grickt en Ohrfeig, dann waare's yuscht noch xes.

Sex gleene Inschebuwe heere Schpott un Schimpf.
Eener schemmt sich halwer doot, dann waare's yuscht noch fimf.

Fimf gleene Inschebuwe schtehle 'n Fessel Bier,
Eener watt 'ne g'soffe, dann waare's yuscht noch vier.

Vier gleene Inschebuwe fiedere die Sei,
Eener fallt ins Seifass, dann waare's yuscht noch drei.

Drei gleene Inschebuwe waade darich der Schnee,
Eener hot die Naas verfrore, dann waare's yuscht noch zwee.

Zwee gleene Inschebuwe fresse immer mehner,
Eener iss verschprunge, dann waar aa yuscht noch eener.

Ee gleener Inschebu, dem waar's so recht verleed,
Un wann er noch net g'heiert iss, dann geht er zu de Meed.

Nau, iss sell net ebbes Abbadiches?
En Gruuss zu alliebber im alte und im neie Land schickt der
Michael Werner,
wu alleweil der Frank Kessler aus Brussels (Belgium) deheem hot ass Bsuch.

Beitrag erstellt 11:07 |
Link

1.5.06

1.4.06

'S KATZ DEITSCH SCHTICK

Dihr liewe Leit,

'S Friehyaahr iss do, un nau nemmt's nimmi lang, un die Oschtre sinn aa do. Fer sell welle mer ebbes publishe, ass die Barbara Miller (1932-1998) g'schriwwe hot iwwer der "Oschderoierbaam".

Der Oschderoierbaam

Lange Yaahre zerick henn unsere Voreldere viele Gewohnheide vum alde Land mit naach Amerika gebrocht. Eens devun waar der Oschderoierbaam. Weil alles frieh im Friehyaahr so drieb un leer iss, henn sie gfarebde Oier uff en Baam ghenkt fer alles schenner gucke mache. Do in Pennsylvaani duhne viele Leit widder die alt Gewohnheit zum Lewe bringe.
Mer nemmt rohe Oier un dutt sie ausblose. Fer sie ausblose, muss mer an de zwee Enner mit 'me Schtechnoodel schtecke, un dann drin rumriehre bis der Dodder un es Weiss vum Oi gut uffgschtarrt sinn, dann am eende End neiblose, so ass es Schtofft am annere End raus kummt. Denno henn sie die leere Schale gfarebt.
Wie henn sie die Farewe gemacht? Fer en goldenes Gehl mache, hot mer en halwes Kuppche Rinn vum Hickernissbaam genumme, fei uffgebrocht, zwee Kuppche Wasser, en Teeleffel Essich un en Patz Allau. Die Brieh hot mer fer en halwi Schtunn langsam gekocht, un denno die Oierschale dezu nei (odder die hattgekochde Oier in der Brieh gemacht).
Deel vun die Oier waare aa "Binsegraasoier." Sie henn sich Binsegraas aus der Wiss uffgsammelt, henn's weech Marick mit 'me dinne Droht rausgschowe un henn dann mit 'em Marick die Oier schee gschmickt. Wann die Oier faddich waare, henn sie sie uff en Baam ghenkt fer alli-epper Blessier zu gewwe.

Sell Schreiwes iss gnumme aus en nei Bichli mit Title "Mit Pennsylvaanisch-Deitsch darich's Yaahr". Mer kann sell addere uff'm Heemetblatt vun die "Deutsch-Pennsylvanischer Arbeitskreis" uff www.pennsylvanien.de.

Halliche Oschtre
winscht der Michel aus'm alte Land

Beitrag erstellt 17:50 | Link

1.3.06
'S KATZ DEITSCH SCHTICK

Dihr liewe Leit,

Mir henn en wunnerbaar Wochend g'hatt. Am Dunnerschdaag owet waare der John un die Lydia Schmid vun Berlin (Ohio) zu Bsuch gwesst bei uns im alte Land, un sell waar ferschur blessierlich. Der John iss eens vun die pennsylvaanisch-deitsche Songwriter, un er hot zwee CDs gepublisht in die letschte Yaahre in die Mudderschprooch: "In Dutch!" un "In Dutch Again!" Sell kannscht du addere bei: Common Ground Ministries, Box 178, Berlin, OH 44610. 'S waare noch zwee Musiganter do, wu ich guud kenn, an seller Owet: der Peter Braun un der Paul Reinig. Un zamme hemmer guud Musick gmacht: Schticker aus Pennsylvani, Ohio un die deitsch Palz. Sell waar ebbes Abbadiches. 'S waar verleicht en wennich laut, awwer mei zwee Meed - die Marlene un die Pauline - henn en guuder Schloof.

Abbadich gegliche hawwich en Iwwersetzing, ass der John geduh hot vun en Beatles Song. "I want to hold your hand" iss nau "Kumm geb mir deine Hand". Un sell iss der Weg, ass es geht:

Verscht:
Oh du bischt so scheen,
Schee wie en Diamant,
Ich will mit dir gehn,
Kumm geb mir deine Hand.

Ref.
Oh kumm doch, kumm zu mir,
Du nemmscht mir den Verschtand,
Oh kumm mol, kumm zu mir,
Kumm geb mir deine Hand.

In deinen Armen bin ich glicklich un froh,
Des waar noch nie bei einer Andern emol so, emol so.

Nau, iss sell net ebbes. Sell sett ebber der Paul McCartney mol weise. Am Freidaag henn der John un die Lydia verlosse - un mer hoffe, sie schtoppe ball mol widder nei.

En Gruuss zu alliebber im alte un im neie Land schickt der

Michel Werner

Beitrag erstellt 20:37 | Link

31.1.06
'S KATZ DEITSCH SCHTICK

Dihr liewi Leit,

Nau hemmer der erscht Hanning, un's iss aardlich kalt im alte Land. Mir henn aa schunt en latt Schnee ghatt - un mir sinn net geyuust zu sell. 'S iss widder Grundsau Zeit, un ich bin wunnerfitzich fer ausfinne, eb sie ihr Schadde sehnt in Pennsylvaani. So bitte schickt mer en E-Poscht (michael-werner@t-online.de). Heit welle mer en Schtick drucke, ass unser Freind Butch Reigart gschriwwe hot iwwer die Versammling vun Grundsau Lodsch No. 15 in Kutzeschtettel. So kennt dihr heit wennich ebbes lanne vun was am aageh iss bei so en Gelegeheet, wann die Weibsleit un Mannskall Grundsei zammekumme fer en guudi Zeit hawwe mit deitsch Esses un en deitsch Schwetzerei. Un sell iss, was der Butch g'schriwwe hot:

"Die Pennsylvaanische Deitsche sinn fer's 23. Mol zamme kumme Oktower 26, 2005, in Kutzeschteddel fer die yaehrlich Versammling halte vun Grundsau Lodsch Nummer 15 (wu die Manns-leit un Weibsleit all beinanner hocke duhne). 'S waare hunnerde vun Leit datt.
Ya, un sie henn en recht guud Esse ghatt datt, guudi Schwetzer in die alt Mudderschprooch un eens vun die beschte Drupp Myusickleit: die Wolf Familiye vun Schulkill Kaundi.
S' erscht hot der Haabtmann Donnald Reinert en hatzhafticher "Wilkumm" aus-gschproche. Noh hot er die ganz Drupp uff die Fiess grickt, un sie geliedt un gfiehrt beim Singe vum Lied "Amerika" (was der John Birmelin iwwersetzt hot ghatt in Deitsch) un noh, fer es "Verschprechnis zum Faahne" saage. Noh hot der Haaptmann en "ruhich Minutt" aagsaat fer zerickdenke an all die Freind un Nochbere, ass heemgerufe waare darich 's Yaahr. Glei denooh hot der Parre Sterling Schnell (Snell) en schee deitsch Dischgebet gewwe fer die Leit datt.
Un naach em Gebet henn mer aafange esse. Ya, mer henn die ganz Lischt vun guudi pennsylvaanisch-deitschi Koscht grickt ghatt, vannich uns uff em Disch gschtellt: Salaat mit Seiderschpeck-Brieh, frischi Wascht un Schunkefleesch, Grumbiere-Filsel mit Fleesch-Dunkes, Welsch-kann un griene Buhne, Schmierkees un Lattwarick, Brot un Budder, Kaffi mit Rahm un Zucker, un en guud schmackhaft Schtick Boi. Un mer henn gesse un geblaudert mit unser dei-tsche Freind un Nochbere am Disch. Un Deel vun dem Geblauder waar in Deitsch, Deel - in Englisch. Un awwer die, wu Englisch geblaudert henn, henn bezahle misse defor - ihre Dollar in der Schtroofschissel nei-schmeisse, was midde uff 'em Disch gschtanne hot.
Naach dem Iems iss der Haaptmann Reinert widder zum Podium gange. Un er hot uns widder gfiehrt beim Singes. Un die ganz Drupp hot mitgsunge - vun die alti beliebti Schticker, ass mer so gegwehnt sinn fer singe an die Versammlinge: "Ich un Du", "Ich gleich des Deitsch zu schwetze", "Waart bis die Sunn scheint, Nellie", un "Oh, Pennsylvanisch Land wie schee".
Ya, un dann hot der Haabtmann die Ambtsleit nuff zum Podium gerufe, der Carl Hoffmanm un der Donnie Breininger. Der Carl hot deel Jokes verzehlt, un der Donnie hot es Protocol gewwe vum letschte Yaahr. Un dann iss die Zeit kumme fer die "Verbin-nerei". Sell iss, wu all die "Grundsei" - die ganz Drupp Leit an die Versammling - uffschtehne vum Disch, die zwee Hend in die Heeh duh un ihre "Grundsau-Verschprechnis" gewwe. Der Haaptmann hot des abgelese - Lein fer Lein. Un dann hot die ganz Drupp des noochgsaat, em Haaptmann sei Wadde widder iwwerholt. Un was sie gsaagt henn in dem Verschprechnis waar ernschtlich un gschpassich an die saeme Zeit. S'erscht henn die Weibsleit Sache gsaagt un henn verschproche zu ihre Maenner, ass sie guudi Weiwer bleiwe welle darich 's ganz Yaahr. Un noh henn die Mannsleit 'baut 's seem Ding verschproche zu ihre Weiwer. Un noh hot die ganz Drupp verschproche, ass sie guudi Grundsei bleiwe un abbadich, ass sie 's Deitsch in Ehr halde welle un die Mudderschprooch lanne zu ihre Kinner. Dann waar's Zeit fer es "Feschtreed", un der Schwetzer waar der Lee Haas vun Slatgington. Un sei Botschaft waar uff die zwee Weg - gschpassich un ernschtlich gemeent. Der "Teidel" vun seim Schwetzes waar "Duh dei Hand an die Bax". Un die Meening dezu waar, ass mer sett "Hand aaschlaage", mer sett net bang sei fer nanner raushelfe.
Naach 'em Redd iss der "Schluss" kumme. Der Haaptmann hot alliebber fer 's letscht Mol uff die Fiess grickt fer die "letschde Wadde" saage all minanner: "Liewer Gott im Himmel drin, loss uns Deitsche was mir sinn, un erhalt uns alli Zeit, unser deitschi Frehlichkeit ... (un 's iss mehner dezu)"."

En Gruuss zu alliebber im alte un im neie Land schickt der Michel Werner, wu froh iss, wann ball 's Friehyaahr kummt.

Beitrag erstellt 21:10 |
Link

1.1.06
'S KATZ DEITSCH SCHTICK

Dihr liewe Leit hiwwe wie driwwe,

Nau hemmer der erscht Yenner 2006, un ich bin noch wennich mied. Verleicht waar's bissli schpoot g'wesst geschter owet. Eenicherweg - sell geht verbei. Die ganz Werner Familie winscht alliebber en guudes neies Yaahr!

Bei uns im alte Land hot's aardlich g'schneet g'hatt in die Zeit zwischich Grischtdaag un Neiyaahr - un die Kinner henn sell abbadich gegliche. Sie henn die Schlidde rausgrickt un waare drauss, so lang, ass sie die Kaelt schtaende henn kenne. Nau iss der Schnee un widder am weckgeh - 's iss waarm warre letscht Nacht. Was kammer duh?

Heit drucke mer en Gedicht, ass der Astor C. Wuchter (1856-1922) g'schriwwe hot etliche Yaahre zerick. 'S heesst:

Hurrah fer der Winter

Hurrah fer der Winter, hurrah fer der Schnee!
Nau raus mit'm Schlidde, un zaehl mer kenn zwee.
Do muss mer sich dummle, sunscht geht er eweck;
Verleicht bis uff maryie hot's nix ass wie Dreck.

Hurrah fer der Winter! Der Schlidde muss raus.
Was hockt mer am Offe, was will mer im Haus?
Un druff mit de Belle, sunscht iss 's kenn G'fahr.
Der Winter iss katz un die Schliddebah rar.

Hurrah fer der Winter! Nau geht's emol ab.
Wie schneller, wie liewer. "Git up, Sal un Bob!"
Was rabble die Belle, was schpringe die Geil!
Des iss mol en G'fahr, es geht ya wie'n Peil!

Hurrah fer der Winter! So ebbes iss G'schpass.
Die Meed singe 'en Liedel, die Buwe der Bass.
Un geht's in die Schneebaenk un schmeisst's emol um,
Geht's drunner un driwwer, was gebt mer dann drum?

Hurrah fer der Winter! Mit Eis, Schnee un Kaelt!
Wann's glaenzt ass wie Silwer - sell iss yuscht, was fehlt.
Wann's Schnee hot, watt g'fahre, wann's Eis hot, watt g'schkeet,
Hurrah fer der Winter, abbadich, wann's schneet!

Hurrah fer der Winter, hurrah un hurrah!
Nau raus mit'm Cutter un druff mit der Fraa.
Un loss 's mol klingle, dass alle Hund blafft!
Der Winter iss do un die Arewet iss g'schafft.

Ich muss die Woch alsemol widder in die Affis fer mei Arewet g'schafft gricke, awwer mei drei Meed kenne mariyets noch laenger schlofe. Die Schul schtaert erscht in en Woch. Un wammer noch en Kind iss, iss mer glicklich. Un wammer en Schulmeeschtern iss, aa .... ;-).

Macht's guud
Michael Werner

Beitrag erstellt 18:18 |
Link

15.12.05
'S KATZ DEITSCH SCHTICK

Dihr liewe Leit hiwwe wie driwwe,

Sell iss mei letscht Bottschaft an dem Blatz fer des Yaahr, un ich will mich bedanke bei all die Leit, wu mer g'holfe henn die letschte Munete bei mei Arewet. Grooss Dank zu all die Schreiwer vun Articles in "Hiwwe wie Driwwe", un grooss Dank zu all die guudi Freind in Pennsylvania, wu mer g'holfe odder en Heemet gewwe henn, wie ich uff B'such waar in Oktower/November. 'S iss schee, wammer fiehle kann wie deheem so weit eweck vun heem. Heit welle mer en Schtori drucke, wu der Parre Leonard E. Shupp - er iss 83 Yaahr alt - g'schriwwe hot Yaahre zerick.

En Beemg'schicht fer Grischtdaag

Des iss en Schtori, ass die Gremmem un der Grampap, wu die deitsch Mudderschprooch noch schwetze kenne, lese kennte zu die Kinner un Kinnskinner am Grischtdaag:
Mol ee Zeit waare drei Beem im Busch. Sie waare ihre Hoffe un Draame am iwwerschwetze, wie der erscht Baam g’schwetzt un g’saat hot: “Mol ee Daag, hoff ich, ass ich en Schatzkischt bin. Ich kennt g’fillt sei mit Gold, Silwer un wunnerswert Edelschtee. Ich kennt verleicht g’henkt warre mit feischtenglich ausg’schnitzelt Dinger, un alliebber deet die Scheeheet devun sehne.” No hot der zwett Baam g’saat: “Mol ee Daag bin ich en grefticher Schiff. Ich will en Keenich un en Keenichin iwwer’s Wasser nemme zu die Ecke vun die Welt segle. Alliebber will sicher fiehle in mich, dieweil ass mei Rump so grooss un schtarick iss. Endlich hot der dritt Bamm g’saat: “Ich will uffwaxe fer der heechest un schtrackst Baam im Busch sei. Die Leit sette mich sehne uff’em Gippel vum Barick un duhn nuff an mei Nescht gucke un denke vum Himmel un vum Gott, un wie neegscht, ass ich zu sie am reeche bin. Ich will der groossaardischt Baam vun all Zeit sei, so ass die Leit mich immerfatt meinde welle.”
Naach en paar Yaahre vun Bete, ass ihre Draame wahr kumme deete, sinn en Drupp Buschmenner zu die Beem kumme.
Wie eener zu der erscht Baam kumme iss, hot er g’saat: “Des guckt wie en krefticher Baam. Ich denk, ass ich ‘s Holz guud verkaafe kann zu en Schreiner.” Un er hot aag’fange, der Baam nunnerschneide.
Der erscht Baam waar hallich, weil er gewisst hot, ass der Schreiner ihn in en Schatzkischt mache deet mol ee Daag. Am zwette Baam hot en Buschmann g’saat: “Des guckt wie en schtracker Baam. Ich sett kenne ihn verkaafe zu en Schiffhof. Der zwett Baam waar aa hallich, weil er gewisst hot, ass er uff’em Weg waar fer en mechticher Schiff zu bekumme. Wie die Buschmenner zu der dritt Baam kumme sinn, waar er vergelschtert, ass sie ihn nunnerschneide deete, eb sei Draam wahr kummt deet. Eens vun die Buschmenner hot g’saat: “Ich brauch nix Abbadiches vun mei Baam”, un hot ihn aa nunnerg’schnidde.
Nau, wie der erscht Baam zu der Schreiner kumme iss, henn sie ihm in en Fuderdroog gemacht fer die Gediere. Er waar in die Scheier g’schtellt un g’fillt mit Hoi. Es iss net, was er gebet hot defor.
Der zwett Baam waar uffg’schnidde un zu en Fischboot gemacht. Sei Draame vun en mechticher Schiff bekumme, mit Keenich un Keenichin draage, iss schnell zu en End kumme.
Der dritt Baam waar am End aa uffg’schnidde in groosse Schticker, un alle gelosst im Dunkel. Yaahre un Yaahre sinn verbei gange, un die Beem henn vun ihre Draame vergesse.
No, mol ee Daag, sinn en Mann un en Weibsmensch zu die Scheier kumme. Datt hot des Weibsmensch en Kind gebore, un sie henn‘s Kind uff’s Hoi g’legt im Fuderdroog, ass gemacht waar vum erschte Baam. Der Mann hot gewinscht, ass er en Kribb g’hatt hett fer’s Kind, awwer der Fuderdroog waar guud genunk. Der Baam hot en Bedeiting g’fiehlt vun des Ding, un ass der Fuderdroog ‘s greescht un bescht Schatzkischt vun all Zeit hewe deet.
Yaahre schpeeter sinn en Drupp Mannsleit in en Fischboot gange, ass gemacht waar vum zwette Baam. Der eent Mann waar mied un iss noht schlofe gange.
Weil sie aus uff’em Wasser waare, iss en grosser Schtarem uffkumme, un der Baam hot gedenkt, er waer verleicht net schtarick genunk fer die Menner im Schiff sicher halde.
Die Mannsleit im Schiff henn der Mann wacker gemacht, un wie er uffg’schtanne iss, hot er “Friede” g’saat, un der Schtarem hot sich bumms abg’schtoppt. An seller Zeit hot der Baam gewisst, ass er der Keenich vun alle Keeniche in seim Schiff am draage waar. Zum lengschte End iss ebber kumme, aa noch der dritt Baam gricke.
Er waar yuscht en bissel g’schnitzelt, un no darich die Schtrosse gedraage, weil die Leit der Mann, ass ihn am draage waar, aardlich guud ausg’schpott henn. Wie sie abg’schtoppt henn, henn sie der Mann zu der Baam genaggelt un in die Luft uffgericht zu schtarewe am Gippel vum Barick.
Wie der Sunndaag kumme iss, hot der Baam ausgemacht, ass er schtarick genunk waar fer uff’em Barick schteh, un ass neegscht zu sei zum Gott, ass ‘s meeglich waar, weil Yesus uff ihn gegreizicht waar.
Der Moral vun dem G’schicht iss, wann Dinger net immer dich basse, kannscht immer wisse, ass unser Gott en Blaan hot fer dich.
Wann du dei Draues in ihm duhscht, gebt er dir groossaardiche G’schenke. Allieener vun die drei Beem henn, was sie henn wolle, grickt - yuscht net in der Weg, ass sie sich’s selwer eigebildt henn.
Mer wisse net immer, was’em Gott sei Blaane sinn fer uns. Mir wisse yuscht, ass sei Wege net unser Wege sinn - awwer sei Wege sinn immer ‘s bescht.

Ich winsch alliebber hiwwe wie driwwe
en hallicher Grischtdaag un en guudes Yaahr 2006

Sell schreibt der Michel aus'm alte Land

Beitrag erstellt 20:54 | Link

2.12.05
'S KATZ DEITSCH SCHTICK

Dihr liewe Leit hiwwe wie driwwe,

Nau iss der Disember do, un's nemmt nimmi lang, bis mer Grischtdaag henn. Henn dihr schun alle Bressends? Ich hab net, so muss ich mich wennich dummle, so ass die Kinner ebbes finne kenne unnich der Dannebaam. 'S iss guud, ass sie noch net im weltweit Gewebb um der Weg sinn - schunscht kennt ich nix schreiwe vun sellem an dem Blatz. Bei uns deheem bring als noch 's "Grischtkind" die Bressends - un ich hoff, sell bleibt noch so paar Yaahr ...

In die Zeit vum Yaahr sett mer aa wennich backe. Fer Sell drucke mer heit en Recipe, ass mer grickt henn vun die Nancy Martin, en Fuhremennischtefraa vun Ontario. Do iss es:

Lebkuche (En Grischtdaag Recipe)

Was mer braucht: Zwee Oier, zwee Kopplin voll Molassich, ee Koppli voll braune Zucker, ee Koppli voll saure Raahm, ee Koppli voll Hasselniss in Schticke, ee Koppli voll gedatte Zitrone, ee Koppli voll anner gedatt Obscht, ee Teeleffli voll g'mahle Gewatzneggeli, ee Teeleffli voll Zimatt, ee Teeleffli voll Aniseed, ee Teeleffli voll Sody, ee halb Teeleffli voll Nutmeg, siwwe Kopplin Mehl, ee Teeleffli voll Salz.

Wie mer schafft: Duh alles zammeriehre, ss wie net es Mehl. Mach der Deeg e wennich waarm, awwer net hees, in e Schissel iwwer heess Wasser uff em Offe. Duh es riehre die ganz Zeit. Noht duh es Mehl neiriehre un duh der Deeg in en kalte Blatz fer zwee Daag. Noht mach es in vier Schticke un duh sie eens uff emol in en langliche Rolle mache. Wickel sie in Waxbabier un duh sie in en kalte Blatz, bis sie schteif sinn. Noht duh sie abschneide mit 'eme scharf Messer so um en ¼ Zoll dick. Duh sie uff e g'schmutzte Kuchepann un schmier e wennich Oiweiss un Wasser uff yedes un e halwe Nuss (Note: In Deitsch "schmutzich" meent "oily", net "dirty"). Back sie fer ungefehr 10 minutes an 350 degrees F. Die Kuche sinn erscht hatt, noht warre sie besser, wann sie e Weil in e Bax waare un alles ziehgt darich.

Mer winsche alliebber en hallicher Disember un schreiwe widder ebbes do in paar Daag.
Macht's guud im alte un im neie Land.


Michael Werner

Beitrag erstellt 08:07 |
Link

15.11.05

15.10.05
'S KATZ DEITSCH SCHTICK

Dihr liewe Leit,

Iss der Inschesummer schun do in Pennsylvaani - odder nemmt's noch en gleeni Weil. Mir welle sell ball ausfinne, weil mir en Rees geblaant henn zu unser Freind im neie Land. 'S Luftschiff bringt uns niwwer neegscht Wochend - un mir gucke vaschich zu sell. Heit welle mer en Schtori drucke, ass der Clarence Reitnauer (1900-1989) g'schriwwe hot etliche Yaahre zerick:

Der Inschesummer

Ya well, do sinn mer schun widder im Schpootyaahr. Wu iss der Summer dann so g'schwind hie kumme? Ich meen, es waer yuscht Friehyaahr gewest, wie ich der erscht biddere Zelaad g'sucht hett. Es scheint, ich hett gschlofe so wie der Rip Van Winkle hot, dieweil ass der Summer do waar. Wie waar 's mit eich?
Iwwerdem kummt awwer der Altweiwer-Summer adder der Insche-Summer. Wie heesst ihr selli Zeit? Lenger zerick waar 's alsfatt Altweiwer-Summer do in unsere Nochberschaft. Awwer nau watt 's gewehnlich der Insche-Summer g'heesse. Ich denk, mir losse die alde Weibsleit ruhge un schwetze vun de Insche heit.
Alle Yaahr, g'wehnlich im November, noochdem as ebaut alles verfrore iss, gebt 's noch so 'n scheeni warmi Zeit - sell iss der Inschesummer. Alsemol iss es so kalt fer 'n langi Zeit, frieh im Schpootyaahr, ass mer meent, es deet so fatt mache bis der Belsnickel kaemt. Awwer ihr kennt eich druff verlosse, as der Inschesummer noch am kumme iss!
Wann ihr net zu bissi seid, geht mit mir datt nuff uff der Hiwwel, wu mer weit rum sehne kenne. Mer wolle uns do uff den dicke Block hocke. Noh kenne mir ewennich ruhge debei. Guck mol datt iwwer 's Daal, nuff naach em Busch, datt driwwe uff 'em Barick. Nau wolle mer gaar nix schwetze - un wolle yuscht denke fer e Weil. Nau was hett ihr g'sehne? Was hett ihr gedenkt? (Des muss g'schehne uff so en scheener Daag, im Insche-Summer, wann 's ebbes meene soll.)
Die Suumefelder sinn aarick schee grie, un 's Welschkann iss abghackt un schteht uff Schack. Datt driwwe schpringt en groh G'schwarl uff de Fens naus un geht am Eechebaam nuff mit 'me Hickerniss im Maul. En alder Grabb hockt datt driwwe uff sellem Keschtebaam. Un hie un do sehnt mer noch en Fleddermaus, ass widder zu Gnaade kumme iss. Es sinn noch deel Veglicher do rum, ass noch net naach der Sudd gange sinn. Annere sinn schun vun de Nord kumme fer der Winder bei uns zu schpende.
All die Dinger scheine awwer, ass wann sie net viel Lewe in sich hedde. Net wie im Friehyaahr, wu sie so wusslich sinn, un sinn all am singe un am Neschter baue. Des iss ewwe der Inschesummer. Es scheint, die Zeit vum Yaahr kaemte de Insche ihre Geischter widder zerick heem fer e Weil.
Nau gucke mir niwwer naach em Busch - datt sinn ball all die Bledder vun de Beem. Un alles guckt so doot un bedauerlich. Sellerweg muss die ganz Welt geguckt hawwe zu de aarme Insche, wie sie ausgedriwwe sinn warre. Des waar ihre Heemet bis mir, weisse Leit, do herkumme sinn un hen sie ausgedriwwe. Sie henn net in Heiser gewuhnt wie mir duhne. Sie henn Zelter g'hat, ass viel geguckt henn wie selli Welschkann-Schack, ass mer sehne datt driwwe im Feld. Sie henn ihre Esse gemacht uff Holzfeier. Un henn aa Feier g'hat in ihre Zelter fer e bissel waarem bleiwe im Winter. Denooh hot mer der Schmook sehne nuff geh, wu die Insche ihre Heemede g'hatt henn.
Uff so 'n waaremer Inschesummerdaag sehnt mer gewehnlich Wolke vun Duft aus em Boddem kumme - ass ehm gemaahnt an de Insche ihre Schmookfeier. Die Englische deete 's "haze" heesse. Sell kummt aus em Grund, wann die Sunn waaremer scheint wie gewehnlich - un der Boddem iss feicht adder nass. Fer sell sehne muss awwer kenn Wind am geh sei. Nau hocke mer doh uff em Block un sehne de Insche ihre Zelder un der Schmok vun ihre Feier. Kannscht du 's sehne?
Do iss noch ebbes, ass mer driwwer denke kenne, wann mer datt hockt. Wieviel Leit, Insche un weisse Leit, sinn schun iwwer sell Land gange? Die meenschte vun selle sinn schun lang in die Ruh gange. Mer deet gaar net glaawe, wann ehm ebber des saage kennt. Wu sinn sie all hie kumme? Wu sinn sie begrawwe? Was waare ihre Druwwel adder ihre Blessier in dem Lewe? Denkt mol datt driwwer. Die Bisch un die Felder henn sich aarick verennert zidder ass der lieb Gott sie erschaffe hot. Niemand eegent sie fer en langi Zeit.
Loss uns noch ewennich weiter denke. Wieviel unnerschiddlich Vieh iss schunn iwwer den Grund gegraddelt, geloffe adder g'schprunge? Mer hot gaar kenn Idea vun so ebbes. Eens kummt un lebt do fer 'n katzi Zeit un noh muss es fatt geh un en anner's kummt.
Mir sinn nau reddi fer heem geh. Awwer henn mer net an viel gedenkt - uff seller Inschesummerdaag, wie mer datt uff em Block g'hockt henn!

Der Schtiwwel Gnecht vun Siesholtzville

En hallicher Oktower winscht alliebber hiwwe wie driwwe
der Michel aus'm alte Land

Beitrag erstellt 16:31 | Link

1.10.05
'S KATZ DEITSCH SCHTICK

Dihr liewe Leit,

Der Oktower iss nau do, un ich denk, der nei Latwarick iss schun gekocht, iss er net?
Ich weess, im neie Land yuuse sie Ebbel - im alte Land yuuse mir Gwetsche. Awwer 's iss neegscht kenn Unnerschidd - alle zwee schmacke guud. Heit drucke mer en Gedicht, ass der Thomas Jefferson Boyer Rhoads (1837-1919) g'schriwwe hot:

Latwarick koche fer alters

Viel Yaahr zerick in unserm Ort,
Bei kiehle Schpootyaahrswoche,
Do sinn die yunge Leit als fatt,
Um Latwarick helfe koche.

Was waar des doch en Hallichkeet,
Bei yede Schpootyaahrnacht,
Do henn die Buwe un die Meed
Ihr Zeit gern zugebracht.

Fimf Naechte in 'ere Woch henn sie
Als Latwarick helfe koche,
Noh sinn sie heem in aller Frieh -
Henn sehr viel Schloof gebroche.

En Deel henn als die Schnitz gemacht,
Den Latwarick mit zu koche,
Die henn geblaudert un gelacht
In selle scheene Woche.

Zwee henn als immerfatt geriehrt -
En Liebling un sei Schatz,
Un manche henn gekaressiert
In yedem dunkle Blatz.

Annere henn als Holz gebracht
Vum Holzblatz hinner 'em Haus,
Die henn das Feier guud gemacht
Un sinn dann widder naus.

Sie waare all gepliest un froh,
'S iss alles lustich gange;
Die Buwe sinn die Meed als noh
Un henn sie immer g'fange.

Do waar als Fun vun allerlei,
En Yedes waar gepliest;
Die Mammi waar aa do debei
Un hot sie all gegriesst.

Guud Esse waar als zugerischt,
Un guuder Wei un Seider;
En Yedes waar schee uffgewischt
In seine guude Kleider.

Die schwatz gebrennte Bauersmeed
sinn als frieh bei gekumme,
Die waare fein gedecorate
Uff 'em Kopp mit scheene Blumme.

Datt waar als Schpass fer yunge Leit,
Sie henn gern Schloof gebroche,
Die sinn so kumme Meile weit
Den Latwarick helfe koche.

Sell waar als nix fer yunge Leit
En manche Meil zu laafe,
Sie waare ya zu seller Zeit
All uffgebrocht zum Schaffe.

Henn fahre kenne wie en Mann,
Frucht maehe, binne, dresche,
Henn g'schafft so guud, wie en Yedes kann
Un waare g'wehnt zu wesche.

Sinn maryets schun um vier Uhr raus
Un henn die Kieh gemolke,
Dann sinn sie uff die Felder nau
Unner Himmel klaar vun Wolke.

Die dunkel Haut waar net veracht
Bei selle yunge Mensche;
Sie henn ehm ya recht abgelacht -
Mer kennt nix Schenners winsche.

Do waar kenn Powder im Gesicht -
Die Backer net aageschtriche,
En Mann grickt do sei voll Gewicht -
Sell hot mer als gegliche.

Ya, der Harebscht iss nau do,un mir sinn froh, ass mer ball widder naach PA kumme.
'S nemmt yuscht noch drei Woch, bis mer abschtaerte.

Sell schreibt der Michel aus'm alte Land

Beitrag erstellt 22:23 | Link

15.9.05
'S KATZ DEITSCH SCHTICK

Dihr liewe Leit,

Nau hemmer Mitt vun September un der Summer iss aryets schunscht hiegange - mir henn kaelter Wedder grickt paar Daage zerick. Un's guckt so, als wann sell so bleiwe sett fer die neegschte Daage. Awwer verleicht gricke mer ya mol noch ebbes, ass die alte Leit "Altweiwersummer" heesse - schee Wedder am End vun September odder aafangs Oktower. Mer welle sehne.

Gudi News hemmer fer Leit, wu gleiche, pennsylvaanisch-deitsche Bicher lese. Unser Freind Dr. Walter Sauer druckt en nei Bichli in die Mudderschprooch: "Die Nacht vor der Grischtdaag". Mer kann in Contact kumme mit der Walter uff die Website www.verlag-tintenfass.de. Ich bin schur, mer kann sell Bichli schun addere, wammer en E-Poscht schickt zu ihm.

Heit welle mer en Gedicht drucke, ass der John Birmelin (1873-1950) g'schriwwe hot viele Yaahre zerick.

Der September

September watt gebluggt, ge-eegt,
Noh kummt mer an die Soot;
Do sehnt mer, wie der Bauer schafft
Un sarigt fer's deeglich Brot.

Grumbiere warre ausgebluggt,
Mer muss sie zammelese;
Bis owets dutt der Buckel weh
Bis nunner in die Heese.

Ans Welschkannbaschte geht mer gaern,
Do schafft mer unverdrosse;
Waer do en roder Kolwe findt,
Der daref en Meedel bosse.

Nau watt der Lattwarick aa gekocht,
Do muss mer fleissich riehre;
Die Buwe helfe gaern de Meed
Un duhne karessiere.

Un Sauergraut watt eigemacht
In Schtenner un in Fesser;
Die Deitsche schtampe 's mit de Fiess,
Sell macht's noch viele besser.

Ya well! Nau geht mer an die Fair,
Do dutt mer Grundniss esse,
Doch bis die Kalls gemuldert henn,
Watt aarick gnapps gemesse.

"Election" Zeit, es wimmelt nau -
So wie die Leis am Hawwer,
Mit Kandidaade, grooss un glee,
Un all dem siesse G'schlawwer.

Deel henke an der Kaundi Kuh -
Mer deet verleicht aa selwer;
Deel hoffe, 's watt mol Blatz gemacht
Fer ganze neie Kelwer.

Des Schpootyaahr iss schun widder do,
'S hot gaar net lang genumme;
Die Veggel singe nimmi viel,
Ihr G'sang dutt ball verschtumme.

Die Kinner schickt mer in die Schul,
Sie misse widder lanne;
Schlumeeschter bloogt sich mit 'ne ab,
Nau kann sich der verzanne.

Die Schwalme fliege widder heem,
In schene, waarme Laenner;
Sie wisse selwer ihre Zeit
Un brauche kenn Kalenner.

En Gruuss zu alliebber im alte un im neie Land schickt der Michel Werner, wu aarick froh iss, ass er im Oktower mol widder naach Pennsyvaani kummt.

Beitrag erstellt 06:16 | Link

1.9.05
'S KATZ DEITSCH SCHTICK

Dihr liewe Leit,

Nau iss 's schunt widder September, un's Schpootyaahr iss do. G'meenerhand gleich ich sell net, wann der Harebscht kummt. In dem Yaahr awwer guck ich vaschich zu sell, weil ich hab en Rees geblaant in October/November naach Pennsylvaani. Un nau nemmt's nimmi lang, bis Zeit iss fer abschtaerte. Wunnerbaar! Heit drucke mer en Kalemn ass der "Schtiwwelgnecht", der Clarence Reitnauer (1900-1989), g'schriwwe hot baut 35 Yaahr zerick:

Schpootyaahr

Ya, sell iss recht - 's Schpotyaahr fangt schunn widder aa. Mer meent, es kennt net wahr sei, ass der Summer schunn widder veriwwer iss. Der zwelft Augscht henn die Hawwergees es erscht Mol aafange zu greische, do am Ebbelbungert. Sie saage, in sechs Woche naach sellem kennt mer der erscht Froscht eckschpeckte. Ich will mol sehne, eb sell aushalt. Die Grickslicher sinn aa schunn fer en langi Zeit am geige - ich denk, sell iss, was mer ihre Zucht heesse deet. Sie saage, sie deete ihre Myusick mache mit de Fliggel.
Wann mer die Bledder an de Beem aaguckt, sehnt mer aa schunn, ass deel nimmi so schee gucke. Eb mer draa denkt, duhne sie sich schunn widder drehe zu annere Farewe. Un glei falle sie schun widder runner. Ich denk, die Hollerbeere sinn aa ebaut verbei bei dere Zeit. Des iss die Zeit, wu die Ebbel schun reddi sinn fer robbe. Noh warre die Schnitz gemacht un die Cider- un Latwarick-Zeit iss aa schunn doh.
Was riecht 's awwer net guud, wann mer neegscht an en Drauweschtock kummt! Es scheint, es waer en guud Yaahr gewesst fer Drauwe. Schier iwwerall, wu ich waar, henke die Schteck aarick voll. Ich gleich "grape juice" aarick gut. Un ich weess, ass deel Leit Latwarick koche vun Drauwe. Des iss aa die Yaahrszeit, wu die Riewe am greesser warre sin. Wie ich yung waar, hawwich selli Ketzer aarick g'hasst. Awwer nau gleich ich sie zimmlich guud.
Des iss aa die Karebse-Zeit. Die Betz (die Fraa) hot deel geblanzt in unser Siesswelschkannschtick. Un es leit voll Halskarebse. Selli mache guude Kustard. Un mir gleiche aa gebrodne Karebse. Mer sehnt aa viel aaricke grosse gehle Karebse, ass oft geyuust warre fer der Schpukowet (Halloween). Deel Leit duhne de Kieh Karrebse fiedere. Sie gleiche sie zu fresse. Un ich denk, es macht aa viel Milich.
Ich denk, 's hot aa noch deel Siesswelschkann so rumher. Awwer selli Zeit iss ebaut veriwwer. Ei, was hot der Schtiwwelknecht widder Siesswelschkann zu sich gschafft! Ich meen, es gaebt nix besser's ass wie Welschkann an de Kolwe. Ewennich Salz un en latt Budder druff - noh geht mer an der Tschabb! Ich gleich 's aah eeniche annere Weg. Mer verhungert aa net graad mit Korn Fritters. Welschkannboi halt ehm aah am lewe!
Es Feldwelschkann guckt aa aarick guud des Schpotyaahr. Mer kann aarick froh sei fer sell. Es macht en guuder Eikummens fer die Bauere un es Vieh hot aa guud Esses. Sell gebt guude fedde Sei un Rinnsvieh, so ass mer guud Fleesch grickt fer esse. Mer sott nie net vergesse fer Gott zu danke fer all des gut Sach, as Er waxe losst. Mir Mensche henn des net verdient, wann mir aa meene mer hett hatt g'schafft defor.
Unser guude gleene Freind - die Veggel - sinn aa schun am reddi mache fer fatt geh. Deel sinn schun so hehlingerweis fatt gschniekt. Viel, ass noch do sinn, sinn gaar nimmi so luschtich wie sie waare darich der Summer. Was henn sie g'sunge vun frieh mariyets bis in die dunkel Nacht, wie sie ihre Beewies am uffziehge waare. Nau henn sie ihre Arwet g'schafft, un es scheint, der Mut waer ihne g'falle. Die yunge Veggel sinn ausgewaxe. Un viel gehne mit ihre Eldre noch em warme Land. Deel bleiwe awwer do fer uns Kumpani halde darich der Winter. Annere kumme do her fer der Winder schpende. Ich hab deel Sunneblumme geblanzt, so ass mer net so viel kaafe breicht fer die Veggel darich der Winder. Awwer nau henn die Guudherre (bluejays) sie ausg'funne. Sie henn net waarde kenne, bis der Schnee kummt; sie henn sie schunn ebaut all gfresse. Ich denk, sie gleiche sie, wann sie noch grie sin. Ich kann sie aa net bleeme. Ich gleich 's Welschkann aa besser, so lang, ass es noch weech iss. Ich denk, ich muss ewwe widder an 's Kaafe geh de Winter.
Alsemol macht 's ehm schlecht fiehle, wann 's Schpootyaahr do iss - un mer weess, ass der Winder am kumme iss. Awwer es hot aa sei guudi Seid. Ich meen allfatt, der September waer eens vun de schenschte Munet. Die grooss Hitz iss verbei, un es Wedder iss gewehnlich meh gseddelt. Die Nachte sinn kiehler, un mer kann guud schlofe. Ennicher, mer sott allfatt es bescht rausnemme.

Ich denk, der "Schtiwwelgnecht" hot recht.
Nemmt's bescht raus - aa im Schpootyaahr.

Sell schreibt der
Michel aus'm alte Land

Beitrag erstellt 06:17 | Link

15.8.05
'S KATZ DEITSCH SCHTICK

Dihr liewe Leit hiwwe wie driwwe,
In unser letscht Kalemn henn mir en Interview gedruckt mit der nei Director vum Pennsylvania German Cultural Heritage Center, Prof. Robert Reynolds, un mir henn ausg'funne, was er am blaane iss in Kutzeschtettel in die neegschte Yaahre. Desmol gehne mir mit unser Kalemn weck vun Pennsylvaani ganz weit wescht naach Indiana un gucke, wie pennsylvaanisch-deitsch datt g'schwetzt watt. Fer sell drucke mer heit ebbes, ass der Prof. Al Albrecht (er waar gebore 1924) aus die Goshen Gegend g'schriwwe hot Yaahre zerick.

Fremme pennsylvaanisch-deitsche Wadde

Mei Daed, Aaron Albrecht, iss zu de Schtates kumme vun Ontario, Kanada, wann er mei Mom g’heiert hot, un hot sich uffg'schtellt fer Bauere en Meil Oscht vun Middlebury un en Meil Wescht von Menno Hooley’s Bauerei uff dem Weg zwische Shipshewana un Middlebury (IN).
Der Menno waar en Bruder zu mei Mom. Mir henn als Arwet verhannelt mitenanner. Eens Mariye ist der Aaron zu sei Schwaager Menno gange fer Hilfe mit die Arwet. Wenn er zu ihre Dier kumme iss, henn sie ihn g’frogt, wie er kumme iss. Er hot g’sagt, “uff Fuss.”
Der Walter, mei Vetter, hot net g’wisst, was sell waar, un no hot er sei Daed g’frogt, wann der Aaron ‘s net heere hot kenne, was “uff Fuss” meent. Sei Daed hot ihn g’sagt, “er meent, dass er hot geloffe.”
Dann sinn sie an die Arwet gange. Glei hot der Aaron g’saagt, dass sei grankes Kalb iss doot gange am letscht Nacht un “Ich hab’s verlocht, eb ich kumme bin den Mariye.” Des waar aa noch en anneres neies Watt fer der fimf Yaahr alt Walter. “Was meent er mit verlocht?” hot er g’frogt. “Ach, er meent, er hot’s vergrawe,” hot der Menno g’sagt. Wie sie angange sinn mit ihre Arwet, sinn sie yetz zu en Blatz kumme, wu der Hund en Bisskatz verschreckt hot en paar Minutte zerick. Der Aaron hot g’sagt, “Es riecht gans hesslich, ass mir unser Ochdem schier net halde kenne.” “Rieche? Rieche? Was iss sell?” “Sell meent, es schmackt, un er saagt aa, dass es iss ganz wiescht”, hot der Menno g’sagt.
Ich denk, dass seller Daag hot der Walter neie Wadde g’lannt.
In Zeit, wann dieser Schreiwer fimf adder siwwe Yaahr alt waar, hot mei Daed schun gelannt g’hatt fer “laafe”, “vergrawe” un “schmacke” zu saage. Awwer ich glaab, wann er zerick zu Kanada gange iss fer sei Brieder un Schweschdere b’suche, hot er die annere Watte g’sagt.

Mir winsche eich en hallicher Auugscht un hoffe, ass 's net zu heess watt im alte un im neie Land.

Michael Werner

Beitrag erstellt 07:58 | Link

1.8.05
THE HIWWE WIE DRIWWE INTERVIEW

Dihr liewe Leit,

Mir henn unser deitschi Kalemn do uff "hiwwe-wie-driwwe.de" schun sitter Yenner 2005 - un heit welle mer's erscht Mol ebbes in englisch an dem Blatz drucke. Die Ursach iss: Mir henn geblaudert mit der Prof. Robert Reynolds, der nei Director vum "Pennsylvania German Heritage Center in Kutzeschtettel". Er iss en yunger Kall un watt verleicht sell Tschabb duh fer die neegschte 25 Yaahr. So waare mir wunnerfitzich un henn wisse welle, was sei Blaene sinn ...

Froog 1: In January 2005 you became “Director of the Pennsylvania German Cultural Heritage Center.” What are your plans for the next five years?

Reynolds: My vision is focused upon making the Heritage Center of Kutztown University the focal point for the study and the presentation to the public of the Pennsylvania German culture. To achieve this objective we are enlarging our research library, working with the University to define our land boundaries, embracing the presentation of traditional crafts, and developing stronger academic ties between the University and the Center.

Our library was initially developed to aid people of Pennsylvania Dutch lineage in discovering their ancestors and piecing together their family migration story. Over the next five years we plan to broaden our collections in providing sources focused upon architecture, folklife, and history. A new architect will help the Center conceptualize how to improve our research accommodations, add much needed shelf space, and reorganize our holdings in order to provide the best assistance possible to visiting researchers while conserving our collections. We hope to increase the attractiveness of our facility to scholars, create an environment that aids in gaining the donation of libraries by important scholars of the Pennsylvania Germans in America and Germany, and maintains our reputation as an excellent source for genealogy.

The most pressing issue for the Heritage Center is the need to define our boundaries with the University. I am currently engaged in a Master Plan revision and I am making my case to stop the loss of any more of the farmland around the Center from being developed for sport fields or other building development. We lost nearly one third of the crop land we farmed two years ago to three soccer fields and a dump site used to put top soil removed for construction projects. The dirt dump is an unsightly carbuncle located less than fifty feet from two newly restored eighteenth century log cabins. Once we secure and define our boundaries a comprehensive five year development plan can be created to guide site development and I hope that a cooperative approach can be pursued in treating the boundary between the Center and the University’s athletic fields.

I anticipate directing the Heritage Center for the next twenty-five years, and I intend to look at the Heritage Center property as a cultural landscape with the intention of pursuing a landscape architecture approach to the land and the creation of a late nineteenth century appearance as a frame for our historic buildings. I want to follow the European open-air museum approach of creating clusters of buildings linked together by pedestrian walkways that evoke the rural landscape. There are power lines that need to go under ground, hedgerows need to be established to divide the fields, landscaping is needed to screen out views of an overtly modern nature, a general cleanup of dumped debris needs to be implemented, and the parking areas and circulation paths need to be rethought and improved. The use of the entire site would allow for a long term plan that could result in the relocation and exhibition of a church, a water powered mill, a general store, several craft buildings, and the establishment of a second farmstead. Since the Center must raise the funds needed to develop the museum, a key aspect of success is fundraising and attracting major donors.

The Heritage Center was transferred from the History Department to the Department of Art Education and Crafts where we train future art teachers and craft artists. I want to create opportunities at the Center for our crafts students to obtain an introduction to traditional carpentry, tinsmithing, blacksmithing, and weaving as a foundation for the study of contemporary craft practices. A new affiliation agreement between the Heritage Center and the Berks Guild of Craftsmen is being negotiated, and the arrival of the Guild will help to bring trained and working craftsmen to the Center. We hope to combine the skills of the Guild craftsmen and our connections to the Kutztown Pennsylvania German Festival with opportunities for students to gain training, scholarships, and exhibition and demonstration opportunities. Developing new opportunities for students and the public to learn traditional crafts and trades is a new direction for the Center. In addition, we have begun a workshop series on the arts of the Pennsylvania Germans. We offered a class in making valentines in February and there will be a workshop on wheat weaving in November. Ultimately, workshops will occur at least monthly.

Connecting the Heritage Center to the students of Kutztown University is a major goal over the next five years. As the Freyberger Professor of Pennsylvania German Culture, I teach one course each semester and I am involved in developing new initiatives to involve students with the Center and the culture of the Pennsylvania Dutch. I created a course this past Spring called History and Architecture of the Pennsylvania German Landscape that combined seminar style readings discussions with six field trips to historic houses and major museums and hands-on restoration experience at the David Hottenstein Mansion where I serve as the resident curator. We plan to hire work/study students and sponsor student interns this fall to work on our artifact documentation project. My Department started a Museum Track major that will provide independent study opportunities for our students at the Center, and then we have our new German major and Pennsylvania German minor.

Froog 2: A new "Minor in German Studies" will be offered at Kutztown University starting in autumn 2005. Could you tell our readers to which extent Pennsylvania German elements will/could be integrated into the curriculum?

Reynolds: The State System of Higher Education voted to reinstate the teaching of German in our Language Department in January 2005. They agreed because the Language Department added a Pennsylvania German minor program to allow students training to teach German to also learn about the culture and dialect of the Pennsylvania Germans. We are all very excited about this new program and I expect to teach my Pennsylvania German Landscape class as an elective. An introductory course to Pennsylvania German Culture has been passed by our curriculum committee, and there is an expectation that four semesters of dialect instruction will be made available. We have not yet formulated a final plan on how we will create four semesters of dialect instruction, but we hope to start with the introductory classes we have offered at the Center for years and develop a conversation class with the help of older dialect speakers working as volunteers.

In May I went to Germany with a team to open negotiations at the University at Hamburg and the University at Mainz for faculty and student exchanges. If our plans are realized, there should be opportunities at Hamburg for our German majors to spend a semester or a year abroad. At Mainz I am working with a professor in the History Department to create a course that looks at the origins of the Pennsylvania Germans before they left Germany and then examines what happened when they came to America. We hope to combine German and American students with two professors. Half the course shall happen in Germany in May with the other half occurring at Kutztown in September. This course will be held in 2006 if all the approvals can be secured.


Froog 3: Could you please explain the relationship between the Heritage Center and the Kutztown Folk Festival?

Reynolds: Both the Heritage Center and the Folk Festival are owned by the Kutztown University Foundation. The Festival Director David Fooks and I report to William Sutton on behalf of our responsibilities to the Foundation. Philosophically, the Center and the Festival both seek to impart an understanding of the Pennsylvania German culture to the public. During the Festival horse drawn wagons and other artifacts are moved from the Center to the Festival grounds and many of the volunteers from the Center are involved in demonstrating and helping the Festival succeed. This year, Dave Fooks and I plan to meet during the Festival to discuss how the Center shall better fulfil its mission through involvement at the Festival. I want to see the Center play a stronger role in fostering an interest in traditional Pennsylvania German folklife.


Froog 4: Language is a key factor for the maintenance of the Pennsylvania German culture. What could the Heritage Center do in order to support the teaching and use of the Pennsylvania German dialect, e. g. to continue to offer ACT 48 classes for teachers, to create a network for teachers, who have successfully completed these courses and who teach something about the PG in their classes?

Reynolds: The ability to speak and understand the Pennsylvania German dialect is most common among our oldest generation in south eastern Pennsylvania. Some younger people are proficient, but this is far less common except among the conservative sects where the dialect remains central. We offer dialect courses at the Heritage Center, but we are not able to stop the decline in dialect speaking.

What else might be done to carry on the dialect? I have a 2-year old daughter and I wish that when she needed to choose to study a language in the public schools of Kutztown, Pennsylvania that she could learn to speak the language common among the people that settled the lands where we now live. If the teaching of the dialect appeared within the curriculum of public schools, there would be a reason to train language teachers and a need to develop textbooks. The dual certification of language teachers in German and the Pennsylvania German dialect could provide a means to bring the dialect to new young generation.


Froog 5: Are there any plans to promote the use of Pennsylvania German in the media - for example by supporting Pennsylvania German TV and radio programs shows, columns in newspapers or similar activities?

Reynolds: I have appeared on the Pennsylvania German television show that is recorded in Reading, Pennsylvania but of course my talk was in English. Our recently retired Secretary Mary Henry writes a newspaper column in the dialect and I expect she shall continue contributing.

It is difficult to promote the use of the dialect in the media because while we certainly do have thousands of dialect speakers, we have many more people moving into the area that do not understand. It is unusual for the dialect to be translated in the media so that dialect speakers and English speakers only can both understand. If the dialect programming was translated dialect programming would become more instructional and useful to those trying to learn how to speak Pennsylvania Dutch.


Froog 6: Are their any plans to try to bring all the different Pennsylvania German activities together under the roof of Heritage Center - for example by creating a kind of "Pennsylvania German Board", which could consist of the 50 most relevant key persons in the Pennsylvania German scene and could maybe even include representatives from the other large PG settlement areas in Ohio, Indiana and Ontario?

Reynolds: What an interesting idea for a gathering. No, I have no plans to organize such an effort at this time, but perhaps in the future. The real need is a dialogue about the interests, opportunities, and causes that might come from such a gathering. What would such a board develop as a mission and could the entire community of activities and representatives from throughout the Pennsylvania German culture region be unified? What would be the benefits of such unification? An exchange of ideas, perhaps through this publication, seems the starting point to gather support for such a summit meeting.


Froog 7: What could the Heritage Center do to strengthen the contacts between Pennsylvania Germans and people in the Rhenish Palatinate - the region, where most of the ancestors of the Pennsylvania German have came from.

Reynolds: People in both places need to visit each other and spend time together. I plan to continue our efforts to create affordable trips for Americans to travel to Germany and I will work to help establish connections in Germany that could help to coordinate the visitation of Palatinate Germans to America.

Froog 8: Does the Heritage Center intend to promote/support any particular research projects about the Pennsylvania Germans?

Reynolds: As an open air museum, much of the research going on at the Heritage Center focuses upon the restoration of historic architecture, artifact cataloging, conservation, and interior interpretation. A vision statement is currently being developed that will look at how to present the Pennsylvania German culture to the public through the development and expansion of our museum and the enlargement of our research library. Research is underway to develop a tool exhibit for carpenter, cooper, and blacksmith tools mounted in our Zimmerman Log Cabin.

Froog 9: Will the Internet Website of the Heritage Center be modernized and become more interactive?

Reynolds: Our website is part of the system developed for Kutztown University which affects the design. The modernization of our site will likely begin with more information about what is happening at the Heritage Center followed by an effort to provide greater linkages to other related sites. In what ways should our web site be more interactive? Send any viable ideas to reynolds@kutztown.edu

Froog 10: What do you as the new director of the Heritage Center think about the "Deutsch-Pennsylvanischer Arbeitskreis e.V." in Germany, which was founded two years ago?

Reynolds: My experience with the Deutsch-Pennsylvanischer Arbeitskreis e.V at this point is limited to an examination of the Number 3 newsletter for 2005. While I am only able to comprehend the portion in English, I really enjoyed a number of articles. The story about the Horse and Buggy Drivers Manual was great. I live on a busy road in an eighteenth century farmhouse, and several of my neighbors are old order Mennonites who travel by horse and buggy. I have seen first hand the challenges of travel on the shoulder of a major road with cars and trucks passing at over 60 miles per hour. I admire my neighbors’ commitment to their traditional lives in the wake of modern life. I plan to send for a copy of the manual and place it in our research center at the Center. The collection of Fasnacht Day articles helped increase my understanding of this traditional Pennsylvania German practice. I ate Fasnachts this year at a special open house held by a friend down in the Oley Valley of Berks County. I look forward to learning more about this group in the months ahead and offer my support in their efforts to link together Germans and Pennsylvanians.


Froog 11: What kind of Pennsylvania German topics do you miss in "Hiwwe wie Driwwe", the Pennsylvania German newspaper?

Reynolds: I really enjoy the newspaper and I am grateful for the effort Michael Werner puts forth in pulling all of this information together. Perhaps a forum could be added where a question could be posed and people could respond by email with the results posted in the next issue. My interest is in folklife and the social history of farm life and architecture. Any articles on those topic areas are exciting for me to read.

Froog 12: Do you have Pennsylvania German roots?

Reynolds: I am not a Pennsylvania German, but I am part German, and I had the good sense to marry a Pennsylvania German girl and those genes were passed on to my daughter. My wife Jennette belongs to the Shook family, which came from Switzerland into the Pfalz and then headed across the Atlantic during the Pennsylvania German migration. Her relatives settled and remain in the vicinity of Frederick, Maryland and they share a common pattern of being farmers, teachers, and preachers.

On my mother’s side I am reputed to be a descendent of John Alden, a passenger on the Mayflower, the first ship to arrive in New England in 1620. Other strains in the maternal line include Dutch ancestors in old New York City and, through my mother’s father; I am descended from Germans who went to St. Louis, Missouri in the nineteenth century.

My roots on my father’s side are found in the settlement of New England with ancestors arriving in Ipswich, Massachusetts during the Puritan migration of the 1630s. From Massachusetts my family sought land in New Hampshire after the French and Indian War in the mid-eighteenth century, and they then migrated into Vermont after the American Revolution. I am a direct descendent of and carry a middle name honoring Daniel Webster, a member of Congress in the 1830s through the 1850s who unsuccessfully ran three times for President of the United States. My grandparents owned a 400-acre farm in northern Vermont when I was growing up.


Froog 13: Do you speak/understand Hochdeutsch or the dialect? Do intend to improve this knowledge?

Reynolds: I am only able to competently communicate in English at this time, but my wife and I plan to study the dialect this coming academic year with Paul Kunkle and Alice Spayd in the one room schoolhouse at the Heritage Center. We plan to offer Paul’s course this fall that he developed for the Groundhog Lodges and in the Spring Alice shall present the Buffington and Barber method of learning the dialect. I took the Groundhog Lodge course in 1995 and the Buffington and Barber class in 2004, but I must confess that once the classes ended I did not retain the language as well as I had hoped. With the help of my wife and the plan to use the dialect at the dinner table each evening I hope to be able to travel the Palatinate speaking the dialect soon.


Mir welle en deitschi Version vun sell G'schpraech drucke in die neegscht Ausgab vun "Hiwwe wie Driwwe", un welle sell Kalemn net schtoppe, eb mer eich g'saagt henn, ass es en wunnerbaar nei pennsylvaanisch-deitsches Heemetblatt gebt mit en Forum: www.amisch.de. Un wann dihr datt anne geht un uff "WIKI" drickt in die Menu, seid dihr in en nei pennsylvaanisch-deitsch Encyclopedia. Un dihr seid eig'lade fer mitmache. Guckt yuscht mol rei.

Sell schreibt
der Michel aus'm alte Land

Beitrag erstellt 23:36 |
Link

15.7.05
'S KATZ DEITSCH SCHTICK

Dihr liewe Leit,

Mer henn ausg'funne, ass 's en latt neier deitscher Schtofft zum uffgucke gebt uff 'em Heemetblatt vun unser Freind Robert Lusch. Geht yuscht mol zu www.deitscherei.org.

Heit welle mer en Schtori drucke, ass unser Freind Noah G. Good (1904-2002) g'schriwwe hot Yaahre zerick. Ich hab ihn 's letscht mol b'sucht im Yaahr 2000, wu er g'wuhnt hot neegscht zu die Mennonite Historical Society in Lengeschter. 'S waar allfatt en Freed fer schwetze mit ihm:

Freidaags uff de Bauerei

Mir waare fimf Buwe deheem. Do waare aa noch unsre Eldere, der Henner un oftmols en Maad. So sinn mer zu neint an der Disch gange. Mit ’re neinkeppiche Familie hot’s ebbes genumme zu esse.
Oft waar’s Esse ganz eefach, yuscht e groosse Schissel voll fer die ganze Familie, v’leicht en groosse Supp odder’n Deller voll vun ebbes Gebroodenes. Mer hot alsfatt mit Brot un Schmieres aag’fange, un nochdem hot mer sich aus de groosse Schissel bedient.
Mer sinn nie net hungrich vum Disch weggange. Dreimol im Daag hot mer gesse: Mariyets hot mer’s Mariye-esse odder’s Friehschtick g’hadde; middaags hot mer’s Middaagesse gesse; un oweds hot mer‘s Nachtesse gesse. Wann mer g’sund waar, waar mer debei, wann gesse iss warre; wann mer g’fehlt hot, waar ebbes letz: dann waar mer krank odder schlecht zumut, odder mer hot sich verschloofe.
Naach dem Esse sinn mer all an die Arrewet gange. Die Weibsleit henn’s Esse weggemacht. Oft waar net viel wegzumache, mer henn alles gesse. Doch waare die Deller, die Glaesser, die Messere, Leffel, Gawwle un die leere Schissle zu wesche. Mit heessem Wasser un Seef hot mer all’s G’scharr g’wesche un g’schwenkt un wegg’schtellt fer’s neegschte Mol, dass mer gesse hot. Mir Mannsleit henn draus g’schafft. Es waar immer viel zu duh fer die groosse un die glennere Leit. Die groosse Leit henn’s Sach g’ruppt un reigebrocht fer der Marrick. Do waare Rotriewe, rote un weisse Rettich, Buhne, Zwiwwle un noch viel annere Sache zu ihre Zeit. Freidaags henn mer all im Hof g’schafft. Mer hot die Sache fer der Marick wesche misse, in gleene Bindel binne un sie eipacke.
So waare mer am rischte fer der Marick, wie der Henner kumme iss mit ’me Arm voll g’schnittene Blumme. Er hot g’saat: "Ich hab ebbes g’sehne. ‘S iss en Schnarrveggli kumme, wu ich am Blumme schneide waar. ‘S hot sei Nescht uff’me Nascht im Baamgaarde. Datt hawwich sei Nescht g’funne, ‘s guckt graad wie’n alter Gnorre uff ’me Nascht. ‘S iss aus aus Schpinnegeweb gebaut un mit alte Rindschticker un Moos bedeckt. Mer deet gaar net denke, dass des’n Nescht waer, awwer ‘s liege zwee gleene, weisse Oyer drin, so grooss wie’n Arrebs.
Yuscht wie der Henner am ablaade waar, iss der Mauskeenich aus de Deichsel g’flogge, wu er sei Nescht gebaut g’hatt hot un hot so luschtich g’sunge fer uns. Der Henner hot g’saat: "Heerscht sell, wie kann der awwer singe. Die Schnarrvegglin kenne net singe, awwer ihre Fliggel gehn so schnell, dass mer sie net sehne kann, un sie kenne schtill schteh bleiwe in de Luft, odder schnell fliege, aa hinnerschich. Wie iss doch die Nadur wunnerbaar."
Graad zu selle Zeit iss’n Fensmeisli unnich’m Schopp rauskumme mit de zwee Backe ganz dick voll fer in sei Nescht draage.
Die Memm hot ihn g’sehne un hot g’saat: "Guck mol seller Ding, wie er sich die Back uffg’fillt hot, wu will er hie mit sellem?" Awwer sie hot net lang wunnere brauche. Unser groosse Katz hot ihn aa g’sehne. Ihr hot’s Fensmeisli aa guud geguckt.
Sie hot weider nix vun sich heere losse. Ganz ruhich hot sie so’n Katzebuckel g’macht un iss uff’s Fensmeisli losg’schprunge. Schneller wie mer’s schreiwe odder saage kann, waar alles vorbei.
Die Katz iss devun g’loffe mit’m Fensmeisli im Maul, hot wennich gebrummt un iss fattgange, wu sie’s ruhich fresse hot kenne.
Gleimol iss die Katz z’rickkumme zu de Memm un hot sich newich sie g’leegt. Die Memm hot sie g’schtreichelt mit de Hand un hot g’saat: "Sell hettscht du net duh selle. Mer fiedre dich. Du muscht kenn so schee Fensmeisli fange un fresse."
Die Katz hot laut un freindlich g’schpinnt. Sie bekimmert sich net drum, dass junge Fensmeislin hungrich geh misse. Wie iss doch die Nadur so wunnerbaar, awwer viel kammer schlecht begreife.

Mer hoffe, ass all die B'sucher vum Folk Festival im Kutzeschtettel in guudi Zeit g'hatt henn datt, un winsche alliebber hiwwe wie driwwe noch en hallicher Tschulei.

Macht's guud

Sell schreibt der Michel aus'm alte Land

Beitrag erstellt 13:10 | Link

1.7.05
'S KATZ DEITSCH SCHTICK

Dihr liewe Leit hiwwe wie driwwe,

Tschulei 4th iss neegscht, un aa mir im alte Land wisse, was seller Daag meent zu all die gudi Leit driwwe in America - un abbadich aa die Pennsylvaanisch-Deitsche, ass schunt so lang im neie Land sinn un g'fochte henn mit die annere Buwe gehich die Englische im 18. Yaahrhunndert fer ihre Freiheet.

Heit welle mer en Gedicht drucke, ass der Ernest Waldo Bechtel (1923-1988) g'schriwwe hot im Yaahr 1976. Er waar en guuder Kumraad zum Prof. C. Richard Beam ("Bischli Gnippli") un waar mit ihm zamme in Deitschland ass en Soldaat im zwedde Grieg. Datt henn sie g'holfe, die verdeihenkert Nazi Gang fattyaage. Nochher henn sie zamme en Radio Program "Die alte Kumraade" uff die Luft grickt un am geh g'halte fer etliche Yaahre. 'S Gedicht heesst:

America

America, wie grooss un schee,
Du bischt uns aagenehm,
Un immer welle mir bei dir schteh:
Die Welt rum un deheem.

Do wuhne mir alle Sadde Leit
Mit alle Sadde Schprooch,
Un unser Draam iss Eeenichkeit:
Mir hewe des so hoch!

Mir henn die Weezefelder gehl,
Die Felder grie mit Graas.
Die hooche Bariye un die Schtedt
Mit Holz un Schtee un Glaas.

Ya, unser Land findt uns gedrei
Un yeders dutt sei G'flicht.
Mir hewe hoch mit yeder Hand
Des deier Freiheitslicht!

Oh America, wie grooss du bischt!
Kann schier kenn Mensch verschteh,
Doch sinn mer froh fer wuhne do
Im Land vum Freiheitslicht!

Chorus:
Ya, in die Nadd un in die Saut,
Im Oscht un aa draus Wescht,
In alle Schteet vun See zu See:
America iss bescht.

So warefe mer heit unser deitschi Schtrohhiet in die Heh un winsche alliebber in America en hallicher Tschulei 4th!

Michael Werner

Beitrag erstellt 08:25 |
Link

15.6.05
'S KATZ DEITSCH SCHTICK

Dihr liewe Leit,

Nau hemmer schun Tschuun, awwer der Summer iss noch net do im alte Land. Alliwwer hemmer en latt Regge - awwer die schmaerte hochg'lannte Leit in die Guckbax saage, sell deet en End nemme nau. Abbadich die Kinner deet's free-e, wann's Wedder breche deet un mer paar heesse Daage gricke kennte. Heit welle mer en Gedicht drucke, ass der John Birmelin (1873-1950) g'schriwwe hot Yaahre zerick. 'S heesst:

Zehe gleene Inschebuwe

Zehe gleene Inschebuwe fische mit der Lein,
Eener fallt ins Wasser, dann waare's yuscht noch nein.

Nein gleene Inschebuwe henn dezu gelacht,
Eener, der grickt Bauchweh, dann waare's yuscht noch acht.

Acht gleene Inschebuwe henn die Gens gedriwwe,
Eener beisst der Genserich, dann waare's yuscht noch siwwe.

Siwwe gleene Inschebuwe blooge 'n alti Hex,
Eener grickt en Ohrfeig, dann waare's yuscht noch sex.

Sex gleene Inschebuwe heere Schpott un Schimpf.
Eener schemmt sich halwer doot, dann waare's yuscht noch fimf.

Fimf gleene Inschebuwe schtehle 'n Fessel Bier,
Eener watt 'ne g'soffe, dann waare's yuscht noch vier.

Vier gleene Inschebuwe fiedere die Sei,
Eener fallt ins Seifass, dann waare's yuscht noch drei.

Drei gleene Inschebuwe waade darich der Schnee,
Eener hot die Naas verfrore, dann waare's yuscht noch zwee.

Zwee gleene Inschebuwe fresse immer mehner,
Eener iss verschprunge, dann waar aa yuscht noch eener.

Ee gleener Inschebu, dem waar's so recht verleed,
Un wann er noch net g'heiert iss, dann geht er zu de Meed.

En Gruuss zu alliebber schickt der
Michel aus'm alte Land

Beitrag erstellt 08:49 |
Link

1.6.05
'S KATZ DEITSCH SCHTICK

Dihr liewe Leit,

paar Daag zerick hemmer die Gliederversammling g'hatt vun unser "Deutsch-Pennsylvanischer Arbeitskreis" do in Heidelbarick im alte Land. Sell waar ebbes Abbadiches. Mer sinn am blaane fer en nei Pennsylvania German Anthology drucke in en paar Munet, wammer genunk Adders henn. Wann dihr gleiche deete meh wisse vun sellem, geht yuscht uff unser Heemetblatt:
www.pennsylvanien.de.

Heit welle mer en Gedicht publishe, ass der Prof. Ernest G. Gehman g'schriwwe hot Yaahre zerick. Mer wisse, er waar gebore im Yaahr 1901 - awwer mer wisse net, wann un wu er g'schtarewe iss. So wann ebber vun unser Leser sell weess, waer's schee, wann er uns en ePoscht schreiwe kennt (michael-werner@t-online.de). Grooss Dank.

Fer alders waar als blendi Zeit

Fer alders waar als blendi Zeit,
sie henn net misse dummle.
Nau reist mer rum wie gaar net g’scheit,
gedriwwe wie vun Hummle.

Sie henn als an der Disch sich g’hockt
un langsam g’schwetzt un gesse.
Nau schmeisst mer’s Fuder zum Hoiloch nei -
kenn Hund kennt’s g’schwinder fresse.

Sie henn als langsam hinnich’m Gaul
gedrollt, ja, un geloffe.
Nau schiesst mer fuffzich Meil die Schtund,
un ebbes watt gedroffe.

Mer wolle sexmol so viel duh,
un duhne sell oft aermlich.
Mer dabbe dabber dabbich rum
un mache uns yuscht daumlich.

Was iss nau letz mit dere Welt?
Wu iss die Zeit hiegange?
Die Uhre henke iwwerall,
doch Zeit kann niemand fange.

Halt, losst uns nau verschdennich sei,
un schtoppe, weil mer kenne.
Eil batt nix do, un niemand kann
sich in der Himmel renne!

Mer winsche alliebber en hallicher Tschuun!

Sell schreibt der
Michel aus'm alte Land.

Beitrag erstellt 08:11 | Link

15.5.05
'S KATZ DEITSCH SCHTICK

Dihr liewe Leit,

heit simmer abbadich froh, weil mer kenne alliebber wisse losse, ass mer nau alli 12 pennsylvaanisch-deitsche Classes vun die Alice Spayd online henn bei "hiwwe-wie-driwwe.de". Guckt yuscht mol rei.

Fer unser deitschi Leser drucke mer heit en Schtori, ass der Leonard E. Shupp vun Whitehall g'schriwwe hot en Zeit zerick. 'S heesst:

Die Familie-Zammelaafe

Ball kummt widder die Yaahreszeit, wu die Familie-Zammelaafe in Gang kumme. Die sinn eens vun die Sache, ass yuscht zu finne sinn in unsere pennsilfaanisch-dei-tsche Gegende.
Wisst ihr, ass die Zammelaafe net so allmechdich alt sinn? Die eldschde (in mei Unnersuching) waare g’halde baut 100 Yaahr zerick. Es waar so an der 1900 rum, ass Leit aag’fange sinn Summers zammekumme.
Des waar g’wehnlich deheem beim Graempaep un die Grememm uff die Bauerei. Im Aafang waar’s yuscht die Kinner un die Kinnskinner, ass kumme sinn. Wie paar so Zammelaaf g’halde waare, verleicht draus im Bungert odder drunne im Busch ganz neegscht an die Schpring, sinn die Unkels un die Aendies beikumme, so aa die Kusins un annere Glieder vun die Freindschaft.
Schpeeder iss der Drupp zu grooss warre fer zammekumme deheem uff die Bauerei, no iss die Familie-Zam-melaaf naach der Picknick-Busch gezogge.
Vun Freindschaft iss es naus in die Bekanntschaft gange, un glei warre die Familie-Reunions eens vun die greeschde Zammelaafe im ganze Summer. In alle pennsilfaanisch-deitsche Gegende ball alle Familie waare eig’feedelt mit eenre.
In die erschte Reunions hot yeders en Karreb Esse gebrocht fer uff der lang Disch schtelle, ass der Graempaep uffg’schtellt hot draus im Bungert odder im Scheier-Dreschdenn.
Noch schpeeder hot Bisness sei Naas in die Reunions g’schteckt, un no hot’s aa Programme gewwe: Schwetzer, die meenscht Zeit waare’s die Parre, ass g’frogt warre sinn fer kumme, mit Musigander un Singer.
Un no hot’s Amtsleit genumme fer die Sache am geh halde. Sell nadierlich hot aa gemeent, ass es Geld genumme hot fer die Koschde bezahle. Geld hot uffgemacht sei misse, un der gewehnlich Gebrauch waar fer en Kollect zu hewe odder Zettele un Schpelle verkaafe - un wann’s Geld no noch katz waar, henn die Amtsleit un aa die Kommitteeleit gewehnlich in der Sack gelangt un’s uffgemacht. Viel Leit darrich die Reunions henn Lewens-laaf-Bicher rausgrickt vun ihre Familie. Sie henn ihre Familieschtammbeem unnersucht un nunnerg’schriwwe.
In unser Zeite, un in Yaahre, ass noch kumme, warre die Familieschtammbeem hadder zu finne, zu unnersuche un schreiwe, ass wie unser Voreldre in friehe Zeite ‘s uffg’sucht henn. Zu wisse, wie viel Leit, ass heitzudaags net wisse, wer ihre Grooss-eldre waare, un zu finne, was fer Druwwel, ass manniche Leit henn fer ihre voll Lewenslaaf uffgucke, iss yuscht zu wisse, was fer en wunnerbaar Arrewet, ass die friehe Familie-Reunions helfe henn duh fer die Lewenslaaf-Bicher meeglich mache.
Henn ihr schun gedenkt, ‘s iss nix in darre Welt, ass sich schtarricker veraennert, ass wie die Familie-Zammelaafe - wie sie aa heesse: Die yunge Leit heiere zamme nei, Bobbelicher kumme un annere schtarrewe weg.
‘S iss schaad, ass die Koschde heitzudaags so grooss sinn fer noch Lewenslaaf-Bicher zu drucke. In friehe Zeite waar’s meeglich fer die Bicher drucke fer ganz wennich Geld, awwer sell iss nimmie der Fall. Die Koschde sinn so hoch, ass wennich Leit afforde kennde fer die Bicher kaafe, wann sie do waere.
Awwer, wann’s aa wennicher
Lewenslaaf-Bicher gebt heitzudaags, iss es noch en Blessier zu sehne, wie die Familie sich nau in die Summer, ass kummt, sich widder zammedabbe fer der Gebrauch am geh halde, wu die Urgrooss-eldre in der Gang grickt henn baut 100 Yaahr zerick deheem uff die alt Bauerei.
Viel Leit heitzudaags henn Indresse in ihre Lewenslaaf odder Lewensschtammbeem, un annere baddere sich nix dewege. Awwer, mei liewer Leser, ‘s iss yuscht, wie mer’s aaguckt.

En Gruuss zu alliebber aus'm alte Land schickt der

Michael Werner

Beitrag erstellt 21:02 |
Link

8.5.05

1.5.05

15.4.05
'S KATZ DEITSCH SCHTICK

Dihr liewe Leit,

Do letscht hawwich en Schtick g'funne, ass der J.H. Dubbs g'schriwwe hot meh wie 100 Yaahr zerick. 'S waar gedruckt im Daniel Miller sei Bichli im Yaahr 1904. Do iss es:

Deitsche Settelments vor der Revolution

In der friehe Geschicht vun America finne mer viel Deitsche. Des erscht Buch, wu in America rausgewwe iss warre, iss gedruckt warre vum 'me Deitsche in 1544, Martin Cronberger, in der Schtadt Mexiko. Peter Minuit, der erscht Gouverneur vun der Schtadt Neu Amsterdam, was yetzt die grooss Schtadt New York iss, waar en Deitscher aus der Schtadt Wesel. In 1638 hot er en latt Schwede an's Ufer vum Delaware Rewwer gebrocht. Er hot de Insching en grooss Schtick Land abgekaaft vun Cape Henlopen bis naach dem Trenton Wasserfall, un der Baerge, wu er mit den Insching gemacht hot, iss niemols verletzt warre. Daniel Pastorius waar der Pionier der deitsche Settler in unserem Land. Er iss im Yaahr 1683 naach America kumme un hot die Schtadt Germantown bei Philadelphia ausgelegt.
Der greescht Deel der erschte Settler in America waare Schweizer un Paelzer. Die Schweizer waare frieh im Feld, awwer im Aafang henn sie sich mehrschtens im Suede gesettelt. Erscht about 1730 sinn sie in groosser Zahl naach dem Nadde kumme. In Ost-Pennsylvaania sinn viel Gemeene gegrindt warre vun Schweizer, wu in den Kaundis Zuerich un St. Gall gebore waare. Die erschte deitsche Settler in Pennsylvania henn zu dene "Friedesekte" geheert, wu vun William Penn eigelade waare un vun ihm uffgenumme warre sinn. Im Yaahr 1698 sinn viel Mennischte aakumme, un in 1709 un in folgende Yaahre sinn die Dunker vun Schwarzenau kumme. Viel henn aa zu Sekte geheert, wu nau ausgeschtorwe sinn. Deel vun ihne sinn zu ie Quaker gange.
Die grooss deitsch Eiwanderung in America hot in de erschte zehe Yaahr vum achtzehnte Yaahrhunndert aagefange. Die Ursach devun waare schlechte Zeite im Vadderland. About en hunnert Yaahr lang waar Deitschland en Baeddelfeld, un die Leit waare arg arm. Der Keenich vun Frankreich, Ludwig XIV, hot Deitschland ferchterlich verhaust g'hatt. Dausende vun deitsche Leit sinn dorch die Franzose vun ihre Heemete weggedriwwe warre. Viel sinn dorch Holland naach England gange, un sinn endlich naach America geschickt warre. Die Queen Anne, die Keenigin vun England, hot Dausende vun de aarme Paelzer eigelade, sich in America en Heemet zu suche, un sie hot viel uff ihre eegene Koschte riwwer geschickt. Der Winter vun 1709 waar en arg hatter in der Palz, un im neegschte Friehyaahr un Summer henn 30,000 Mensche ihr Geburtsland verlosse. Die Regierung vun England hot Deel zuerscht in ihrem Land gesettelt, awwer es hot net recht geh wolle.
Viel vun de erschte Settelments in America sinn schun lang ausgeschtorwe. In Mississippi sinn die Paelzer beim hunnert am gehle Fiewer geschtorwe, un in Natt Carolina sinn sie dorch die Insching abgeschlacht warre. En paar Dausend sinn naach New York Schteet geschickt warre un henn sich am Hudson un am Mohawk Rewwer gesettelt, wu sie so frieh wie 1710 grischtlich unnerricht warre sinn vum reformierte Parre Frederick Haeger un dem lutherische Parre Josua Kocherthal. Sie sinn awwer schlecht getriet warre vun der Regierung, un doher henn sich viel uff der Weg gemacht naach Pennsylvania. Sie sinn dorch die Wildernis gange bis zum Susquehanna Rewwer, un dann sinn sie uff Raefts der Rewwer nunnergange bis an die Schwatara, un vun datt sinn sie naach Tulpehocke in Berks Kaundi gedraewwelt. Ee Party is dorch der Conrad Weise gefiehrt warre. Er waar en beriehmter Insching Agent un en arg brauchbarer Mann. Er waar en Dolmetscher zwische die Insching un dem Goverment.
Im Yaahr 1713 iss die Schtadt Germana in Orange Kaundi, Virginia, vun deitsche Settler gegrindt warre. Die Geschicht vun dem do Settelment iss arg interessant.
Die erschte deitsche Settler sinn in unser Land kumme ohne Fiehrer. Sie waare wie Iemeschwaerm. Sie henn sich en Weil do un en Weil datt uffgehalte, awwer sie henn kenn Ruh gefunne, bis sich sich in Pennsylvania un Maryland gesettelt henn. In Pennsylvania waare die Deitsche zuerscht in zwee Distrikte, die ganz separat vun enanner waare. Der estliche Distrikt waar das Land zwische dem Delaware un dem Schuylkill Rewwer, nattlich bis an der Bloo Berg; des weschtlich Distrikt waare das Conestoga Land, zuerscht en Deel vun Chester Kaundi, vun der Octorora Grick bis zum Susquehanna Rewwer. Die mehnschte Leit im estliche Distrikt henn in Deitschland zu der Schteet-Kerch geheert - reformiert un lutherisch. Im weschtliche Distrikt hot die Mehrheit zu de Friedenssekte geheert. Die Synode vun de reformierte un luddrische Kerche sinn gegrindt warre vum Parre Michael Schlatter un dem Parre Henry Melchior Muehlenberg.
Dorch der Franzeesisch un Insching Grieg waar's Land weschtlich vum Susquehanna Rewwer net seef fer Leit, sich zu settle. Doher sinn die deitsche Eiwannerer suedlich gange, dorch Maryland un Virginia naach Natt un Sued Carolina. In die suedliche Settelments waare viel Leit, wu graad vum Vadderland kumme waare. Do waare abbadich die Salzburger, en Kumpanie Luddrische, wu wege Verfolgung fattgange waare un in Georgia en Heemet gefunne henn g'hatt. Viel vun de erschte deitsche Settler in Pennsylvania henn sich fiehre losse dorch grischtliche Principles. Die Schwenkfelder waare vun Schlesien kumme un henn sich in 1734 in Ost-Pennsylvania gesettelt, wu sie heit noch sinn. Die Herrnhuter henn Bethlehem in 1741 gegrindt. Die grooss Mehrheit der Leit waare awwer reformiert odder luddrisch, un die Leit waare die beschte Vertreter vum deitsche Lewe.
Die deitsche Pioniere waare wennigschtens so guud gelannt wie die Eiwannerer vun annere Laenner. Ihre Parre waare schier alle in de deitsche Colleges geschult, un die Leit henn Respekt g'hatt vor Lanning. Sie henn arg gern gelese. Der Christopher Sauer un sei Soh henn in Germantown en Druckerei gegrindt, un selle waare die greescht un wichtigscht in de amerikanische Colonies. Sie henn drei Satte Bibele gedruckt, un sell waare die erschte deitsche Bibele, wu in America gedruckt warre sinn. Die Briederschaft bei Ephrata hot aa viel Bicher gedruckt, wu nau arg rar sinn.
Die erschte deitsche Settler waare dorchweg aarm, un sie henn hatt schaffe misse fer ihr Lewe. Sie waare awwer fleissich un schpaarsam, un mit der Zeit iss aa Reichtum kumme. Die Leit in unsere erschte deitsche Settelments sinn nau gewehnlich in guude Umschtaende. Ihre Kerche un Lehranschtalte sinn so guud wie die vun annere Leit.
Die Pennsylvaanisch-Deitsche sinn gemietlich un gastfreindlich, un sinn immer aagesehne warre fer vordreffliche Birger.

Ass die Pennsylvaanisch-Deitsche gemietlich un gastfreindlich sinn, hemmer aa schunt ausg'funne, un mer sinn froh fer sell.

Sell schreibt der
Michel aus'm alte Land

Beitrag erstellt 20:45 |
Link

8.4.05

1.4.05
'S KATZ DEITSCH SCHTICK

Dihr liewie Leit,

'S Friehyaahr iss kumme im alte Land, un mer sinn all froh fer sell. Die Blumme sinn am bliehe, un die Beem warre widder grie. Awwer wann ich die Fenschter beguck un die Schtuwwe vun unser Heisli, sehn ich, ass alles mol widder gebutzt sei sett. Oh, was en Yammer. Was kammer duh? So warre mer am neegschte Wochend mol draa geh un alles widder sauwer gricke. Der Daniel Miller (1843-1913) hot Yaahre zerick en wunnerbaar G'schicht g'schriwwe iwwer's butze im Friehyaahr. Do iss sie:

Hausbutze

"Schier alles hot zwee Seite - en aagenehme un en unangenehme. In dere Welt iss alles darichnanner gemixt. 'S Guude iss net all uff eem Haufe, un's Schlecht aa net.
Ich bin als froh, wann der lang un kalt Winter vorbei iss, wann's Friehyaahr kummt, wann die Kaschebeem bliehe un die Veggel singe. Awwer dann kummt aa ebbes, was die Blessier widder en wennich verdarebt - 's Hausbutze. Sell kummt alle Friehyaahr so regler wie der Kalenner prophezeit. Ich deet net viel drum gewwe, wann ich net helfe misst. Awwer ich muss meiner Fraa helfe Hausbutze, un sell iss graad, wu der Haas im Peffer hockt. Es iss aa gaar kenn Ausweiche.
Ich hab schun alles browiert. Haus muss gebutze warre. Alles watt dreckich un schtaabich, un do muss gebutzt warre. Ich schun oft gewunnert, ferwas der Druck un Schtaab iss. Un der Schtaab kummt aa iwwerall hie, es macht nix aus, wie mer alles verwahrt. Er kummt in alle Schaenk, Schublade un Kischte. Ya, der Schtaab iss schlimmer wie die Dieb. Ich kann die Dieb aus meiner Safe halte, awwer der Schtaab schur net.
Well, es muss Haus gebutzt warre, ob mer's gleicht odder net. Un wie g'schwinder un frischer mer draa geht, desto besser. Do gelt's Schprichwatt: "Frisch gewagt iss halwer gewunne." Der Kaerpet muss uffgenumme, gekloppt un widder nunnergelegt warre. Sell kann mer als noch schtaende, awwer's schlimmscht kummt naachderhand - die gleene Taecks neischlaage. Ich deet gleiche zu wisse, wer sell duh kann, ohne sich en paar Dutzend mol uff die Finger zu kloppe. Do watt dem beschte Mann sei Geduld uff die Prob geduh. Wer net bei dere Arewet flucht, den deet der Deiwel yuscht so guud geh losse. Des Fluche iss awwer en Sind. Ich fluch net, awwer - well, ich will nix saage.
Dann muss der Schtubbeoffe runner genumme, geblaeckt un uff die Seit g'schtellt warre. Allerscht fallt's Rohr ausenanner, un der Ruuss vum ganze Winter watt uff'm Bodder rumgeschtreet. Sell bringt widder die alt Adam's Naduur ziemlich neegscht owwedruff, un es verdarebt all die Blessier vum Offeblaecke. Im Harebscht muss der Offe widder uffg'schtellt warre, un do will's Rohr nargets zamme fitte. Un wie meener ich draa klopp un zimmer, desto wennicher will's fitte. Sell iss en neie Versuchung, sich kraeftich auszudricke.
Un alesmol geht darich der Summer en Schtick Rohr verlore, dernoh iss der Henker widder los. Wann mer ment, es waer endlich alles recht un guud, do schmokt der Offe, dass mer schier verschtickt. Endlich findt mer aus, dass 's Rohr zu weit in der Schannschtee neig'schteckt warre iss, so dass der Schmok kenn Chance hot nauszugeh. Wann endlich alles gefixt iss, fint mer aus, dass die alt Graet verbroche iss, un's Feier fallt all unne naus. Nau muss mer an die Offe Foundry geh fer en neie Graet, un do findt mer, dass sie kenne uff Hand henn un selle Satt Effe nimmi mache. Nau iss 's Elend greesser wie emol. Die Offegiesser sinn aa g'scheite Leit. Sie wexle die Faeschens vun Effe, wie die Weibsleit ihre Haets un Dresses. Sell macht meener Bisniss. Verleicht iss mer glicklich un kann en neie Graet gegosse gricke, odder es koscht en nier Offe.
Es nemmt en ganzer Daag fer die Rumpelkammer zu butze. Die Schtubb iss voll alt G'fraess, wu kenn drei Cent wert iss, awwer alles muss zweemol im Yaahr gebutzt un guud uffg'howe warre, yuscht weil mei Fraa die Sache vun heem grickt hot. Die alt Wieg, wu mer schun 20 Yaahr nimmie geyuust henn, en alte Backmuhl, en Backoffeschiesser, en Schpinnrad, en Haschpel, en gleener Webschtuhl fer Schtrumpbennel zu weewe, en Chapper Maschin, en Werscht Maschin, drei verbrochene Schockelschtiehl und viel annere Artikel zu viel zu menschene. Ich hab des verschinnert Schtofft schun about fuffzeh mol gebutzt. Ich deet es gern alles uff der Holzblatz schneisse un verhacke, awwer mei Fraa hot's vun heem grickt, un es muss guud uffg'howe warre.
Es nemmt aa about en Daag fer's blechig G'scharr zu butze. Alles muss g'fegt warre, bis es scheint wie Silwer. Do iss en alte Giesskann, die hot siwwezeh Lecher, awwer mei Fraa hot sie vun heem grickt, un sie muss guud in Ehre g'halte warre. Do iss en alt Bloshann, des iss alles verroscht. Ich hab's schun oft wegschmeisse welle, awwer allemol saagt mei Fraa: "Sell hawwich vun heem grickt", un sell settelt die Sach. Un do iss en Buschel Korb voll alte Kaffeekessel, Panne Paettepaens un so G'fraes, wu gaar nix wert iss, awwer mei Fraa hot's vun heem grickt. Un so geht's fatt, bis mer winscht, der Bettel haet's all, des alt Schtofft.
Endlich kumme mer an der Keller. Die Esch muss naus, all des alt Schtofft muss gebutzt warre un die Waend misse geweisselt warre. Do iss aa en Haufe alt Schtofft, wu mer net in zehe Yaahr geyuust henn un aa sei Lebdaag nimmi yuuse, awwer mei Fraa hot's vun heem grickt. Do iss en groosser Bauchzuwwer, en latt annere Ziwwer, wu kenn Wasser meh halte, drei odder vier Sauerkrautschtenner, zwee ausgewohrene Waeschmaschine, drei Quiltframes, zwee eisene Seefkessel, wu groosse Schrping henn un kenn Wasser halte, un wer weess was alles. Des Schtofft deet guud Feierholz gewwe, un fer's alt Eise kennt mer en bissel ebbes gricke, awwer allemol heesst es: "Sell hawwich vun heem grict." Ich hab alsemol schun so heemlicherweis zu mir selwer g'winscht, mei Fraa waer aa noch deheem, awwer saage daref ich nix.
Des Hausbutze iss hatte Arewet, un debei grickt mer schwache Koscht, schier lauter uffgewaermte Schtumpe. Mei Fraa saagt, sie haett kenn Zeit, beim Hausbutze guud zu koche. Awwer alles hot en end, so aa des Hausbutze.
Ich dreescht mich als mit dem Gedanke, dass es im Himmel kenn Hausbutze gebt. Datt bleibt alles ewich sauwer. Die Schtroosse sinn mit Gold geplaeschtert, un vun Kohleschtaab weess mer datt nix. Wie ich verschteh, iss all der Schmok am 'me annere Blatz. Vun eem Ding bin ich schur - wann ich mei Lebdaag widder heier, dann nemm ich en Meedel, wu net so viel Sach vun heem grickt. Es waer am beschte, wann sie net so viel Sach un recht viel Geld vun heem gricke deet."

Was bin ich froh, ass mer heit im 21. Yaahrhunnert lewe. Ich denk, die Arewet iss nimmie so hatt wie sie als waar Yaahre zerick.

Sell schreibt der
Michel aus'm alte Land


Beitrag erstellt 19:55 |
Link

23.3.05

15.3.05
'S KATZ DEITSCH SCHTICK

Dihr liewi Leit,

Unser katz deitsch Schtick iss heit verleicht en wennich laenger. Der W. J. Hoffman hot g'schwetzt an en Versammling am End vum 19. Yaahrhunnert iwwer's "Brauche", un sell iss, was er g'saat hot:

Vum Brauche

Eens vun de karyoschde Sache, ass mer alleweil noch find, iss der Weg, wie deel vun denne Brauchdoktre duhne.
Eener, ass ich schun viel Yaahr kenn, iss ganz hendich am Rasselschlange fange. Des duht er mit eme seidene Schnuppduch, ass er gege die Schlang hebt. Die Zehn in de Rasselschlang sinn wennich zerickgeboge, so wann sie sich in die Heh schtreckt, ‘s Schnuppduch zu beisse, henke die Zehn fescht wie Hoke; sellerweg duht der Doktor die Schlang noh in die Heh hewe, so ass er mit der annere Hand sie hinne am Kopp nemmt. No warre die Zehn rausgeroppt, ass sie en net beisse kann.
Deel saage, ass mer en Schlang fange kennt un ass sie ehm aa net beisse kennt, wammer die Wadde saagt: "Wie Moses die Schlang in der Wilderness in die Heh g’howe hot, so heb ich dich uff. Im Naame dem Vadder, Sohn un Heilich Geischt sollscht du kenn Gewalt hawwe mich zu beisse." Dennoh kammer die Schlang unne G’fahr uffhewe.
Wann awwer die Schlang eens beisst, no watt en Mittel gebraucht, ass die Leit iwwerall saage, deet niemols fehle. Der eenzichscht Weg auszufinne, eb’s guud iss odder net, iss fer ebber, ’s Schtofft regelmaessich zu brauche, wie’s gebraucht sei sott. Des iss en Blanz, ass sie Meeschterwatzel heesse. Der recht Name iss Sanicula marylandica L.
Wennich vun der Watzel watt verkloppt un in Millich gekocht, un no gedrunke; die seem Zeit watt aa vun der verkloppte Watzel in Wasser g’sockt un uff die Wund gelegt.
Deel vun de alte awwerglaawiche Leit saage, mer sott en Hinkel in der Mitt darichschneide, un een Helft uff en Schlangebiss lege; des, saage sie, ziehgt’s Gift aus der Wund, so ass es Hinkel ganz grie watt. Annere saage, ass mer ‘me Hinkel sei Batzel uff die Wund lege sott, un ass es Gift so raugezogge watt.
Der alt Dokter saagt aa, ass er die Rasselschlangezehn verkaafe deet zu de yunge Maenner, solche wu die Meed sie liewe mache wodde. Der Kall, ass en Meedel liebt, ass net viel vun ihm denkt, duht die Schlangezehn in sein Hensching, un wann’s Meedel no sein Hand nemmt, kann sie sich nimmie helfe; sie muss’n liewe, eb sie will odder net.
Wann en Rasselschlang abgezogge iss, henke sie sie uff in die Sunn, so ass ‘s Eel odder Fett abdroppst. Des watt no gebraucht fer in die Ohre zu droppse, wammer hattheerich watt.
Schlangebiss warre aa verschiedene Wege gecured in verschiedene Bletz. Deel Leit verschtampe ‘n Zwiwwel un mixe ‘s uff mit Salz, un lege ‘s Blaschter uff die Wund.
In Lechaw Kaundi henn sie als schwatzi Schlangewatzel feingemasht un in Wasser gekocht, un derno devun innerlich gewwe un uff die Wund gelegt. Die seem Zeit hot des, was gebraucht hot, die Wadde g’schproche:
"Gott hot alles erschaffe, un alles waar guud / Als du allee, Schlang, bischt verflucht. / Verflucht sollscht du sei un dei Gift. / Tsing, tsing, tsing."
Yedermol, ass es Watt "tsing" ausg’schproche waar, hot der Breicher mit em Finger en Kreiz iwwer die Wund gemacht. Des Watt scheint, ass wann es vum Watt "zingele" herschtamme deet; awwer do kammer net schur sei, net meh ass in der Braucheglaawe selwer. (...)
Wammer die Rassel vun ‘ere Schlang in e glee Seckliche bind un am e Kind sei Hals henkt, grickt’s kenn Gischtre, wann’s zahnt.
Wann die Rassel im Hut gedrage watt, grickt mer kenn Koppweh. Lange Zeite zerick henn sie als Haut vun eeniche Sadde Schlange um den Aarem gebunne fer Rummatis zu verhiede (...).
Fer Schtich vun Weschpe, Hannesel, Hummle un Ieme henn deel Leit als nasser Lehme uff die Wund g’legt. Annere henn en schtick Silwer uff die Schtich g’howe. Deel henn g’saagt, sie kennte Weschpe banne, un ‘s Saage defor waer:
"Weschpli, Weschpli, schtech mich nicht, bis der Deiwel die Sege schpricht."

Iss sell net ebbes? Eb ich heit schtopp, muss ich noch verzehle, ass der Frank Kessler un ich naach Pennsylvaani kumme welle in Oktower. Mer fliege naach Philadelphia am 22. Oktower un widder zerick in's alte Land am 5. November. Mer hoffe, ass mer en latt vun unser gudi Freind sehne kenne. Ich guck vaschich zu sell.

Sell schreibt der Michel aus'm alte Land,
ass wunnerbaar froh iss, ass er ball mol widder in PA iss.

Beitrag erstellt 20:44 |
Link

8.3.05

4.3.05

1.3.05
'S KATZ DEITSCH SCHTICK

Dihr liewe Leit,

Der Bischli-Gnippli hot en Briefli grickt paar Woche zerick mit en wunnerbaar Gedicht, ass g'schriwwe waar bei en Kall mit Name Clarence Miller vun Medford (WI), un hot's gedruckt in die "Ephrata Shopping News". Mer sinn wunnerbaar froh fer sell, weil mer henn bis heit nie nix g'heert g'hatt vum Clarence Miller. So hemmer g'lannt, ass 's aa in Wisconsin noch deitsche Schreiwer gebt:

Das Gwilderei

Die Mary is en gudi Fraa,
Des will ich am erschde saage.
Sie dutt net gehe un Geld verblose
Odder uff der Weg rumyaage.

Sie butzt des Haus un wescht die Gleeder
Drei- odder viermol die Woch
Un all die Nochberschaft iss gewiss
Sie iss en gudi Koch.

Awwer wann der Winderkalt mol kummt
Un Schnee dattdraus rumblost,
No kummt en fremdi Nadur in sie -
Ich wees net, was iss los.

Zum erscht muss alles aus die Schtubb,
En holzich G'schtell kummt rei.
No watt en Gwillt datt fescht geschpellt:
Er guckt so frech un frei.

Der Gwillt, es iss so gross un lang -
Die Schtubb is yo ganz voll.
'S iss schier kenn Blatz fer newe deich -
Verleicht en Vaddelzoll.

Sie heesst die Nochbersweibsleit all,
Die Betz un die Matilda,
Un alles schunscht watt z'rickgepuscht:
Sie hocke datt un gwilde.

Sie schwetze datt vun all Geschicht
Ass mer sei Lewe denke daet.
Sie gehe datt deich vun Adams Geschicht
bis 1988.

Des Nochberskindli graddelt datt;
Es hot die Hosse g'fillt.
Die Weibsleit henn’s noch net vermerkt,
Sie hocke datt am Gwillt.

Die Supp hot paarmol iwwergekocht
Un die ganz Kich gefillt.
Die Weibsleit henn’s noch net vernumme:
Sie bleiwe uscht am Gwillt.

Der Gwillt watt endlich faddich gemacht
Un alles weck geduh.
No geht mer frehlich in das Bett -
Mer grickt mol endlich Ruh.

Der naegscht Owed kummt mer widder heem -
Mer hockt uscht hie un brillt,
Weil es erscht Ding, ass mer sehnt
Datt drin iss noch en grosser Gwillt.

Un so geht’s aan der Winder lang,
Bis ihre Finger geschwellt.
No all uff eemol is es verbei -
Mir misse in der Gaarde.

Der ganz Summer henn mir’s schee,
'S iss alles z'rick im Blatz -
No geht das Lewe widder gut -
Ich hab widder en Fraa.

Awwer wann der Winder widder kummt
Un die Daage warre katz,
No kummt sell Ding widder uff:
Der yaehrlich Gwildesschmatz.

Bei uns im alte Land leit noch en latt Schnee - un ich kann sell neegscht nimmie schtaende.
So welle mer hoffe, ass 's Friehyaar ball kummt.

Sell schreibt der
Michel aus'm alte Land

Beitrag erstellt 20:56 |
Link

24.2.05

15.2.05
'S KATZ DEITSCH SCHTICK

Dihr liewe Leit,
der Prof. C. Richard Beam ("S Bischli Gnippli") hot sich heit, am 15. Hanning, geyaahrt zum 80. mol. Mer winsche ihm en hallicher Gebottsdaag un drucke ebbes, ass er yuscht katzlich in die Zeiding "Ephrata Shopping News" gepublisht hot. 'S iss en Gedicht, ass g'schriwwe waar beim Harvey M. Miller (1871-1939). Dem Kall sei Feddername waar "Solly Hulsbuck".

Der Febiwerry

Ich hab kenn diefe Lanning grickt;
Es waar als net die Ruhl.
Fer meh as zwee, drei Munet
‘Weck fuhle in de Schul.
Des Schtuddia dutt uff’s Hann so schaffe,
Un’s dutt em oftmols Koppweh mache,
Doch meind ich heit noch paar so Sache,
Un rode Naase uff de Maed, im Febiwerry.
Awwer wann der Dax ken Schadde macht im Febiwerry;
Dann hockt er uff der Fens un lacht im Febiwerry;
Un sell’s en Sign as zimmlich glei
Kummt Friehyaahr un die Veggel bei,
Un’s Glucke setze geht mit nei, im Febiwerry.
Der alt Abe Lincoln waar gebore im Febiwerry;
Zurick en hunnert un so Yaahre, im Febiwerry;
Er waar en grosser Bressident,
Un’s Lanne waar sei Element,
Un Welt-weis is er nau erkennt, im Febiwerry.
En aarmer Kall waar er gewiss, im Febiwerry;
Gebore in de Wilderniss, im Febiwerry;
Fer’n Figger mache in de Welt,
Datt hot er gfiggert un aa gschpellt,
Beim Feierhard darich alle Kelt, im Febiwerry.
Der Wallentein waar aa gebore im Febiwerry;
Mer kaaft sie nau an all de Schtore, im Febiwerry; D
ie scheene sinn fer Tschendelleit,
Die wieschde schicke sie fer Schpeit,
Awwer sell is harli recht poleit, im Febiwerry.
Ich hab am Schtor so’n Pickter grickt, im Febiwerry.
Un hab’s bei Mehl de Polly gschickt, im Febiwerry;
Un des is ehrlich nunner waahr,
Sie henn neegscht Daag mei Haut un Haar
Beim Buschel g'funne uff em Floor, im Febiwerry.
Der Washington waar aa en Kind vun Febiwerry,
Er hot der John Bull wiescht verschind im Febiwerry;
Des waar der erscht Mann in dem Land ass net gelore hott, sell’s bekannt,
Un aa der letscht, denk ich b’gum, im Febiwerry.
Mei Lanning langt net weider naus, ass Febiwerry;
Awwer nemm der Jorch un Lincoln raus, vum Febiwerry;
Was waer dann unser Hist’ry nau,
Was daet mer, saag mir, ennihau,
Unne Wallentein un die alt Grundsau, im Febiwerry.

Ich saag: Was daete mer mitaus unser guuder Freind Dick Beam in der Millerschtadt. So warefe mer unser deitschi Schtrohiet in die Heh un winsche ihm G'sundheet un en langes Lewe.

Sell schreibt
der Michel aus'm alte Land.

Beitrag erstellt 08:16 |
Link

7.2.05

2.2.05

23.1.05
PENNSYLVAANISCH-DEITSCHER NEIYAAHRSWINSCH 2005



"Ich winsche dihr un deinra Hausfraa,
Sohnie, Techder, Gnechder, Mechder,
al in dieses Haus,
ein Glickliches Nei Yaahr"

(G'schickt beim Peter Fritsch, Alburtis) Posted by Hello

Beitrag erstellt 15:18 | Link

16.1.05
'S KATZ DEITSCH SCHTICK

Dihr liewe Leit,

Mer henn neegscht noch kenn Schnee g'hatt im alte Land - yuscht in die Baryie. Die uffg'waxne Leit gleiche sell, weil noht kenne sie schtaricker faahre mit ihre Machine uff'm Highway. Die Kinner gleiche sell net. Bei uns deheem schteht der Schlidder vaschich der Deer un waart druff, ass mei zwee Meedlin in mol fattnemme fer en wennich G'schpass hawwe. Mol sehne, eb sell noch schafft. Heit drucke mer en Schtori, ass der Enos D. Stutzman (London, OH) g'schriwwe hot Yaahre zerick:

Schlidde fahre

Z’rick in 1960 hawwich mei Fraa Mary aus die Hiwwele vun Holmes County, Ohio, g’holt, un hab sie runnergebrocht zu Plain City, Ohio, wu alles schee un eewe iss. Awwer wu der Winder kumme iss, no hot sie Zeitlang grickt fer Schlidde fahre. Mir henn wohl kenn Hiwwele do in die Gegend, so hawwich mol gedenkt, was ich duh kennt fer sie helfe, ihre Zeitlang ausdreiwe. Zuerscht hawwich mol en Schlidde grickt un hab sie der Weg nunnerg’schowe. Sell hot g’holfe, awwer es hot mich ganz unverschtendich mied g’macht.
Ich hab en schoogli driwwer gedenkt, un no hawwich en Schtrick grickt un hab der Schlidde hinnich die Maschien gebunne. Des waar besser; es hot mich net so mied g’macht fer die Maschien fahre. Awwer es waar wunnerbaar blotzich fer mei Fraa uff’em Schlidde.
Ich hab widder driwwer gedenkt, un no hawwich der Schtrick g’numme un hab der Schlidde owwe uff die Maschien gebunne. Sell waar net neegscht so blotzich. Awwer der kalt Wind hot die Fraa ihre Naas schier gar abg’frore. Ich hab widder iwwer die Sach gedenkt. Endlich hawwich der Schlidde in die Maschien neigeduh. No hot sie ihre Naas waerm halde kenne. Awwer der Schlidde hot so viel Blatz uff-g’numme, ass es ‘s menscht vun’em G’schpass raus-g’numme hot.
Ich hab die Sach lang bedenkt. Endlich hawwich ausg’macht, ass mir kennde der Schlidde raus duh un viel meh Blatz hawwe. Sell hot’s bescht g’schafft vun alles, ass mir noch gebrowiert g’hatt henn. Ich watt net mied; es iss net blotzich; die Fraa ihre Naas bleibt warm, un mir henn viel Blatz. Mei Fraa hot schun lang nimmie Zeitlang grickt, un mir duhn viel Schlidde fahre.
Was macht der Winter im neie Land. Losst mich sell wisse un schreibt en E-Poscht an:
michael-werner@t-online.de.

Macht's guud
Michel Werner

Beitrag erstellt 19:27 | Link

8.1.05

1.1.05

22.12.04
EN HALLICHER GRISCHTDAAG 2004


winscht alliebber im alte un im neie Land
der Michael Werner. Posted by Hello

Beitrag erstellt 10:13 | Link

15.12.04
'S KATZ DEITSCH SCHTICK

Dihr liewe Leit,
Grischtdaag iss ball do - so wann dihr noch en Bressend kaafe misst, macht nau dabber anne. 'S nemmt nimmie lang, un mer hocke widder zamme unnich em Grischtbaam un singe alde Lieder. 'S iss aa schun aardlich kalt alleweil bei uns im alte Land. Sell gemahnt mich an en alt Gedicht, ass der John Birmelin (1873-1950) g'schriwwe hot Yaahre zerick:

Der Winder

'S iss ewwe widder Winder!
Un niemand weess es g'schwinder
Ass wie die alde Leit;
Ya, drauss iss alles eisich,
Der Wind iss kalt un beissich,
Gewiss en beesi Zeit.

Im Kalte rum schpaziere,
Die Gnoche ganz verfriere?
Do schnaddere ehm die Zeeh.
Im Schnee do rum zu schlappe
Un noch uff's Eis zu dappe?
Verbrecht am End en Bee.

Der Offe uffzuhitze
Un datt dehinner sitze,
Sell kann gemietlich sei!
Der Wind iss drauss am Heile,
Der maag sich yuscht verweile,
Er yohlt un kann net rei.

'S iss alles schtill im Heisel,
Es gnaewwert kaum en Meisel,
Die Bussi hockt un schpinnt.
Un drauss iss Schneegekissel,
Am Fenschter heert mer's bissel,
So leicht gebletscht vum Wind.

Die Mammi iss am Schtricke,
Verleicht am Gleeder flicke,
Die Finger sinn 're schteif.
Der Daadi iss am Lese,
Er waermt vergniecht die Heese
Un schmokt sei aldi Peif.

Verleicht gebt's noch en wennich Schnee in die neegschte Daage. Unser zwee Meedlin, Marlene un Pauline, gucke vaschich zu sell. Der Schlidde schteht schun draus - mer welle mol sehne, eb sell schafft, ass sie noch im alte Yaahr en wennich fahre kenne der Hiwwel nunner.

Sell schreibt
der "Michel aus'm alte Land"


Beitrag erstellt 21:32 |
Link

8.12.04

1.12.04
'S KATZ DEITSCH SCHTICK

Dihr liewe Leit,
Disember iss do, un nau nemmt's nimmie lang, un's iss Grischtdaag. Un fer sell welle mer heit en Pennsylvaanisch-Deitsch Recipe drucke vun en Old Order Mennonite Fraa vun Ontario. Ihr Naame iss Nancy Martin, un sie verzehlt uns, wie mer "Lebkuche" backt:

Lebkuche (En Grischtdaag Recipe)

Was mer braucht: Zwee Oier, zwee Kopplin voll Molassich, ee Koppli voll braune Zucker, ee Koppli voll saure Raahm, ee Koppl voll Hasselniss in Schticke, ee Koppli voll gedatte Zitrone, ee Koppli voll anner gedatt Obscht, ee Teeleffli voll g'mahle Gewatzneggeli, ee Teeleffli voll Zimatt, ee Teeleffli voll Aniseed, ee Teeleffli voll Sody, ee halb Teeleffli voll Nutmeg, siwwe Kopplin Mehl, ee Teeleffli voll Salz.

Wie mer schafft: Duh alles zammeriehre, ss wie net es Mehl. Mach der Deeg e wennich waarm, awwer net hees, in e Schissel iwwer heess Wasser uff em Offe. Duh es riehre die ganz Zeit. Noht duh es Mehl neiriehre un duh der Deeg in en kalte Blatz fer zwee Daag. Noht mach es in vier Schticke un duh sie eens uff emol in en langliche Rolle mache. Wickel sie in Waxbabier un duh sie in en kalte Blatz, bis sie schteif sinn. Noht duh sie abschneide mit 'eme scharf Messer so um en ¼ Zoll dick. Duh sie uff e gschmutzte Kuchepann un schmier e wennich Oiweiss un Wasser uff yedes un e halwe Nuss (Note: In Deitsch "schmutzich" means "oily", not "dirty"). Back sie fer ungefehr 10 minutes an 350 degrees F. Die Kuche sinn erscht hatt, noht warre sie besser, wann sie e Weil in e Bax waare un alles ziehgt darich.

Ich bin schur, ass sell guud schmackt. Mer welle sell mol browiere backe - verleicht neegscht Wochend.

Macht's guud
Der Michel aus'm alte Land



Beitrag erstellt 22:51 |
Link

23.11.04
PENNSYLVAANISCH-DEITSCHER ESSBLATZ



Deel Essbletz in Pennsylvaani henn noch (odder widder nei?) deitsche Naame. En guud Beischpiel fer ebbes wie sell iss 's "Kumm Esse Diner" yuscht neegscht zu Myerstown. Mer kann ferschur en guud Iems hawwe an sellem Blatz. Der Frank Kessler un ich, mer henn sell browiert wie mer's letscht mol im neie Land waare. So kenne mer yuscht saage: Guckt yuscht mol rei! Posted by Hello

Beitrag erstellt 20:34 | Link

16.11.04

10.11.04
EBBES AUS'M ALTE LAND


Der Dr. Wolfgang Ohler vun Zweibrücken (Palatinate) hot der "Bockenheimer Mundartdichter-Wettstreit" g'wunne in Oktower 2004 mit seim Poem"Arkadasim (Schappo-Blues)". Posted by Hello

Beitrag erstellt 20:59 | Link

8.11.04

1.11.04
'S KATZ DEITSCH SCHTICK

Dihr liewe Leit,

Heit hemmer Nov. 1, un an sellem Daag watt im alte Land net g'schafft. 'S hot net gereggert, awwer 's Wedder iss doch aardlich drieb. So hemmer Zeit g'hatt fer wennich ebbes schpiele mit die Kinner im Haus. Un sell waar aa en Freed.

Mer welle en Gedicht drucke, ass der Isaac Horst vun Mount Forest (Ontario, Canada) g'schriwwe hot en Weil zerick. Der "Isaak vun Barickwald" iss en Old Order Mennonite un verzehlt, was am aageh waar bei die Horst Familie frieh am Maryie, wie er noch en gleener Bu waar.

Wann's Zeit iss fer uffschteh

Die Amschel iss am singe in’em alde Abbelbaam,
Mer heert en Hahne grehe,
awwer’s laut yuscht wie en Draam.
Es kummt en wennich Helling an dem gleene Fenschder rei,
Yuscht ich bin net recht wacker un ich schlof ball widder ei.
Yetz iss der Daed am bischb’re in der Kammer unnich mir;
Die Sunn biepst schun en wennich -
ya, un yetz rabbelt Babier;
Der Offedeckel glebbert un die Schpeicher-Deer geht uff:
Noht ruft der Daet, “Kumm, Buwe, Meed,
s’iss Mariye, schtehet uff!”
Ich bin noch net recht wacker, un es iss mir noch zu frieh,
Yuscht ich heer der Saem rufe, “Hier Sport,
geh, hol die Kieh!”
Ich will net viel faulenze, will yuscht noch en wennich ruh;
Mei Aage-Deckel sinn noch schwer un falle widder zu.
‘S neegscht Ding, was ich vermarrick,
sinn Mannsleit in der Kich;
Iss waricklich schun g’molke? Dann besser schick ich mich!
Ich schtreck mich mol en wennich
un schperr’s Maul uff dabei
Ich dreh mich nochmol rum im Bett -
dann schlof ich widder ei.
Yuscht net fer lang. Was heer ich yetz?
Die Schpeicher-Deer geht uff:
Die Maem ruft nuff: “Kummscht net ball, Kind?
Du bischt schun sex Yaahr alt.
Bischt grank, Bu, adder was iss letz?
Dei Oi watt yo ganz kalt!”
Un noht der Daed: “Wann’d net ball kummscht,
NOHT KUMM ICH MOL DATT NUFF!”
Yetz bin ich wacker, ganz un gaar, un fiehl aa ganz alreid.
Ich graeb mei Hosse g’schwind un schpring - ich weess,
‘s iss yetz die Zeit.

Mer winsche alliebber en hallicher November un hoffe, ass sell Election maryie besser schafft wie selle vier Yaahr zerick - so ass mer ball wisse, wer der neegscht President vun die "Schteets" iss. Macht's guud.

Sell schreibt der Michel aus'm alte Land.



Beitrag erstellt 16:35 |
Link

23.10.04

17.10.04
'S KATZ DEITSCH SCHTICK

Dihr liewe Leit hiwwe wie driwwe,

am Wochend hemmer in die Pfalz der "52. Mudderschprooch-Schreiwer-Contest" in Bockenheim g'hatt. Sell waar ebbes Abbadiches. 'S waare verleicht 300 Leit datt, un 10 Leit henn ihr Gedichte gelese. G'wunne hot am End der Dr. Wolfgang Ohler. Was er g'schriwwe hot, drucke mir in unser neegscht Ausgab vun "Hiwwe wie Driwwe".

In Bockenheim debei waar aa der Butch Reigart vun Yarick Kaundi, un mer henn schee g'schwetzt minanner in die Dialect.

Heit welle mer en Parre Schtori drucke, ass der Don Breininger vun New Tripoli (PA) verzehlt hot en Weil zerick.

Parre Schtori

Die Familie hot der Parre eigelaade fer mit heem Sunndaags naach die Karich fer es Mittags-Iems.
Wie sie am Disch g’hockt henn un schun guud gesse g’hatt henn, iss es Fleeschdeller widder rumkumme mit zwee Schticker Wascht druff, en grooss Schtick un en ganz glee Schtick.
Der glee Willi, wu neewich em Parre g’hockt hot, hot sei Gawwel genumme, hot sie ganz g’schwind ins grooss Schtick Wascht g’schteckt un die Wascht uff sei eegner Deller.
Der Parre hot des katz aageguckt un hot gedenkt, des waer awwer en guud Umschtand fer en gleener Bu ebbes lanne.
Saagt der Parre: “Nau Willie, denkscht du, ass sell es recht Ding waar fer es grooss Schtick Wascht vum Deller nemme inschtatts es glee, wie der Deller es erscht zu dir kumme iss?”
Der Willie hot der Parre aageguckt: “Parre,” hot er g’saagt, “wann der Deller es erscht zu dir kumme waer, well Schtick Wascht hettscht du genumme?”
“Ei,” saagt der Parre, “ich hett ferschur es glee Schtick genumme.”
“Well,” saagt der glee Willie, “ich weess net, fer was ass du nau so en grooss Wese am mache bischt dewehe - es glee Schtick Wascht iss doch noch datt.”

Ya, die Kinner saage immer yuscht, was sie denke.

Sell schreibt
der Michel aus'm alte Land






Beitrag erstellt 10:07 |
Link

7.10.04

1.10.04

24.9.04

15.9.04
'S KATZ DEITSCH SCHTICK

Dihr liewe Leit,

heit welle mer en Gedicht drucke, ass der Enos Stutzman aus London (OH) g'schriwwe hot. 'S heesst:

'S iss en Newwel uff'm Hiwwel

'S iss en Newwel uff em Hiwwel,
wu die Hollerbeere schtehn,
un die erschte Sunneschtraahle
scheine riwwer uff die Leen.
All die Veggel sinn am singe
in die Summermaryieschtund,
Un ich heer die Gautzerei
vun die Nochbere ihre Hund.
Es Graas iss schwer mit Dau demaryie,
ya, die ganz Erd iss befeicht,
Un die Fischschwaerm sinn am graddle
hin un her uff ihre Beich.
Owwe uff em Schtubbeschonschter
hockt en Schpottvoggel so schee,
Un er singt en Voggelloblied
un halt Zeit mit sei links Beh.
Rot un purple sinn die Wolke,
wie die Sunn nau heller scheint;
Yunge Haase sinn am huppse;
Haaseglee uff ihre Meind.
Hawwergees un Summervegglin
sinn am danze uff 'em Wind;
Un en dicke, braune Grundsau
fresst Blohgraas mit ihre Kind.
Martins, Amschle, Schpatze, Dauwe
fliege fleissich darich der Hof,
Weil die Mehrheit vun die Mensche
liege noch so faul im Schloof.
En fett glee Fensemeisli graddelt
unne aus 'em Block;
Mit Dau wescht sie ihre G'sichtli
wie sie sich datt annehockt.

Vun der Poschte zu die Bordfens
iss en daag-alt Schpinnenescht,
Un vun eenem Eck zum annre
sinn die gleene Droppe fescht.
Darich die Helling duhn sie glitzre
wie die Himmelsschtanne duhn;
Nau, datt kummt die Schpinn zu graddle,
un sie hockt sich in die Sunn.
Datt im Busch dann sehn ich ebbes
aus 'em Eck vun meinem Aag;
'S iss en Hasch mit glenne Zwilling;
gehn uff ihre Maryie-Walk.
Alles iss so schee demaryie,
iwwerall do um uns her;
'S iss die Schaffeheit vum Herrgott,
un mir gewwe Ihm die Ehr.
Er hot alles so erschaffe,
ass mir sehne um uns rum.
Wer des sehnt un net an Gott glaabt,
iss ganz unvergleichlich dumm.
Es iss so en scheener Maryie;
alles iss so frisch un nei,
Mit der Newwel uff 'em Hiwwel,
un des annre all dabei.

Ball kummt der Harebscht, un der Newwel iss widder um die Hiwwel un im Daal. Mer welle hoffe, ass er net zu nass watt un mer noch deel scheene Daage henn.

Sell schreibt der
Michel aus'm alte Land


Beitrag erstellt 22:17 |
Link

9.9.04

2.9.04
'S KATZ DEITSCH SCHTICK

Dihr liewe Leit,

Der Summer iss neegscht verbei nau, un's kummt, was mir im alte Land der "Altweiwersummer" heesse. Die Nachte sinn schun aardlich kalt, awwer in die Middagszeit hocke die alte Weiwer gern ums Haus rum in die Sunn, weil'n noch waarm iss.

In seller Zeit gebt's aa die meenschte Schpinne, Micke un annere gleene Gediere im Haus. Do kennt dihr lese, was der Ralph Funk (1889-1969) g'schriwwe hot iwwer Micke Yaahre zerick.

Micke

Vun all dem Ungeziffer wiescht,
Wu rum iss in der Welt,
Die Micke sin zu mir es schlimmscht,
Vun Friehyaahr bis die Kelt.

Was badde Micke ennihau?
Duhn ehm yuscht driwweliere;
Sie graddle yuscht in allem rum
Fer ehm Geduld browiere.

Nau schlaag sien wann sie uff dich setzt,
Noh dreffscht dich selwer schtatts;
Un machscht du endlich eeni doot,
Gebt's sexe in ihr Blatz.

Sie fliege in die Ohr un Naas,
Die Aage un ins Maul;
Laafe iwwer dei Blottkopp naus,
Muscht wehre wie en Gaul.

Sie falle in die Riwwelsupp,
Ins Sauergraut un Schpeck;
Vun eeniches vum Esse rum,
Do bleiwe sie net weck.

Nau finnt en Mann en Mick im Bier,
Er schmeisst sie raus un lacht;
Sie hot, iss sie verseeft im Schaum,
Seim Dascht nix ausgemacht.

Loss awwer'n Mick im Kaffi sei,
Noh gebt's en grossi Zucht;
Es iss en "caution"' hol's die Grenk,
Wie er die Mick verflucht.

Die Micke Gschicht iss mir en Greiz,
Bin froh wann's iss verbei;
Was batt's - 's iss yuscht en katzi Weil
Bis Zeit sie rum zu sei.

Oh, alleweil hockt mer en Mick uff'm Waddefresser. Ich denk, ich muss ihr naachgeh nau.
Bis zum neegscht mol ..

Sell schreibt der
Michel aus'm alte Land




Beitrag erstellt 08:02 |
Link

'S KATZ DEITSCH SCHTICK

Dihr liewe Leit,

Der Summer iss neegscht verbei nau, un's kummt, was mir im alte Land der "Altweiwersummer" heesse. Die Nachte sinn schun aardlich kalt, awwer in die Middagszeit hocke die alte Weiwer gern ums Haus rum in die Sunn, weil'n noch waarm iss.

In seller Zeit gebt's aa die meenschte Schpinne, Micke un annere gleene Gediere im Haus. Do kennt dihr lese, was der Ralph Funk (1889-1969) g'schriwwe hot iwwer Micke Yaahre zerick.

Micke

Vun all dem Ungeziffer wiescht,
Wu rum iss in der Welt,
Die Micke sin zu mir es schlimmscht,
Vun Friehyaahr bis die Kelt.

Was badde Micke ennihau?
Duhn ehm yuscht driwweliere;
Sie graddle yuscht in allem rum
Fer ehm Geduld browiere.

Nau schlaag sien wann sie uff dich setzt,
Noh dreffscht dich selwer schtatts;
Un machscht du endlich eeni doot,
Gebt's sexe in ihr Blatz.

Sie fliege in die Ohr un Naas,
Die Aage un ins Maul;
Laafe iwwer dei Blottkopp naus,
Muscht wehre wie en Gaul.

Sie falle in die Riwwelsupp,
Ins Sauergraut un Schpeck;
Vun eeniches vum Esse rum,
Do bleiwe sie net weck.

Nau finnt en Mann en Mick im Bier,
Er schmeisst sie raus un lacht;
Sie hot, iss sie verseeft im Schaum,
Seim Dascht nix ausgemacht.

Loss awwer'n Mick im Kaffi sei,
Noh gebt's en grossi Zucht;
Es iss en "caution"' hol's die Grenk,
Wie er die Mick verflucht.

Die Micke Gschicht iss mir en Greiz,
Bin froh wann's iss verbei;
Was batt's - 's iss yuscht en katzi Weil
Bis Zeit sie rum zu sei.

Oh, alleweil hockt mer en Mick uff'm Waddefresser. Ich denk, ich muss ihr naachgeh nau.
Bis zum neegscht mol ..

Sell schreibt der
Michel aus'm alte Land




Beitrag erstellt 08:02 |
Link

23.8.04

15.8.04
'S KATZ DEITSCH SCHTICK

Dihr liewe Leit,
Heit drucke mer en Gedicht, ass en Kall mit Naame E. M. Eshleman g'schriwwe baut 100 Yaahr zerick. 'S waar erscht gedruckt im Bichli "Pennsylvania German", ass der Daniel Miller in 1911 in Reading gedruckt hot:

Schnitzpei

Die guude Weibsleit do deheem.
Ich kann sie nie vergesse.
Die mache 's bescht un's schenschte Sach,
Abbadich fer zu esse.

Ich bin draus in der Welt rum gw'esst
In viel Schtedt, grooss un fei;
Doch hawwich oft recht Heemweh grickt,
fer yuscht en Schtick Schnitzpei.

Ich weess noch, ass en gleener Chap -
So'n rechter "Wunnerfitz" -
Die Memm backt Schoo-Fly Kuche, Broot,
Un's bescht - paar Pei vun Schnitz.

Nau macht sie's Offedoor mol uff:
Oh, so'n Geruch - yuchee!
Ich saag kenn Lieg: Ich bin gedschumpt
Schur drei Fuuss in die Heeh.

Oh yuscht emol widder fer en Beiss -
Des waer gewiss en Glick.
Darich die brau Kruscht - hmm, was'n G'schmack!
G'schwind, schneid mer mol en Schtick.

So, wie die Memm gebacke hot,
Die sinn mer yuscht "all right",
En Pennsylvaanisch-Deitsch Schnitzpei,
Des is mei Favorite.

Ich weess, en Meedel gleicht mich guud;
Sie wuhnt net weit eweck.
Sie iss aa hallich, schmaert un guud,
Un siess wie Zuckerg'schleck.

Doch meind - eb sie mich heire duht -
Es kann net annerscht sei -
Do muss sie backe kenne - heerscht? -
En recht guuder Schnitzpei.

En alt deitsch Schprichwatt saagt "Liebe geht darich der Maage". Heitesdaags verleicht awwer nimmie so viel wie Yaahre zerick. Die meenschte Leit gleiche esse draus an unnerschiddliche Essbletz. Sell iss ferschur net wolfel un aa net so guud wie deheem. Awwer was kammer mache?

Sell schreibt
der Michel aus'm alte Land

Beitrag erstellt 21:05 |
Link

8.8.04

1.8.04

26.7.04

15.7.04
'S KATZ DEITSCH SCHTICK

Dihr liewe Leit,

am neegschte Samschdaag hemmer en glee Versammling vun unser "German-Pennsylvanian Association" do in unserm Schtettel Ober-Olm. Baut 20 Leit welle kumme, un mir sinn froh fer sell. Der Schwetzer iss der Prof. Mark Louden vun Wisconsin, un er schwetzt iwwer "Pennsylvania German in the 21st Century". Mir sinn froh, ass mir unser gudi Freind widder sehne. Deel Leit kenne aa net kumme: Der Frank Kessler (Brussels, Belgium) hot en latt Arewet deheem, der Butch Reigart muss schaffe, un der Josh Brown iss widder deheem im Millerschteddel in Lengeschter Kaundi un helft'em Prof. C. Richard Beam mit sei Waddebuch. Mir falle noch meh ei, wu net do sei kenne, awwer mer denke an sie am Samschdaag.

Heit welle mer glee en Gedicht drucke vun en Freind, ass g'schtarewe iss letscht Yaahr. Er waar der "Effridaa Schreiwer", un sei Name waar Daniel B. Stauffer (1908-2003). Er waar en Schtauffer-Mennischt un hot die letschte Yaahre gewuhnt in en "senior residence" uff'm Katzebuckel in Lengeschter Kaundi. Datt hawwich ihn in 2000 's letscht mol b'sucht, un mir henn en gudi Zeit g'hatt:

Ich weess wet wer

Ich weess net wer, verleicht waar´s mich
en ungut Watt hot g´schproche.
Ich weess net wer, verleicht waar´s mich
en Schpreches hot gebroche.

Ich weess net wer, verleicht waar´s mich,
en Nochber hot verdrosse.
Ich weess net wer, verleicht waar´s mich,
en Freind im Schtich hot losse.

Ich weess net wer, waar´s doch dann mich,
en Freind hot missbehandelt.
Ich weess net wer, waar´s als noch mich,
newe die Schpur iss g´wandelt.

Ich weess net wer, verleicht waar´s dich,
der mei Missdritt hot g´sehne.
Ich weess net wer, ich hoff, ´s iss dich,
der mich duht draa gemaene.

Wer dies Gedicht geschriwwe hot,
weess ich, ich duh bekenne.
Wer mich dezu gedriwwe hot,
den will ich do net nenne.

Ich bin froh, ass ich der Dannie gekennt hab. Er hot en guuder "humor" g'hatt un gegliche, en latt G'schpass mache. Awwer er waar aa en abbadich schmaerder Kall.

Sell schreibt der
Michel aus'm alte Land


Beitrag erstellt 20:58 |
Link

9.7.04

1.7.04
'S KATZ DEITSCH SCHTICK

Dihr liewe Leit,

Mer henn alleweil en aardlich feicht Wedder bei uns rum. 'S iss waarm, awwer's reggert allegebott. Do kannscht du lese, was Blatz genumme hot, wie der Ralph Funk (1889-1969) mol draus im Daal waar:

Summerdaag

Schwetz vun scheene Summerdaage!
Des iss eener, waer kann glaage!
Ich deet wette, un gewinne---
Kann kenn besser Wedder finne.

Doch kann ich en Wolk datt sehne
'Baut wie'n Hand, so deet ich meene,
In der Wescht---was kann's bedieide?
Ya, waer weess in Summerzeide.

Sehnescht du aa, sie kummt als neecher,
Sunneschei iss wennich bleecher---
Aryeds duht deel Rege falle,
V'leicht en bissel Dunner schalle.

Nau fangt Wind aa rasch zu bloosse,
Iss am Rausche un am Schtoosse!
Duht der Schtaab vun Weg uffziege,
Groosse Beem schier dobbel biege!

Haust der Schtarem mit Schtraahl un Dunner,
Darrich's Daal, die Barrige runner---
Dobt un gnallt, wie dausend Deiwel
Hett' die Welt schunn unne Zweiwel.

Ball wie's End der Welt duht's scheine!
Der Wind, wie Gschpenschder, hell am weine!
Un Wedderleech in all Ecke
Duht ehm aus der Haut verschrecke!

Guck! 'S losst noh, der Schtarem verzoge-
Guckt mer fer der Regeboge!
Datt iss er! Bin froh'n sehne,
Verschprecht es soll ken Flut meh g'schehne!

Vun weidem heert mer Dunner schalle,
'S duht aa nau ken Rege falle;
Die Sunn kann widder Schadder messe-
Un der Schtarem iss glei vergesse!

Schwetz vun scheene Summerdaage,
Heit iss eener, waer kann glaage!
Alles hibsch, die Veggel singe
Fer uns guder Mut zu bringe.

Ya, ya, so geht's als mol im Summer. Mir sinn alleweil ganz froh, ass es so feicht iss, weil so misse mer net zu viel Wasser nausdraage in unser Gaarde. Wann's en latt reggert - sell iss wolfel.

Sell schreibt der Michel aus'm alte Land.





Beitrag erstellt 21:24 |
Link

25.6.04

15.6.04
'S KATZ DEITSCH SCHTICK

Dihr liewe Leit hiwwe wie driwwe,

Der Edward Quinter vun Allenschteddel hot mer heit en Copy g'schickt vun en alter deitscher Kalenner - aus'm Yaahr 1913. Un datt drin iss aa en pennsylvaanisch-deitsch Gedicht. Mer wisse net, wer sell g'schriwwe hot, awwer verleicht weess sell eens vun unser Leser. 'S heesst:

Ruuls fer heiratsluschtige Buwe

Die Meed mit dicke Backe,
Henn Hatze wie die Wacke;
Die Meed mit derre Backe,
duhn oft ihr Maenner hacke;
Die Meed mit rote Hoor,
Die sinn en feirich Chor;
Die Meed mit dicke Beh,
Die losst mer besser geh;
die Meed mit Ring un Baender,
Die gehe oft der Caenter;
Die Meed verhaengt mit Seide,
Kenne nix recht Guudes leide;
Die Meed mit dinne Beh;
Henn Hoor uff den Backezaeh,
En Meedel mit voller Bruscht,
Gebt mol en alte Kruscht,
Hot en Meedel recht viel Geld,
Will sie alles in der Welt;
Iss sie so aarm ass en Laus,
Bettelt sie dir's Lewe raus;
Iss sie so schee ass wie en Blumm,
Watt sie doch runzlich, gehl un krumm;
all die Sache sinn nix wert,
Uff der ganze weite Erd;
Geb mir yuscht en recht ehrlich Hatz,
Ohne sell macht alles Schmatz.

Der Ed Quinter hot noch g'schriwwe: "Lach net zu hatt. Welche Satte iss dei Fraa? Mir kenne hoffe, sie hot en ehrliches Hatz." Sell hot sie gewiss, un so warefe mer unser deitsche Schtrohhiet in die Heh un schicke en Gruuss zu alliebber, wu en ehrlich Hatz g'funne hot - net yuscht zu die Maenner, abbadich aa zu die Weibsleit.

Sell schreibt der Michel aus'm alte Land.

Beitrag erstellt 21:34 |
Link

7.6.04

1.6.04
'S KATZ DEITSCH SCHTICK

Dihr liewe Leit,

Heit welle mer en Schtori drucke, ass en Deitscher vun Ontario - der Eddie Bearinger - verzehlt hot Yaahre zerick. Sell waar gepublisht im Bichli "Was Grosdaudy un Grosmammy Gsaht hen - Pennsylvania German Stories, Poems, Proverbs" (Waterloo/Ontario 1994).

Schreiwe un lese

Es waar mol en Kall, er hot en Schtor g'halte, awwer er hot net schreiwe un net lese kenne, un es waar Sadde unschtennich, noht hot er en grooss Buch g'hatt, un hot als en Pickter gedraat, wann ebber ebbes grickt hot, noht hot er die Fraa odder Mann grickt fer ihre Name hinner draa schreiwe. Un noht am End vum Yaahr sinn sie als kumme fer uffsettle.

Emol am End vum Yaahr iss en Kall reikumme fer uffsettle, un noht hot er sei Name g'funne datt, noht hot der Schtorkieper g'saat:

"Dei Fraa hot Deel Frackschtofft grickt."
"Ya, sell iss so."
"Un du hoscht en Sack Mehl un en Sack Zucker grickt."
"Ya, sell iss so."
"Ya well, sell iss, was ich do anner gedraat hab; noht hoscht aa noch en Kees gekaaft."

Un dere Bauer meent, nee, her hot sei Lebdaag noch kenn ganzer Kees gekaaft; sell hot er net. Noht hot der Schtorkieper en Weil sei Kopp gegratzt, noht hot er gemeent:

"Well, hettscht du en Schleifschtee grickt?"
"Ya! En Schleifschtee hab ich grickt."
"Oh well," hot der Schtorkieper g'saat, "noht hab ich yuscht vergesse fer es Loch neimache."

Ich hab hatzhaftich g'lacht, wie ich sell Schtori 's erscht mol g'lese hab, un ich hoff, dihr duhne aa. Mit sell schicke mer en Gruuss zu all unser Freind datt drowwe in Jakobschtettel, Elmira, Heidelberg, Wellesley un all die annere Schtettel, wu die Mudderschprooch noch g'schwetzt watt.

Sell schreibt der Michel aus'm alte Land,
ass Yaahre zerick im Moi aardlich g'frore hot in Waterloo Kaundi.


Beitrag erstellt 21:21 |
Link

24.5.04

16.5.04

9.5.04

2.5.04

24.4.04

16.4.04
'S KATZ DEITSCH SCHTICK

Dihr liewe Leit,

Ya, mer henn's nau geduh! Mer wuhne in unser nei Heemet uff'm Hiwwel vun Ober-Olm. Um uns rum iss noch alles 's unnerscht 's ewwerscht, awwer ich denk, alle Leit, wu mol gezogge sinn, wisse, wie's guckt yuscht en Woch naach 'em Zuck-Daag.

'S Friehyaahr iss nau endlich do, un die Veggel sinn am singe in alle Ecke. Der J. Max Hark (1849-1930) hot mol en Gedicht vun der Amschel gschriwwe Yaahre zerick. Es iss net so beriehmt, ass wie em Henry Harbaugh sei Gedicht "Der Pihwie", aawer 's iss aa wunnerbaar guud:

Die Amschel

Die Amschle sinn do! Die Amschle sinn do!
Ich hab die aerscht g'heert heit mariye im Bett
Sie hot g'sunge im Gaarde, ass waer sie so froh:
"Kumm aan! Kumm 'hett!
Kumm ann! Kumm 'hett!

'S iss die heechschti Zeit ass mer sich paare duht,
Un sucht sich fer'n Nescht en Baam ass ehm suut!
Kumm aan! Kumm 'hett!
Kumm ann! Kumm 'hett!"

Ich glaab, ass sie widder baue welle datt
Uff'em ald Beerebaam, ass ich umhackt hett,
Die neegscht Woch, waer's net fer ihr Singe alsfatt:
"Kumm aan! Kumm 'hett!
Kumm ann! Kumm "hett!

Do's der beschde Baam in der Welt
Fer'n Nescht, un ich glaab, er iss parrebess herg'schtellt!
Kumm aan! Kumm 'hett!
Kumm ann! Kumm 'hett!"

Was laut's doch so schee im Mariye so frieh -
En schenneri Musick winsch ich mir net-
Wann sie schwingt uff'em Gibbel un singt vor sich hie:
"Kumm aan! Kumm 'hett!
Kumm ann! Kumm 'hett!

Ferwas leischt un schloofscht, wann die Nacht iss verbei?
Die Welt's yo nie schenner ass im aerscht Sunneschei!
Kumm aan! Kumm 'hett!
Kumm ann! Kumm 'hett!"

Nix duht ehm so leed, ass wann sie im Schpotyaahr
Fatt gehn, un mer sehnt sie der gans Winder net.
Awwer sie duhn's net meinde, sie singe zuvor:
"Kumm aan! Kumm 'hett!
Kumm ann! Kumm 'hett!

In en anneres Land nau misse mer geh!
So saagt Ferriwell un exschpeckt's Widderseh!
Kumm aan! Kumm 'hett!
Kumm ann! Kumm 'hett!"

Ich hab schun en latt pennsylvaanisch-deitsche Wadde g'lese un g'heert, awwer was "parrebess" meent un wu sell Watt beikummt, weess ich ferschur net. Losst mich net dumm schtarewe un schreibt mir en E-Poscht, wann dihr meh wisst wie ich.

Sell schreibt der Michel aus'm alte Land.


Beitrag erstellt 20:51 |
Link

7.4.04

1.4.04
'S KATZ DEITSCH SCHTICK

Dihr liewe Leit hiwwe wie driwwe,

Heit waar en abbadich guuder Daag. Erscht vun allem hot mich noch kenn Kall odder Weibsmensch in der Abril g'schickt bis yetz, un ich will hoffe, sell bleibt aa so bis Sunn-nunner.
Un dann henn mer heit unser "Phone" grickt in unser nei Heemet uff'm Hiwwel vun Ober-Olm. Nau kann ich mei E-Poscht gricke datt, wann ich mol mei Arewet schtopp fer en Weil. Noch en Woch iss Zeit, dann welle mer ziehge mit all unser Schtufft - yuscht katz eb Oschtre. Mer gucke vaschich zu sell ...

Heit drucke mer en Gedicht, ass der Ralph Samuel Funk (1889-1969) g'schriwwe hot Yaahre zerick. 'S heesst:

Ich Waar Datt!

Ich waar datt in sellem Gaarde
Wu der Schwitz droppst ab wie Blut
Vum Haerr seim G'sicht, weil am Bede -
Ich waar eens, wu schloofe duht.

Ich waar datt in sellre Courtschtubb
Wu war g'flucht, geloge frei,
G'schpautzt un g'haust graad wie Heide -
Ya, datt waar ich aa debei.

Ich waar datt in alt Yerusalem
Wu "Hosanna" yeders singt,
Un schtreet Palmnescht uff die Schtroosse,
Ich waar eens, wu Neschter bringt.

Ich waar datt bei selle Yinger,
Um sell Feier maryets frieh;
Ich hab aa g'flucht un gelegelt
Dass ich kenn der Haerr net, nie.

Ich waar datt am Galyehiwwel
Wie der Haerr gegreizicht waar,
Wu Aerd ziddert, Sunn verschteckt sich
An was henn die Heide vor.

Iss mei Elt dann neinzeh hunnert?
Waar ich datt, wie all des g'scheht?
Nee, ich bin yuscht ebbes fuffzich,
Schwach so weit Erfaahring geht.

Doch wie Mensche selle Daage,
So sinn all vun uns aa heit;
Un dedarich graad so schuldich
In des unser schpeedre Zeit,

All die Sinde mir heit duhne,
Die sinn all so grooss un schwer,
Wie wann mir bei selle Heide
All die Sache duhn zum Haerr.

Drum waar unser Haerr gegreizicht
Un sei Blut gegosse frei,
Dass zu die, wu an ihn glaawe
All ihr Sind vergewwe sei.

Mer winsche eich en hallich Oschterfescht.
Schiesst kenn Haase, so ass sie blendi Oyer bringe kenne zu die Kinner.

Sell schreibt der
Michel aus'm alte Land

Beitrag erstellt 18:02 |
Link

24.3.04

15.3.04
'S KATZ DEITSCH SCHTICK

Dihr liewe Leit hiwwe wie driwwe,

'S iss nau schunt Matz, un im alde Land hemmer am Wochend die erschte waarme Daage g'hatt. Sell waar gewiss Ebbes Abbadiches. 'S iss yuscht en wennich schaad, ass mer die ganz Zeit schaffe henn misse fer unser nei Heisli reddi gricke. In April welle mer ziehge zu en neier Blatz - net zu weit weck vun wu mer wuhne heit, verleicht yuscht en Meil. Awwer die Arewet iss net wennicher, wann der nei Blatz neegscht iss. So simmer froh, wann die Kaelt nau geht - 's iss noht alles haendicher, aa am Daag, wammer unser alt Heemet verlosse. Wann alles recht schafft, welle mer die Oschteroyer schunt im neie Haus suche. Heit drucke mer en Gedicht, ass der Parre Eli Keller (1825-1919) g’schriwwe hot:

‘S Wedder brecht

Gott lob! Die bitter Kaelt
Weicht widder aus der Welt;
Schnee un Eis fangt aa zu rinne,
Dausend Schtreemcher kammer finne.

Der Himmel schteht so hoch un bloo,
Die Wolke sinn meh geel wie groo.
Die waarme Windcher seisle schun
Un pischbre vun're heech're Sunn.

Was waar doch des en Kaelt!
(Mer hett sie net beschtellt!)
Hunnert Fiess, un noch meh Ohre,
Sinn gewiss schun lengscht verfrore!

Fer Kleeder hot mer viel verwendt,
Un Kohle haufeweis verbrennt;
Die Better waare hoch gemacht,
Doch unne Schtolz un unne Pracht!

Ich saag: So iss mer's recht;
Dass endlich's Wedder brecht;
Dicke Reck un dicke Decke,
Meege sie mer ball verschtecke!

Der Aerd ihr Leichekleed
Iss mer schun lang verleed;
Waer's immer weiss un kalt,
So waer mer ver de Yaahre alt.

Es Wedder wexelt rum,
Un yedes freet sich drum;
Yeder Daag watt 'n bissche lenger -
Yede Nacht en bissche enger.

Do guck ich nau mit Freede zu!
(Was kennt ich dann aa mehner duh?)
Ich saag's frei raus: So iss mer's recht!
Gott Lob un Dank, dass 's Wedder brecht!

So welle mer hoffe, ass der Winder nau nimmie zerick kummt, un ass mer en hallich Friehyaahr henn hiwwe wie driwwe. Sell schreibt der

Michel aus'm alte Land



Beitrag erstellt 21:28 |
Link

9.3.04

1.3.04
'S KATZ DEITSCH SCHTICK

Dihr liewe Leit hiwwe wie driwwe,

'S waar en wunnerbaar Wochend, ass mer g'hadde henn am End vum Hanning. En Drupp vun 16 Leit iss zammekumme uff'm Weierhof in die Pfalz, wu en latt Mennischte lewe. Sie henn aa en "Mennonite Research Center" datt, un an dem Blatz hemmer die yaehrlich Versammling g'hatt vun unser "German-Pennsylvanian Association". Der Gary Waltner, wu der Director iss vun sellem Center, hot en guuder Tschapp geduh seller Daag un hot uns all die alte Gebeier uff die grooss Bauerei un die Bicher in die Library gewisse. Pickters vun sellem Zammelaaf kennt dihr uffgucke uff unser Heemetblatt "www.pennsylvanien.de".

Heit welle mer en draurich Gedicht drucke vum Lloyd Moll (1879-1944). Er waar gebore in Macungie (Lehigh County, PA) un waar en Musigant.

Ich hab en roter Voggel g'sehne

Ich hab en roter Voggel g'sehne,
Es dutt mir leed fer leenich sei.
Ich kann net helfe, wie zu meene,
Wie du en Freede hettscht debei.
Wie sinn mir als im Busch rum g'schliche,
Den Voggel g'sucht mitaus 'me Watt,
Un sehn mir ihn, sinn net gewiche,
Henn ihn bedracht, bis er fliegt fatt.

Datt uff 'me Beemche singt en Schpetzel,
Sei luschtich Lied, so ganz allee,
Es iss ya widder an seim Bletzel,
Wu's g'sunge hot fer uns so schee;
So Freede hottscht du an seim Singe,
Ich meen, ich kennt dich sehne heit.
Ach, kennt ich doch die Freede bringe,
Zurick zu dir wie selle Zeit.

'S nemmt nimmie lang, un's Friehyaahr iss widder do - im alte un im neie Land. Mer welle hoffe, ass noht aa widder blendi rote Veggel fliege, un ass en latt Leit sie sehne un ihr Freed henn.

Sell schreibt der
Michel aus'm alte Land

Beitrag erstellt 21:24 |
Link

15.2.04

8.2.04

2.2.04
'S KATZ DEITSCH SCHTICK

Dihr liewe Leit,

Es gebt Mensche, wu net an die Grundsau glaawe. Es hot mich schun oft gewunnert, eb's aa Grundsei gebt, wu net an Mensche glaawe. Unglaawiche Mensche hot's immer schun gewwe, un gebt's aa heit noch. Unser Dichter, der David B. Brunner (1835-1903), hot aa kenn feschter Glaawe an die Grundsau g'hatt. Do iss sei Gedicht, wie's im Daniel Miller seim Buch "Pennsylvania German" (Reading, PA 1904) zu finne iss

Die Grundsau

Ich bin schun mannichmol im Busch
Un Felder rumgeloffe,
Un ich hab all die kleene Tiere
Im Laafe aagedroffe.

Die schee unschuldich Landschillgrott,
Un Haase, aarick zaahm,
Die Fensemeis an alte Schtumpe
Un Poss'm im hohle Baam.

Wann ich die Tiere sehn rumschpringe,
No denk ich an mei Bu;
Ich meen, ich misst sie fer ihn fange,
Un in en Kewwich duh.

Die Grundsau iss doch ziemlich g'scheit,
Un marrickwaddich schlau;
Ich sag es eich, ihr wisst es aa;
Die Grundsau iss kenn Sau.

Die Grundsau grunzt net wie en Sau,
Vun dem heert ihr kenn bissel;
Sie kann net in dem Grund rumwiehle,
Sie hot nix vum 'me Rissel.

Sie hot kenn Warewel in dem Schwanz,
Kenn Schaufel in der Naas;
Ihr Kloohe sinn net g'schplitt in zwee,
Doch fresst sie ebbes Graas.

Sie hot kenn Berschte uff dem Rick,
Sie iss bedeckt mit Haar;
Der Poss'm guckt viel meh wie'n Sau,
Un des iss waricklich waahr.

Im Friehyyahr saage als die Leit,
Die Grundsau waer 'n Brofet,
Un kaemt als aus ihr'm Loch zu saage,
Wie's Wetter warre deet.

Die Grundsau weess net meh vum Wetter,
Un des bin ich gewiss;
Als wie en alter Esel weess
Vun Sunnefinsternis.

Doch hot es Leit in meinem Schtettel,
Do deet ich schier druff wette,
Dass sie en feschter Glaawe an
Die dumme Grundsau hette.

Die Grundsau brofezeit net meh
Als wie en alte Gans,
Un iss es waricklicher Humbug
Vun ihrem Kopp zum Schwanz.

Glaabt yuscht net an die Grundsau-G'schicht,
Es dutt eich nie net reie;
Sie weess nix vun de Himmelswelt,
Un kann net brofezeie.

Wann ihr als drauss seid in dem Busch,
Am alte Beem uffhacke,
Un sehnt en Grundsau an ihr'm Loch,
Dann schiesst sie uff dem Blacke.

Sie dutt dem Bauer gaar nix Gutes,
Un dutt ihn net meh batte,
In seine Graas un Welschkannfelder
Als wie en hunnert Ratte.

Exactly wie die Grundsau iss,
So dutt ihr Menner finne;
Auswennich sinn sie Gentelleit
Un Humbugs sinn sie inne.

Nau, wann en Mann ins Schtettel kummt,
Schprecht aa fer mich zu sehne,
Saagt wohl net, dass er alles weess,
Un dutt es doch so meene.

Un plaudert mir in eem Schtick fatt -
Den Mann heess ich gewiss,
So 'n groosser un infamter Humbug
Als wie en Grundsau iss.

Un wann en Paetent Dokter schreibt,
Er hett en Medizin,
Un saagt, 's deet alles heele
In de menschliche Maschin.

Hatzgloppe, Zaahweh un der Mumps,
Leibweh un Rummedis -
Des iss noh widder en groosser Humbug,
Graad wie die Grundsau iss.

Es kumme Agents eich zu sehne,
Sie schwetze schee un lache,
Un weise eich, wie leicht es iss
Fer schtarick Geld zu mache.

Sie weise eich, wie reich zu warre,
Ihr misst es als schier glaawe,
Sie wolle eich net profitiere,
Sie wolle eich yuscht raawe.

Nau, wann ihr als so Leit aadrefft,
Des haeppent alle Daage -
Die allfatt fer sich selwer schwetze
Un losse eich nix saage.

Dann gebt yuscht acht uff all so Kalls,
Dass sie eich net beliege;
Sie duhne viel Leit iwwerzeige
Un duhne sie bedriege.

Ich geb eich nau en guter Roth,
Un den duh ich eich schenke,
Wann ihr so Humbugs als aadrefft,
Dutt an die Grundsau denke.

Ich weess net, ich weess net. G'meenerhand eschtimir ich als zu lese, was der David Brunner g'schriwwe hot. Awwer desmol iss er verleicht doch letz. Ich hab yuscht heit geguckt im Gewebb, eb der "Punxatawny Phil" in PA sei Schadde g'sehne hot - un ferschur hot er. So welle mer mol sehne, wann's Friehyaahr kummt im neie Land. Losst uns wisse, wann's do iss, noht kenne mer aa sehne, eb die Grundsau en groosser Humbug iss odder verleicht doch net

Sell schreibt
der Michel aus'm alte Land

Beitrag erstellt 20:26 |
Link

24.1.04

15.1.04

9.1.04

1.1.04
'S KATZ DEITSCH SCHTICK

Dihr liewe Leit hiwwe wie driwwe,

Nau hemmer's Yaahr 2004 aag'schosse un in die Nochberschaft rum en "guud nei Yaahr" g'winscht. 'S waar aardlich kalt bei uns rum, awwer Schnee hemmer der Winter noch net g'hatt. 'S waar laut g'wesst in die Nacht, un unser Kaetzli Sally iss ab in die Schlaafschtubb gerennt un hot sich unnich 'em Bett verkroche, bis die Schiesserei verbei waar. Unser Kinner hemmer net ins Bett grickt eb Mittnacht - sie henn sehne welle, was am aageh iss mittes in die Nacht. Un so hemmer sie gelosst. Sellerweg henn sie guud un lang g'schlofe der erscht Maryie vum neie Yaahr. Un mir henn aa. Heit drucke mer en Gedicht, ass g’schriwwe beim Dr. Frank R. Brunner (1835-1908). Er waar gebore in Greshville (Baricks Kaundi, PA) un waar seilewes en Dokter.

Neiyaahrs Winsch

'S iss guud zu saage zu de Leit:
Ich winsch eich all en guudi Zeit
Im neie Yaahr, wu heit erschteht,
Un hoff, 's watt niemand so verleed,
Dass es vergesst zu danke Gott
Fer des, was Er uns gewwe hot;
Fer G'sundheit, Weisheit un Verschtand,

Fer all die Frichte vun dem Land,
Fer Regge, Sunneschein un Hitz,
Un net gedroffe mit dem Blitz;
So viel gesegnet mit Gesundheit,
Un uns behiedet gege Schtreit.
Mer danke all dem Gott recht schee,
Un winsche 's mecht uns immer so geh.

Mer danke aa de reiche Leit,
Es hot viel zu dere Zeit,
Die ihre Hend alsmol uffmache
Un gewwe aarme Leit viel Sache
Zu esse, drinke, un aa Kleeder,
Un Holz un Kohle fer kalt Wedder;
Un dass sie denke, dass en yeder
Immer hot so en guuder Petter.

Ich winsch, dass guude Leit lang lewe,
Un dass sie immer reichlich gewwe
Zu denne, die es wohl aawenne,
Un es net unneedich verschwenne
Zum Lewe g'heert aa Schpaarsamkeit
Sowohl als wie Wohltaetichkeit.

Ich winsch de Buwe un de Meed
Viel Glick un aa all recht viel Freed;
Un dass sie schaffe un recht schpaare,
Dann kenne sie aa alsmol faahre,
Debei sich rischte fer zu heire
Un net alleenich immer leire.
Deel wisse oft net, was sie wolle -
So Dummkepp soll der Beddel hole,
Wu schaffe hatt un schpaare Geld,
Un kenn Familie in der Welt.

De Drucker, denne winsch ich all
Viel Bissniss un in allem Fall
Esse un Drinke, des basst zum Darscht,
Un aa en Schtick Balooni Warscht,
So oft dass sie es needich brauche,
Un aa en Peif Duwack zu rauche;
Dass sie ihr Weiwer net vergesse,
Un kaafe ihne scheene Dresse,
Des bringt viel Hallichkeit ins Haus
Un halt die fremme Menner drauss.

Des hab ich eich nau all gewinscht,
Un hoff, ihr hett all viel Verdienscht,
Un dass ihr schafft mit neiem Mut,
Dass es eich all recht freehe duht,
Dass mir des neie Yaahr aadrede,
Un dass mer all duhn danke un bede,
Fer des, was mir darich's Yaahr geniesse,
Un dass mir Gott niemols verdriesse.

Mir winsche allieber im alte un im neie Land en glicklich un g'sund nei Yaahr 2004.

Michael Werner



Beitrag erstellt 20:11 |
Link

23.12.03

15.12.03
'S KATZ DEITSCH SCHTICK

Dihr liewe Leit,

'S nemmt nimmie lang, un der Grischtdaag iss do. Heit welle mer en Gedicht drucke, ass in Deitschland alle Kinner kenne. Der John Birmelin (1873-1950) hot sell iwwerg'setzt in die Mudderschprooch Yaahre zerick. Er hot der hochdeitsch Title "Knecht Ruprechts Lied" schtehe gelosst, awwer mir yuuse schtatts "Knecht Ruprecht" der pennsylvaanisch-deitsch Name:

Der Belznickel

Vun drauss, vum Busch, do kumm ich bei;
Es muss mol widder Grischtdaag sei!
Die Schtanne funkle in de Heh,
Uff Dannebeem, datt glaenzt der Schnee;
Un drowwe an dem Himmelsdoor,
Datt schteht des Grischtkind graad devor;
Un wie ich so gewandelt bin,
Do ruft's mich aa mit heller Schtimm:
"Belznickel, geh un dummel dich!
Die Engel gaar, die freehe sich,
Der Himmel schtraahlt, des Door iss uff,
An Grischtbeem sinn die Lichter druff.
Was Alt un Yung so glicklich macht,
Sie ruhge vun de Lewensyacht;
Un maryie flieg ich uff die Aerd,
So ass es widder Grischtdaag watt.
Do hawwich g'saagt: "Soviel ich weess,
Bin ich am End vun meinre Rees;
Yuscht do sinn Leit in dere Schtadt,
Die henn so gude Kinner g'hatt."
"Un hoscht dei groosser Sack bei dir?"
Ich saag: "Mei Sack? Des denk ich schier!
Mit Ebbel, Niss un Mandelkern,
Die esse gude Kinner gern."
"Un hoschte aa die Fitz bei dir?"
Ich saag: "Die Fitz? Des denk ich schier!
Die schlechte Kinner, unne Fehl,
Die gricke's graad uff's rechte Deel!"
Grischtkinnel saagt: "So iss es recht,
So geh mit Gott, du dreier Gnecht!"
Vun drauss, vum Busch, do kumm ich bei,
Ich hab gedenkt, do schtopp ich rei.
Nau, wer waar guud? Un wer waar schlecht?
Ass yedes yo die Wahrheet secht!

Bei uns hot der Belznickel in dem Yaahr net neig'schtoppt. Er iss Disember 6 yuscht verbei geloffe un hot ebbes Candy fer die Kinner in ihr Schtiwwel g'schtoppt, wu an de Deer g'schtanne henn. Awwer er hett aa guud reikumme kenne. Soweit, ass ich weess, hett er sei Fitz net gebraucht.

Sell schreibt der Michel aus'm alte Land,
ass noch net alle Bressends hot fer Grischtdaag.

Beitrag erstellt 21:20 |
Link

8.12.03

1.12.03
'S KATZ DEITSCH SCHTICK

Dihr liewe Leit hiwwe wie driwwe,

Nau iss die Grischtdaagszeit schun widder do. Mei Meed, Marlene un Pauline, henn die erscht "Deer" vun ihr "Advent calendar" uffgemacht - 's waar ebbes Chocolate drin. 'Seller "Advent calendar" iss grooss, hot en schee Pickter vanne druff mit Dannebeem un 'em Belznickel un hot vierezwanzich Deerlin - eens fer yeder Daag vum Disember bis Grischtdaag.
Ya, ich weess: Ebbes wie sell iss net bekannt in Pennsylvaani. Sell Gebrauch iss erscht ans geh kumme in Deitschland, do waare die Pennsylvaanisch-Deitsche schun en Weil im neie Land. Neegscht yedes Kind hot en "Advent calendar" bei uns rum, un die Kinner duhne sell abbadich gleiche. Heit drucke mer en Gedicht, ass g'schriwwe waar beim Ezra Grumbine (1845-1923). Er schreibt devun, was der Belznickel alles Guudes am duh iss:

Zum Santa Claus

Oh, Santa Claus, Oh, Santa Claus!
Du scheener, liewer Mann!
Du bischt der Kall, wu Alt un Yung
So frehlich mache kann.

Ya, besser wie 'n Tariff Law,
Oh Santa Claus, bischt du;
Du helfscht dem groosse Fabricant
Un der ganze Bissniss-Crew.

Protection bischt zum Zucker-Trust,
So guud wie 'n Tariff Law;
Du nemmscht des Geld vum Daadi weck
Un vun der Mammi aa.

In die Pfalz (un neegscht alliwer im alte Land) kummt der "Belznickel" Disember 6, un er bringt yuscht en wennich ebbes. Am Grischtdaagsowet (Disember 24) bringt noht 's "Grischtkind" die groosse Bressents zu die Kinner, g'meenerhand zwischich 6 un 9 Uhr. So, wann alles recht schafft, kenne die Eldre am Maryie naach Grischtdaagsowet en wennich lenger ruhge.

En hallicher Disember winscht alliebber hiwwe wie driwwe der Michel aus'm alte Land.

Beitrag erstellt 20:57 |
Link

23.11.03

15.11.03

9.11.03

1.11.03
'S KATZ DEITSCH SCHTICK

Dihr liewe Leit hiwwe wie driwwe,

Mer henn kenn gudi Neiigkeete fer unser Leser heit. Der Richard Druckenbrod vun Allentown iss g'schtarewe October 27, 2003. Er waar 74 Yaahr alt. Der "Drucky" waar en guuder deitscher Schwetzer und Schreiwer, waar President vun die Pennsylvania German Society Yaahre zerick un hot im "Morning Call" en langi Zeit sei "Deitsch Schtick" gepublisht. Un er waar en guder Freind zu mir. Mer hot allfatt mit ihm guud dischbediere kenne iwwer die deitsche Wege un wie mer die deitsch Mudderschprooch uffhalte kann in Pennsylvani. Die Welt iss aermer nau, wu er nimmie bei uns iss. ---

'S iss aa November nau, un die deitsche Leit in die Pfalz lanne meh un meh, was "Halloween" meent. Yuscht vier odder fimf Yaahr zerick henn deel Kinnder bei uns im Schtettel g'schtaert los ziehge in die Nochberschaft, aageduh wie en Schpuuk, un rufe "Geb uns ebbes Siesses, sunscht gebt's Saures!" Mir henn ebbes wie sell net gekennt, wie mir yung waare. Un nau welle die Kinner vum Drucker, Marlene un Pauline, aa geh am Owet - un ich loss sie, weil's iss ferschur en latt G'schpass. Heit welle mer en Gedicht drucke vum Parre Eli Keller (1825-1919), was heesst "Es schaudert mich."

Es schaudert mich

Die Luft iss feicht un kiehl
un aennert sich so oft;
Der Newwel kummt so viel,
Wann mer die Sunn sich hofft.
Meenscht net, 's waer winterlich?
Es schaudert mich!

Die Beem schtehn leer un blott -
Viel Blaedder - ah schun weck;
Die warre schwatz un rot
Un gehn dann - in der Dreck.
An was erinnert's dich?
Es schaudert mich.

Wu erscht die golde Frucht
So schee geschtanne hot,
Iss nix meh, dass mer wott.
Wie g'fallt dir mei Vergleich? -
Es schaudert mich!

Die Daage gehn so g'schwind,
Die Naechte - scheine lang;
Waer ich als noch en Kind,
So waer mer's Angscht un Bang.
Un wie iss des fer dich? -
Es schaudert mich.

Ich hol mer'n bess'rer Rock
Un bess're Schtrimp un Schuh;
Ich saeg mer Holz am Bock
Un schplitt's aa noch dezu.
Waer des net guud fer dich?
Es schaudert mich!

Un nau geh ich in's Haus
Un draag mei Holz mit nei;
Dann ruh ich mol schee aus
Un loss, was drauss iss - sei.
Hei ya, Was kimmert's dich? -
Es schaudert mich!

Ich gleich net der November. Er iss duschber un kalt, un's nemmt noch en langi Zeit, bis 's Friehyaahr mol widder kummt. Unser Katz hockt am Offe un geht net naus, wann drauss Newwel iss odder en Schtarem. Awwer mir misse ...

Sell schreibt
der Michel aus'm alte Land.




Beitrag erstellt 19:54 |
Link

23.10.03

15.10.03
'S KATZ DEITSCH SCHTICK

Dihr liewe Leit,

heit welle mer en Gedicht drucke, ass der Paul Brendle Horning (1894-1986) g'schriwwe hot Yaahre zerick. Der "Papa" Horning waar gebore in Brecknock Taunship, Berks Kaundi, PA, und hot Mennischte-Eldre g'hatt. Er hot in sei Lewe en latt unnerschiddliche Tschabbs g'hatt. Er hot uff die Bauerei g'schafft, waar en Schulmeeschter, Banker, hot g'schafft fer en "Feed Concern" un waar en Groyer. Newebei hot er pennsylvaanisch-deitsche Gedichte g'schriwwe un paar dausend Pickters gemolt. Mer drucke vun ihm:

Muundaag uff der Bauerei

Der Daed schteht in der Kich an der Schpeicherdier:
"Will, uff, uff! Heerscht, Will? Uff, uff!
Die Geil fiedre un schtriggle. Nau, harich mir!"
"Tscho, uff, uff! Schnell uff, Tscho, uff!
Die Hinkel un's Vieh un die Sei fiedre! Weschwasser bumbe
Fer die Memm! Schnell dich uff, Tscho, uff!
Die Kelwer sinn am Blarre, die Sei am Rumtschumpe!
Ich un die Memm misse ans Melke gehe."
"Maeri, uff! Ans Marriye-Esse mache. Es Feier iss am Brenne.
Uff, uff, alle drei. Der Haahne iss am Greehe!"

Der Daed schteht un haricht, awwer kenn Yacht
Kummt vum Schpeicher, alles ruhich.
Er henkt der Kopp; ebbes hot ihn denke gemacht.
"Kummt eb lang die Zeit, ass verleicht alle drei
Verheiert warre un gehn vun heem,
Odder verleicht eens odder's anner glei
Der Doot unverhofft aadrefft. Ya, well.

"Was macht en Schtund aus, ee Weg odder der anner,
Kummt die Zeit, ass mer sie alle drei
Widder gaern in ihre Bedder sehne deet, all minanner
In siesser Schloof, unschuldich un gedrei.
Kumm, Memm, mach du es Marriye-Esse.
Loss sie noch en Weili leie, alle drei."

Ich weess, wie seller Kall g'fiehlt hot, wann ich mei zwee gleene Meedlin maryets im Bett leie sehn un sie welle net wacker warre, aa wann's schunt Zeit iss fer in die Schul un in der Kindergaarde geh. Ya, well. Sell iss en hadder Tschabb fer sie uffwecke un ich bin als widder froh, wann Wochend iss un ich sie schlofe lasse kann, so lang, ass sie welle.

Sell schreibt der Michael Werner

Beitrag erstellt 20:57 |
Link

9.10.03

1.10.03
'S KATZ DEITSCH SCHTICK

Dihr liewe Leit,

Der Oktower iss do - ebber hot katzlich g'schriwwe, sell waer der "Schpuckmunet". Sell Watt hawwich gegliche, weil's en guud Watt iss fer der Munet vun Halloween. Ya, mer kann schun Karebse sehne, wammer darich die gleene Schtettel am fahre iss. Deel Leit verkaafe sie uff der Marick, un annere schtelle sie neewich die Deer odder in der Gaarde - yuscht fer schee. Sell gleich ich, awwer noch meh gleich ich Karebsesupp. Sell iss ebbes waricklich Abbadiches. Heit welle mer ebbes drucke, was ebber mit Feddernaame "Hirom Hollerheck" g'schriwwe hot in 1910 im "Macungie Progress". Wann eens vun unser Leser weess, wie der recht Name vun sellem Kall iss, loss uns wisse. Ich hab's mol g'lese aryets, awwer widder vergesse. So geht's, wammer elder watt.

Schpootyaahr

Mer sieht un heert, ass es Schpootyaahr do iss. Uff alle Seite watt mer des bewaahr. Die Gricksel greische owets un nachts, ass 's ehm kalt der Buckel nuff laaft. Die Veggel sinn am ausziehge fer der Winder an waarme Bletz schpende. Die Cider Press iss bissy. Die Bauere sinn ball faddich, ihre Frucht eisammle. Die Polly gebt widder Beweis, ass die Hausbutzgichtere schier iwwer sie kumme. Die Fairs sinn schun im Gang.
All die Familie henn scheints ihre Reunions g'hatt. Sie kenne nanner nau besser wie devor. Latwarrick Parties warre g'halte im Land. Die Parks in der Schtadt warre zugemacht. Die Weisbleit gucke rum fer die neie Fashions naachmache.
Karessiere uff der Porch watt unblessierlich. Die yunge Haahne graehe blessierlich, eb sie die Kepp verliere. Die Kinner fange aa in die Schul geh mit groosse Seifzer. Die Eldere sinn froh, ass sie net die Kinner tende misse darich der Daag.
Grumbiere kumme runner un Kohle gehne nuff. Die Vacation-Leit kumme heem un gratze widder fer die Expenses meete. Der Wind iss heecher un brummt lauter. Die Kandidate warre hatzhafticher. Hochziche kumme in Fashion.
All des un meh gemahnt ehm wichdichlich, ass der Summer verbei iss.
Viel Leit winsche, es waer immer Summer, un annere, ass es allfatt Winder waer. Es iss ee guud Ding in unserm Land: Es hot Bletz, ass es allfatt waarm iss odder allfatt kalt. Mer kann dann hie geh, wu's ehm am beschte basst.

Ya, sell hot der Hirom Hollerheck g'schriwwe neegscht hunnert Yaahr zerick. Ich gleich's am beschte deheem, wann's Wedder brecht un Schtarem un Regge kumme.

Sell schreibt der Michael Werner aus'm alte Land.

Beitrag erstellt 12:37 |
Link

23.9.03

15.9.03
'S KATZ DEITSCH SCHTICK

Dihr liewe Leit,

'S Schpootyaahr iss die Zeit vun unnerschiddliche Frallicke in Pennsylvaani. Do kennt dihr lese, was der Abraham R. Horne (1834-1902) g'schriwwe hot iwwer sell:

Frallicke

"Latwarick Frallicke warre schpotyaahrs gemacht, wann's viel Ebbel hot. Die Buwe un Meed kumme owets zamme. Ee Bu un ee Meedel riehre als odder gewwe Acht uff der Kessel un duhne Holz uff's Feier. Die annere scheele Ebbel. Wann die Ebbel all g'scheelt sinn, noh geht's ans Kesselschlecke.

Meehe Frallicke gebt's, wann's Mondschei iss in der Hoiet un im Ometmache. Fuffzeh odder zwanzich Nochbere kumme zamme un meehe 's Graas. Um ungefehr zehe Uhr henn sie en guud Nachtesse. Am Drinke fehlt's aa net.

Gwilding Frallicke mache die Weibsleit, wann sie Debbich zu gwilde henn. Die Meed warre eigelaade un neehe an die Gwilds naachmiddags. En guud Nachtesse watt zugerischt. Wann 's emol dunkel watt, kumme die Buwe vun der Nochberschaft bei, noh henn sie Blessier bis zimmlich schpot in die Nacht nei. Alsemol watt gedanzt, wann sie en Schpielmann henn.

Welschkannbascht Frallicke gebt's schpotyaahrs. Wann's Mondschei iss, warre sie uff owets gemacht, awwer schunscht naachmiddaags. Wann en Meedel en roder Kolwe grickt, watt sie gewehnlich gebosst, un noh lache sie awwer als. Owets watt aa als g'schpielt, wann mol 's Baschte verbei iss.

Es Ziehe friehyaahrs iss aa als en luschdichi Zeit. Alsemols sinn es so hooch wie zwanzich Wegge. Die Buwe un Meed mache 's als schicke, ass sie zammekumme uff ee Wagge iwwer em Faahre. Wann sie dann an der Blatz kumme, schtelle sie die Effe un die Bedder uff, mache Middaagesse un verluschdere sich bis in die Nacht nei."

Mer kann denke, ass en latt Buwe un Meed in Lieb g'falle sinn bei so Frallicke. So waare sie, denk ich, en wichtich Ding im pennsylvaanisch-deitsch Yaahr. Ebbes daref ich net vergesse zu saage: In die Pfalz watt Latwarick net mit Ebbel g'macht - in sellem Deel vun die Welt yuuse die Leit Gwetsche. Scheint's henn die Paelzer, wie sie gezogge waare naach Natt America, welle Latwarick mache wie deheem im alte Land, awwer's hot kenn Gwetsche gewwe. So henn sie halt verleicht Ebbel geyust. Vun seller Satt Obscht henn sie genunk g'hatt. Un ich hab schunt oft g'lannt, ass es Latwarick driwwe graad so guud schmackt wie hiwwe.

Sell schreibt der Michael Werner, ass mit sei Familie "Hollerbusch Jam" gemacht hot yuscht paar Daag zerick. Un sell iss aa ebbes Abbadiches. Wann du mol nei schtoppscht bei uns, welle mer dir sell weise.


Beitrag erstellt 21:14 |
Link

8.9.03

1.9.03

24.8.03

15.8.03

8.8.03

1.8.03
'S KATZ DEITSCH SCHTICK

Dihr liewe Leit,

Heit welle mer en Gedicht drucke vun der „Effridaa Dichterfraa", Gladys S. Martin, was heesst „Der Vendu" . En Vendu iss ebbes, vun was die Leit in Deitschland nix wisse. ‘S gebt nix wie sell bei uns rum. Wann ebber schtarebt im alte Land, un der Mensch, wu er g’heiert g’hatt hot Yaahre zerick, aa schunt doot iss, watt all sei Geld un Schtufft, wu noch do iss, gewwe zu sei Kinner. Sie kenne noht sehne, wie sie alles uffdeele - un was sie b’halde welle un was net. Ganz annerscht schafft sell im neie Land:

Der Vendu

Heit iss en schwatzer Daag fer mich,
Ich wott, ich breicht’s net sehne.
Der alt Heemblatz watt heit verkaaft;
Mei Aage sinn voll mit Draene.

Mei Eldre sinn nau nimmi do,
So gebt’s en Vendu heit.
Es Haus un der Hof, sie schtehne voll
Mit viele fremme Leit.

Fer fuffzich Yaahr do in dem Haus
Waar all des Hausrot do,
Un hot en Heemet g’macht, so schee,
Fer mei Familie noh.

In alle Schtick vum selle Haus
Seh ich mei Eldre, gnaedich.
Nau gricke fremme Leit sell Sach -
Kennt ich ‘s yuscht b’halde, deet ich.

Ich wott, ich kennt yo all des Sach
Yuscht fer mich selwer kaafe.
Awwer wann ich deet, waer mei glee Haus
Zu voll fer meh rumlaafe.

Der Groyer fangt aa greische nau
Un schtaert der Vendu ab.
Die Heemet watt vermetzelt heit,
Der Vendu brecht mei Hatz!

Datt geht mei Memm ihr aldi Wieg,
Des hot viel g’meent zu sie.
Nau kaaft en Schtettlermann selle Wieg.
Ich wunner, wu geht’s hie?

Sell Fliggeldisch, ass in der Kich
Datt g’schtanne hot fer Yaahre.
Es waar immer voll mit gude Koscht,
Wie mir so Schpringer waare.

Nau watt’s verkaaft, wie alles schunscht,
Un, oh, es duht mir weh!
Datt geht des alt Hochschtieli aa
Mit ee verbrochne Beh.

Mei Memm ihr scheene g’schtickert Gwilde,
Sie sinn so fei genaeht.
Des waer en hatt Ding fer die Memm,
Wann sie des sehne deet!

Nau geht der holzich Zuwwer ‘s neegscht;
Mir henn Gleeder g’schwenkt datt drin.
Sell kaaft en alt, grooss-fiehlichi Fraa
Fer Blumme blanze drin.

Datt geht yo nau es Hatz vun der Kich,
Der Memm ihr alder Offe!
Wie viel gut Sach hot sie datt g’macht,
Un wie viele Meile g’loffe?

Die Schpielbank un der Holzbax aa,
Es Budderfass un die Schtiel,
Es G’scharr vum Schank, die Bedder
Un die alt Kaffeemiehl.

Der alde holzich Schockelgaul,
Un’s Schpielsach so bekannt,
Des Sach geht all zu fremme Leit.
Des scheint zu mir en Schand.

Es schpiert, ass wann es Lewe
Vun mei Eldre fer nix waar.
Mit all ihr Heemet ganz verroppt,
Des duht mir weh beschur!

Ya, alles, ass mei Eldre
Als ge’eschtimiert henn so,
Iss nau verschtreit uff alle Weg.
‘S iss nix meh iwwerich do!

Viel Leit, sie gleiche Vendu-e,
Sie gehne yuscht fer Schpass.
Awwer zu mir scheint en Vendu
Wie en iwwel un drauerich Blatz.

Die meenschte Leit in Deitschland kennte net verschteh, ferwas die Kinner vun Eldre, wu g’schtarewe sinn, net mitnemme vun all dem Schtofft zu ihr Heemet, was sie kenne, un’s widder weider gewwe zu ihr Kinner, wann der Daag do iss fer schtarewe. Eenicherweg! ‘S Lewe vun die Mensche iss unnerschiddlich in unnerschiddliche Blaetz vun die Aerd. Un sell iss verleicht aa guud so - schunscht breicht mer nimmi schwetze minanner un ebbes vun enanner lanne!

Mer winsche eich en hallicher Aagscht - un net zu viel Hitz!

Sell schreibt der Michael Werner, wu als noch am schwitze iss.

Beitrag erstellt 16:59 |
Link

23.7.03

15.7.03
'S KATZ DEITSCH SCHTICK

Dihr liewe Leit,

Yaahre zerick hot’s in die Pfalz noch Braucher gewwe. Mei Gremmem (1906-1998) hot als verzehlt, ass en Mann kumme iss uff die Bauerei vun ihre Eldre un „gebraucht" hot, wann en Kuh odder en Gaul grank waar. Sell muss verleicht baut 1915 rum g’wesst sei. Heit weess mer neegscht nix meh vun so ebbes bei uns rum.

Awwer mer wisse, ass es heit in Pennsylvaani doch noch Leit gebt, wu am brauche sinn. En hochg’lannter Kall mit Name Dr. David Kriebel vun Maryland hot g’schwetzt iwwer Braucherei heidichdaags an Franklin & Marshall College in Lancaster im Harebscht letscht Yaahr - un er hot paar Leit b’sucht, wu sell noch diehne. Wammer ausfinne will, was en Braucher duht, kammer aa ‘s Gedicht vum John Birmelin (1873-1950) lese:

Der Braucher

Wann eener ‘n zaehi Granket hot,
so ebbes wiescht un weh,
un meent, ass nix meh badde wott,
duht er zum Braucher geh.

Un saag! Iss der’n karyoser Mann!
Er hot net viel zu saage,
doch weess er, ass er helfe kann,
des sehnt mer’m an de Aage.

Sie saage, ass er Aerwet haett,
un Kunne weit un breet,
un ass es immer badde sett,
wu ebber glaawe deet.

Er iss wohl net so’n feiner Mann,
wie’n Dokter, glatt balwiert,
sei Schtobblebart iss dann un wann
mit Duwacksbrieh verschmiert.

Doch iss mol eener grank un schwach,
den hot er glei viel besser;
do brauch er aa kee Doktersach
un aa mol gaar kee Messer.

Er grummelt yuscht so var sich hie,
er fuschbelt mit de Haend,
mer meent, mer kennt aa heere, wie
er hoche Name nennt.

Noh fangt er widder vanne aa,
Ya, dreimol geht er driwwer,
un dann, mit allem drum un draa,
do iss die Sach veriwwer.

Mit heechschte Name - alle Drei! -
so schlaagt er sich dann darich:
Nau saag, wu grickt er des dann bei?
Er hot’s net vun de Karich!

Ya, well! Des Ding maag sei, wie’s will, -
deel glaawe gaar net draa;
bei dene iss mer besser schtill,
do kaemt mer schlecht mit aa.

Der Dokter halt mer noch im Haus,
mer weess net, wie’s noch geht;
doch find mer nau mol endlich aus,
wer do noch ‘s meenscht verschteht.

Watt eener g’sund, dann sehnt mer ei,
der Braucher hot’s geduh;
un geht er doot, dann schiebt mer’s glei
dem Dokter in die Schuh.

Mer deete gleiche wisse, eb ebber vun unser Leser noch ebbes weess vun „Braucherei". Schickt uns mol en „Post" zu unser „Forum" vun „hiwwe-wie-driwwe.de".

Sell schreibt der Michael Werner,
ass noch kenn Braucher g’sehne hot un froh iss, wann er kenn Braucher brauche duht!


Beitrag erstellt 06:35 |
Link

8.7.03

1.7.03
Dihr liewe Leit hiwwe wie driwwe,

Oh was hemmer fer en Hitz alleweil bei uns. Mer grickt schiegaar keen Luft meh fer zum schnaufe. Die Kinner huppse in yedes Wasser, wu se finne, un die Alte hocke schee ruhich unnich die groosse Beem in die Schtettel.

Ya, un mir, so middes drin im Lewe, hocke aryets in en Affis un schwitze, bis mer neegscht kenn Wasser meh in uns drin henn. Sell iss verleicht ebbes!

Awwer's hot doch noch meh Leit, wu sell Wedder verleicht gleiche: All die US-GIs un ihr Familie in Heidelberg, Ramstein, Wiesbaden, Dexheim, Hanau un wu sie all wuhne gucke vaschich zu July 4 fer en guudi Zeit hawwe. Sie welle verleicht fer en Picnic zammekumme, en Barbecue hawwe odder ebbes wie sell. So hoffe mer, ass es Wedder net brecht, bis seller Daag rum iss.

Heit welle mer en Gedicht drucke vum Charles C. Ziegler (1854-1930). 'S heesst:

Draus un deheem

Oft, wammer weit iss vun deheem
Kumme Gedanke iwwer ehm,
Wie mer's deheem so guud hot g'hatt,
Un wie die Mammi oft ehm g'saat:
"Waart - draus iss net deheem!"

Mir Buwe henn als yuscht gelacht
Un unser G'schpuchte fattgemacht;
Vun heem geh henn mer net geahnt,
Nau bin ich's awwer guud bekannt -
Draus iss net deheem.

Ich bin getraewelt iest un west,
Bin zimmlich iwwerall gewesst,
Hab Heiser g'funne, schee bequem,
Kee Hatze awwer wie deheem -
Draus iss net deheem.

Bleib, bleib deheem, oh Kind! Es Nescht
Fer's Veggeli iss doch's allerbescht;
Draus in der raue, weide Welt
Sinn Schtarm un Blitz un groossi Kelt -
Ach, draus iss net deheem.

Sell schreibt der Michael Werner,
ass hofft, ass alli Schteetser en hallicher July 4 henn.

Beitrag erstellt 09:06 |
Link

24.6.03

15.6.03
'S KATZ DEITSCH SCHTICK

Dihr liewe Leit hiwwe wie driwwe,

Nau iss der Summer nimmie weit, un sell gemahnt mich draa, wie schee die Welschkannfelder gucke im pennsylvaanisch-deitsch Land. Wie gleich ich sell: Wann die Arewet all g’schafft iss am Owet, uff der Bortsch vun en schee Bauerei zammehocke mit gudi Freind, deitsch schwetze un watche, wie der Wind schpielt mit ‘em Welschkann, ass waxt uff’m Feld. Un wann der recht Daag do iss, watt’s all gemeeht. Ich hoff, ass ich sell ball mol widder sehne kann. Heit drucke mer en Gedicht vum Meehe, ass der Parre Eli Keller(1825-1919) g’schriwwe hot baut hunnert Yaahr zerick:

‘S Meehe mit der deitsche Sens

In unsrer Zeit geht’s Meehe guud:
Mer nemmt die Geil,
Do geht’s in Eil,
‘S koscht net viel Mieh un net viel Mut.
Mer macht’s sich leicht un heesst es schmaert,
So sinn die Leit
In unsrer Zeit -
Was net viel koscht iss - recht viel waert!

‘S waar net so leicht in alder Zeit:
Was hot mer g’schwitzt
Un sich verhitzt -
Waer’s recht versucht, der weess noch heit!
Un doch waar’s Fann, die werri Tschaens
Hot mer sich g’sucht
Un net geruht
Zu meehe mit der deitsche Sens!

Wann endlich mol der Daag iss kumme,
Der lengscht schun waar beschtimmt,
Hot yedes frieh sei Sens genumme
Un fasstreet - abgetrimmt.

Glopp, glopp, glopp -
Hinner’m Haus, uff ‘me yede Block:
Glopp, glopp, glopp,
Uff’me schmaale odder breede Schtock;
Was waar’s en Geglebber,
En G’schpautz un en G’schnebber,
En Gewenn un Gedreh -
Mit der Hand un mit de Beh!
Glopp, glopp, glopp -
Yedi deitschi Sens dengelt mer sich raus,
Glopp, glopp, glopp,
Vanne vum Schpitz bis ganz hinnenaus.

Dann iss mer nei ins Haus zum Esse,
En yedes hot gelacht -
„Nau helft eich selwer!" hot es g’heesse,
Un - so hot mer’s gemacht!

Rischdich ziehgt mer dann ins Feld,
Yedes weist sich wie en Held -
Hengt der Tschaecket uff,
Schtrippt die Aermel nuff;
Sie wehle all ihr Bletz,
Mit Hanner an de Letz,
Mit Wasser un mit Schtee -
Was guckt doch des so schee -
Die helle Sense,
Guck, wie sie glense!

Tu witt, tu watt -
Tu witt, tu watt, tu weet,
„Mach’s yuscht fasstreet!"
Tu witt, tu watt.

Guck! Die Sunn kummt aa herbei,
Schenner kennt’s ya gaar net sei:
Frischi, glaari Luft,
Beem un Graas voll Duft;
In so’re scheene Zeit
Watt ehm sei Hatz recht weit;
Die aarme Schtedtlerleit,
Die wisse nix vun Freid -
Schwenkt eier Sene
Un losst sie glense!

Tu witt, tu watt,
Tu witt, tu watt, tu weet,
„Macht’s yuscht fasstreet."
Tu witt, tu watt,

„Guud gewetzt iss halb gemeeht!"
Der vedderscht Meeher nemmt sei Sens,
Hebt sie hoch un - tschumpt die Fens -
Hackt mol ei un meeht sich aa,
Annre sinn dicht hinnedraa:

Sense rausche,
Meisscher lausche,
Hummler brumme:
„Losst sie kumme!"
Hackt nidder aus un nidder ei,
Schtreckt eier Aerm un losst eich nei -
‘S Meehe muss gelannt sei!

Des iss g’wiss en scheeni Rei,
Menner, Buwe sinn debei,
Yeder frisch, mit guuder Bruscht,
Halde Schtreech, des iss en Luscht!

Hie un widder,
Uff un nidder,
Yeder wehrt sich,
Schwenkt un kehrt sich:
Hackt nidder aus un nidder ei,
Schtreckt eier Aerm un losst eich nei -
‘S Meehe muss gelannt sei!

Guck yuscht, wie sinn mir so vergniegt,
Yedem schmunzelt sei Gesicht -
Schtill un ruhich geht’s dohie -
Des gebt Fudder fer des Vieh!

Dausend Helmcher,
Blummerkelcher,
Zaart un seftich,
Siee un greftich.
Hackt nidder aus un nidder ei,
Schtreckt eier Aerm un losst eich nei,
„’S Meehe muss gelannt sei!"
Halt nau mol aa un guck zerick,
Des waar schun en gudi Lick;
Wetzt emol un schnauft debei -
Wetze, des muss efters sei:

Tu witt, tu watt -
Tu witt, tu watt, tu weet;
Ihr macht’s fasstreet -
Tu witt, tu watt,

Guud gewetzt iss halb gemeeht!

Ya, die Leit henn Yaahre zerick g’wisst, wie mer schafft. Awwer wann ich die
Baure hiwwe wie driwwe beguck, henn sie aa heit noch blendi zu schaffe im Haus
un uff’m Feld. Deel Leit henn als g'sunge "Ich wott, ich waer en Bauer" - ich
weess net, eb sie recht bedenkt henn, wie hatt selli Leit aa heit noch schaffe
misse.

Mer schicke en Gruuss an alliebber im alde un im neie Land - und desmol abbadich
zu die Baure.

Michael Werner

Beitrag erstellt 16:45 |
Link

8.6.03

1.6.03

23.5.03

15.5.03
'S KATZ DEITSCH SCHTICK

Dihr liewe Leit,

Nau nemmt’s nimmie lang, un mer welle bei uns en nei Society ans geh gricke - der „Deutsch-Pennsylvanische Arbeitskreis“ (German-Pennsylvanian Association). Paar Leit, wu geindresst sinn in was am aageh iss in die pennsylvaanisch-deitsch un die paelzisch Gemeeschaft, kumme zamme am 31. Moi in Ober-Olm. Meh Information kammer finne in unser „Forum“.

Paar Daag zerick hot’s aa en grooss Versammling gewwe an Kutzeschtettel University. ‘S sinn en latt „Muderschprooch-Schulmeeschter“ zammekumme un henn g’schwetzt iwwer ihr Arewet. ‘S waer schee, wann ebber, wu debei waar, mol en „Post“ schicke deet zu unser Forum un verzehle, was ‘xactly Blatz g’numme hot, so ass aa alle B'sucher vun "hiwwe-wie-driwwe.de" sell lese kenne.

Heit welle mer yuscht en katz Gedicht drucke vun Louise Adeline Weitzel (1862-1934). Sie waar gebore in Green Bay (Wisconsin), hot awwer in Lititz (PA) g’wuhnt neegscht all die Zeit vun ihr Lewe:

Wu fehlt’s

Kariche, Kariche iwwerall
Un wennich Relichion;
En Schulhaus schteht an yedem Eck,
Un Dummheit uff’em Droon.

Die Zeide warre besser,
Der Mensch bleibt awwer schteh;
In Schpeit vun Fattschritt allerhand,
Er ennert sich net meh.

Vun Gammle, Matt un Diebschtahl
Do iss die Zeiding voll,
Bis mer ebmols gaar net weess,
Was mer denke soll.

Der Drucker vun "Hiwwe wie Driwwe" gleicht alsemol aa nimmie die Zeiding lese am Maryie. Awwer's gebt aa noch guudi News: 'S nemmt nimmie lang, noht iss der Summer do - un sell iss aa ebbes, denkscht net?

Michael Werner



Beitrag erstellt 08:08 |
Link

9.5.03

1.5.03
'S KATZ DEITSCH SCHTICK

Dihr liewe Leit,

Der Moi iss do un die Leit draus im Land sinn bissi fer ihr Gaardeschtufft aus die Scheier gricke. G’meenerhand gebt’s am Wochend die erschte Barbecue-Owede odder Picnics am Sunndaag. Un die Kinner welle am Owed nimmie in die Schtubb. Sie gleiche draus rumschpringe, so watt’s allfatt hadder sie ins Bett gricke, wann’s Zeit iss fer sie.

Heit welle eens vun die Gedichte drucke, wu am beschte bekannt sinn in Pennsylvania Dutchland. Henry Harbaugh’s „Heemweh". „Parre Herbach" waar gebore in 1817. Sei Voreldre waare aus die Pfalz kumme naach Pennsylvani en ganzi Zeit, eb er gebore waar.

Heemweh

Ich weess net, was die Ursach iss -
Weess net, warum ich’s duh:
‘N yedes Yaahr mach ich der Weg
Der alte Heemet zu;
Hab weiter nix zu suche datt -
Kee’ Arebschaft un kee’ Geld;
Un doch treibt mich des Heemgefiehl
so schtarick wie alle Welt;
Noht schtaert ich ewwe ab un geh,
Wie owwe schun gemeldt.

Wie neecher, dass ich kumm zu Ziel,
Wie schtaricker will ich geh,
For ebbes in mei’m Hatz watt letz,
Un duht m’r greislich weh.
Der letschte Hiwwel schpring ich nuff,
Un eb ich drowwe bin,
Schtreck ich mich uff, so hoch ich kann
Un guck mit Luschte hin;
Ich seh ‘s alt Schteehaus darich die Beem,
Un wott, ich waer schun drin.

Guck, wie der Kicheschannschtee schmokt -
Wie oft hab ich sell g’seh,
Wann ich draus in de Felder waar,
‘N Buwele, yung un glee.
Oh, sehnscht die Fenschterscheiwe datt?
Sie guck’n rot wie Blut;
Hab oft kunsiddert, doch net g’wisst,
Dass sell die Sunn so duht.
Ya, manches weess ‘n Kind noch net -
Wann’s deet, waer’s aa net guud!

Wie gleich ich selle Babble-Beem,
Sie schtehn wie Brieder dar;
Un uff’m Gippel - g’wiss ich leb!
Hockt alleweil ‘n Schtaar!
‘S Gippel biegt sich - guck, wie’s gaunscht -
‘R hebt sich awwer fescht;
Ich seh sei rote Flieggel pleen,
Wann er sei Feddere wescht;
Will wette, dass sei Fraale hot
Uff sellem Baam ‘n Nescht!

Oh, es gedenkt m’r noch ganz guud,
Wu selle werri Beem
Net greesser als ‘n Welschkannschtock
Gebrocht sinn warre heem.
Die Mammi waar an’s Granddads g’wesst,
Datt waare Beem wie die;
Drei Wipplein hot sie mitgebrocht,
Un g’saagt: „Datt blanscht sie hie."
M’r henn’s geduh - un glaabscht du’s nau -
Datt selli Beem sinn sie!

Guck! Wariklich, ich bin schier am Haus! -
Wie schnell geht doch die Zeit!
Wann m’r so in Gedanke geht,
So weess m’r net wie weit.
Datt iss d’r Schapp, die Welschkannkripp,
Die Seiderpress datt draus;
Datt iss die Scheier, un datt die Schpring -
Frisch quellt des Wasser raus;
Un guck! Die seem alt Klapboard-Fens,
Un’s Deerle vor’m Haus.

Alles iss schtill - sie wisse net,
Dass ebber Fremmes kummt.
Ich denk, der alte Watsch iss doot,
sunscht waer er rausgedschumpt;
For er hot als verschinnert g’brillt,
Wann er hot’s Deerle g’heert;
Es waar de Traew’lers greislich bang,
Sie warre ganz verzehrt:
Kee G’faahr - er hot paar Mol gegauzt,
Noht iss er umgekehrt.

Alles iss schtill - die Deer iss zu!
Ich schteh, besinne mich!
Es rappelt doch en wennich nau
Datt hinne in der Kich.
Ich geh net nei - ich kann noch net!
Mei Hatz fiehlt schwer un krank;
Ich geh ‘n wennich uff die Bortsch
Un hock mich uff die Bank;
Es seht mich niemand, wann ich heil
Hinner der Drauwerank!

Zwee Bletz sinn do uff dere Bortsch,
Die halt ich hoch in Acht,
Bis meines Lebens Sonn versinkt
In schtiller Doodesnacht!
Wu ich vum alte Vadderhaus
‘S erscht mol bin gange fatt,
Schtand mei Mammi weinend da
An sellem Riggel datt;
Un nix iss mir so heilig nau
Als grade seller Ort.

Ich kann ‘se heit noch sehne schteh,
Ihr Schnuppduch in d’r Hand;
Die Backe rot, die Aage nass -
Oh, wie sie doch do schtand!
Datt gab ich ihr mei Faerewell,
Ich weinte, als ich’s gab,
‘S waar’s letschte Mol in dere Welt,
Dass ich’s ihr gewwe hab!
Bevor ich widder kumme bin,
Waar sie in ihrem Grab!

Nau, wann ich an mei Mammi denk,
Un meen, ich deet se seh,
So schteht sie an dem Riggel datt
Un weint, weil ich weck geh!
Ich seh sie net im Schockelschtuhl!
Net an keem annere Ort;
Ich denk net an sie als im Grab:
Yuscht an dem Riggel datt!
Datt schteht sie immer vor meim Hatz
Un weint noch liebreich fatt!

Was macht’s, dass ich so datt hieguck,
An sell End vun der Bank!
Weescht du’s? Mei Hatz iss noch net doot,
Ich weess es, Gott sei Dank!
Wie manchmal saass mei Daadi datt,
Am Summer-Naachmiddag,
Die Haende uff der Schooss gekreizt,
Sei Schtock beiseite lag.
Was hot er datt im Schtille g’denkt?
Wer mecht es wisse - saag?

V’rleicht iss es ‘n Kindheetsdraam,
Das ihn so sanft bewegt;
Odder iss er’n Yingling yetz,
Der scheene Plane legt?
Er hebt sei Aage uff yuscht nau
Un guckt weit iwwer’s Feld;
Er seht v’rleicht d’r Karichhof datt,
Der schun die Mammi haelt!
Er sehnt v’rleicht naach seiner Ruh
Datt in der bessere Welt!

Ich weess net, soll ich nei ins Haus,
Ich zitter an d’r Deer!
Es iss wohl alles voll inseid,
Un doch iss alles leer!
‘S iss net meh heem, wie’s eemol waar,
Un kann’s aa nimmie sei;
Was naus mit unsere Eltere geht
Kummt ewig nimmie nei!
Die Freide hot der Doot geaernt,
Des Drauerdeel iss mei!

So geht’s in dere rauhe Welt,
Wu alles muss vergeh!
Ya, in der alte Heemet gaar
Fiehlt m’r sich all allee!
Oh, wann’s net vor der Himmel waer
Mit seiner scheene Ruh,
Dann waer m’r ‘s do schun lang verleedt,
Ich wisst net, was zu duh.
Doch Hoffnung leichtet meinen Weg
Der ew’gen Heemet zu.

Datt iss’n schee, schee Vadderhaus,
Datt geht m’r nimmie fatt;
Es weint kee guudi Mammi meh
In sellem Freideort.
Kee Daadi sucht meh for’n Grab,
Wu, was er lieb hot, liegt!
Sell iss kee Elendwelt wie die,
Wu alle Luscht bedriegt;
Datt hot des Lewe ewiglich
Iwwer der Doot gesiegt.

Datt find m’r, was m’r do verliert,
Un b’halt’s in Ewigkeit;
Datt lewe unsre Doote all
In Licht un ew’ger Freid!
Wie oft, wann ich in Druwwel bin,
Denk ich an selli Ruh,
Un wott, wann’s nor Gott’s Wille waer,
Ich ging ihr schneller zu;
Datt waart ich, bis mei Schtindle schlaegt,
Noht saag ich - Welt, adju!

Der Henry Harbaugh hot net zu lang waarte misse, bis er in sei „ewig Heemet" gange iss. Sell Gedicht waar g’schriwwe aafangs vun die 1860s, un in 1867 iss er g’schtarewe - yuscht 50 Yaahr alt waar er an seller Zeit.

Net misse dareft ihr den Munet die „HwD Web Class" vun Alice Spayd. Sie legt aus, wie mer die Zeit saagt in Pennsylvaanisch-Deitsch. Un im „HwD Web-TV" verzehlt der Virgil Shrock - er iss in Pennsylvaanisch-Deitscher, wu nau in Paris (France) wuhnt -, wie er Elbedritsche g’fange hot Yaahre zerick. Un mer henn aa widder en neier „HwD Webradio Programm" vum Paul Bittner.

Macht’s guud
un duht nix, ass ich net deet.

Michael Werner

Beitrag erstellt 09:23 |
Link

23.4.03

15.4.03
'S KATZ DEITSCH SCHTICK

Dihr liewe Leit hiwwe wie driwwe,

Ball iss Oschtre widder do, un mer welle hoffe, ass die Kinner hiwwe wie driwwe noht aa alli Oyer finne. ‘S waer schaad drum. In unser Gallery duh mer die Daage en nei Pickter, ass der Peter Fritsch vun Alburtis (PA) gemolt hot zehe Yaahr zerick. ‘S iss en wunnerbaar Oschtre-Kaard. Guckt sell mol uff.

Un heit welle mer aa en Gedicht drucke, ass ebbes zu duh hot mit Oschtre. ‘S waar g’schriwwe beim Dr. Frank R. Brunner (1835-1908). Er waar gebore in Greshville (Baricks Kaundi, PA) un waar seilewes en Dokter.

Oschtre

Wie neegscht sinn schun die Oschtre do!
Sie kumme alle Yaahr;
Sell macht die Kinner all so froh,
Des iss gewisslich wahr.
Es wunnert mich aa net, wann’s duht,
Die Oschteroyer sinn so guud.

Wer legt die Oschteroyer dann?
Der Haas, so saagt mer als.
Er nemmt so viel mit, wie er kann
Im Kessel an seim Hals.
Er kocht un farebt sie datt drin,
Mit Kattuh odder Zwiwwlerinn.

Wie dauert mer die Haase doch
Im kalte Winterschnee;
Sie sitze aryets im’me Loch
Odder in Haufe Schtee,
Un schlofe mit de Aage uff,
Bis ebbes kummt, noh sinn sie uff.

Wann Schitz winters die Haase schiesse,
Sinn oft die Kinner bees;
Sie dauere sie, sinn net gepliest
Mit so Leit uff Tschaes;
Die Haase lege jedem en Oy
In’s Nescht gemacht mit Schtroh un Hoi.

So ball, dass es naach Oschtre geht,
Noh iss aa ‘s Friehyaahr do;
Sell meent, dass alles nau uffschteht,
Watt grie, bleibt nimmie groo.
Noh waxe aa die Haase am best,
Un wer sie schiesst, der watt gerest.

Wann Newwel schmokt am Barick datt,
Dann weess mer, was sell meent;
Sie koche noh ihr Oyer datt,
Noh denkt mer, eener keemt;
Un wann’s aa net ganz Oschtre iss,
Macht mer sich reddy - ya gewiss.

Un wann der Daag vor Oschtre kummt,
Do watt gerischt un g’schafft;
Die Haase sinn all rausgedrummt,
Un reddy fer die Nacht;
Die Oyer henn sie all im Sack,
En yeder hot en grosser Pack.

Sie dschumpe um die Haiser rum,
Un finne yedes Nescht;
Ihr Weg iss oftmols lang un krumm,
Doch duhne sie es bescht.
Sie finne oft die Buwe erscht,
Doch griege oft die Meed es mehrscht.

So ball mir mol g’sehne henn
En Oy in yedem Nescht,
Hot yedes g’sagt: „Ich wett, ich hab
Es greescht, es schenscht, es bescht."
Noh henn mer glei gepickt, gepickt,
Bis yedes en verbrochenes grickt.

Fer Yaahre lang henn Haase yuscht
Fer yedes eens gebrocht;
Nau grickt mer viel, es iss en Luscht,
Sie sinn aa all gekocht.
Deel sinn so schee un zuckersiess,
Aa Choclate-Haase mit vier Fiess.

Deel leie in de Neschter schee,
Un sinn guud uffgefixt;
Un annre hocke uff de Bee
Un henn ihr Ohre g’schiptzt.
.
So guude Haase waare rar,
Wie ich en glener Schpringer waar.

Kee Wunner sinn die Kinner bang,
En Hund fangt mol ihr Haas;
kee Wunner watt die Zeit so lang,
Un wisse net, ferwas.
En Zuckerhaas mit Choclate-Haar -
Den liebt en Kind vun Yaahr zu Yaahr (...).

Mer winsche alliebber en halliches Oschterfescht un blendi bunte Oyer.

Michael Werner


Beitrag erstellt 20:48 |
Link

8.4.03

1.4.03
'S KATZ DEITSCH SCHTICK

Dihr liewe Leit,

‘S Wedder watt alli Daag besser nau, un mer kann sehne, wie alles waxt rund ums Haus. Nau, iss sell net ebbes? Die Baure schaffe aryets draus im Feld, un die Weibsleit gricke der Gaarde in Adder in die ganz Nochberschaft. Un ich? Ich fiehl yuscht en wennich mied der ganz Daag. Awwer sell macht verleicht aa die „schnell Zeit", wu mer widder grickt henn ‘s letscht Wochend. Do henn sie uns widder en Schtunn weckgenumme mittes in die Nacht, un die fehlt mer nau bis Oktower, wu mer sie widder gricke. Die Amische gehne der recht Weg: Sie bleiwe bei ihr „langsami Zeit" der ganz Summer, ‘s macht nix aus, was die annre Leit am duh sinn.

Heit hemmer widder unnerschiddliche neie Programs uff unser Gewebb-Blatt, ass mer weise welle zu unsere Leser: Die Alice B. Spayd gebt uns ihr zwett Lesson in die „HwD Pennsylvaanisch-Deitsch Webclass". Im Paul Bittner sei „HwD Webradio" kennt dihr en Schtorie abhariche vun die „Greitzweg Nochberschaft" - ‘s heesst „Der Kreemer", un in unser „HwD Web-TV" lest der Joshua Brown vun Emmaus (PA) ‘s Gedicht „Der Mensch", ass g’schriwwe waar beim Ernest Waldo Bechtel Yaahre zerick. Mer winsche blendi G’schpass.

In unser Kalemn, ass mer alli zwee Woche an dem Blatz drucke, welle mer heit en Gedicht gewwe, ass heesst: „Friehyaahr iss do". Sell waar g’schriwwe beim Ralph Samuel Funk (1889-1969):

Friehyaahr iss do

Was bin ich so froh!
Des Friehyaahr iss do,
Un’s Wedder iss widder genehm;
Glei guckt die Wiss schee
Mit Blumme vum Glee -
Un Bledder sinn haus uff de Beem.

‘S iss alles so grie,
Mer sehnt schier net wie
Schlagt alles so g’schwind widder aus;
Es scheint yuscht en Blick -
En katze Zeit z’rick -
Do dobt als der Winter noch draus.

Der Piewie, der singt,
Un Luscht widder bringt
Fer schaffe im Gaarde un Feld;
Mer henkt uff der Bock
Der Wammes un Rock,
Sex Munet bis kummt widder Kelt.

Was lacht die Nadur,
Un des iss bischur
Wege Showers, April bringt rei;
Un datte die Runn,
Die glaenst in der Sunn,
Weil sie laaft an meim Haus verbei.

‘S iss noch en Blessier,
Die root ich dir -
‘S iss Fische geh draus an der Grick;
Mit Warrem odder Fly,
Die Fisch sinn net schei,
Un Geduld bringt immer sei Glick.

Nau der ‘s in’re Fix
Wu wohnt, wu iss nix
Wie Gebeier uff aller Hand;
Bin liewer gewiss,
Wu frische Luft iss -
Uff der Bauerei draus im Land.

Wie g’saat, bin ich froh,
Des Friehyaahr iss do,
Un Gricksel un Hawwergees singt,
Frosch, Amschel un all -
Mei Hatz verschpringt ball,
Wann ich denk an die Segen, es bringt.

Mer hoffe, ass ‘s aa in die Schteets schun wennich waarm iss. In Kanadaa iss ‘s Friehyaahr verleicht noch net do. ‘S letscht Mol, ass mer in Ontario waare, hot’s g’schneet noch im Moi. Awwer Geduld - ee Zeit hot der Winder aa datt en End.

Michael Werner



Beitrag erstellt 06:39 |
Link

23.3.03

15.3.03
'S KATZ DEITSCH SCHTICK

Dihr liewe Leit,

heit welle unser Leser en nei „Section" vun unser Gewebb-Blatt weise: Mer henn net yuscht Paul Bittner’s "Hiwwe wie Driwwe Webradio" online un em Rutschich Butch - Keith Reigart - sei "Deitsch Kalemn" alli Munet im Forum - nee, nau hemmer ganz nei aa Alice Spayd’s "Hiwwe wie Driwwe Webclass", wu mer mit die Zeit meh un meh pennsylvaanisch-deitsch lanne kann. "Lesson 1 (Pennsylvania German Phrases)" kennt dihr nau abhariche.
Mer sinn aarick froh, ass mer mit selli Leit zammeschaffe kenne. Sie helfe mit, ass die Mudderschprooch net zu nix geht - un ass mer sie aa lese un heere kann im weltweit Gewebb. Grooss Dank!

Die Daage warre laenger nau, un’s Wedder watt allfatt besser. So welle mer heit noch en Gedicht drucke, ass g’schriwwe waar beim William Harvey Erb (1870-1940). ‘S heesst:

Die Mammi hot der Schnubbe

Die kalde Daage sinn verbei,
Des Wedder watt als schenner;
Es sinn noch Brotwascht uff der Schtang,
Un Sauergraut im Schtenner.
Die Veggel kumme schun zerick,
Sie kumme heem in Drubbe,
Un alles waer so guud un recht,
Yuscht die Mammi hot der Schnubbe.

Un alles zawwelt, alles lebt,
Mer sieht die Schnooke fliege;
Die Hahne greehe luschtich laut,
Die Glucke welle briehe.
Voll Keepers sinn die yunge Leit,
Ihr Kepp voll dumme Nubbe;
Mer deet nix saage vun so Dings,
Yuscht die Mammi hot der Schnubbe.

Mer fiehle guud, mer sinn all g’sund,
Mer henn gaar nix zu glaage;
Mer esse alles, was ehm schmeckt,
Mer henn en guuder Maage.
Der Daadi hot en nei bloo Hemm
Mit gleene rote Dubbe;
Yuscht er kann net schpaziere geh,
Die Mammi hot der Schnubbe.

Die Amschel singt im Abbelbaam,
So luschdich, mer kennt danze;
Der Saamesack watt rumgewiehlt,
Mer welle Zwiwwle blanze;
Die Kinnder schpiele in dem Hof,
Un leer sinn all die Schtubbe;
Was waer des doch en ruhichi Welt,
Yuscht die Mammi hot der Schnubbe.

Des Gras iss grie, der Himmel bloh,
Un hallich waer des Lewe;
Yuscht immer kummt en gleeni Mick
Un fallt ehm in die Greewi.
Wer Warrem will fer fische geh,
Der muss fer Warrem grubbe;
Un sell waer net so aarick schlimm,
Yuscht die Mammi hot der Schnubbe.

In Deitschland henn en latt Leit der Schnubbe alleweil, un bei uns deheem singe die Meedlin „Der Daadi hot der Schnubbe". ‘S iss net schee, wammer en Kalt g’fange hot, awwer nau kummt’s Friehyaahr, un alles watt besser. Sell schreibt der

Michael Werner




Beitrag erstellt 08:30 |
Link

8.3.03

1.3.03
'S KATZ DEITSCH SCHTICK

Dihr liewe Leit,

mer henn Faasnacht alleweil in die Pfalz, un sell meent, ass alliebber narrisch uffgedresst am rumschpringe iss in die Schtettel - abbadich in die Gegend, wu ich nau wuhn, net zu weit weck vun Mainz. Yaahre zerick henn sie, denk ich, Faasnacht aa gegliche - awwer’s waar doch en wennich annerscht wie heit. Do kennt dihr lese, was der William Harvey Erb (1870-1940) g’schriwwe hot vun Faasnacht in Pennsylvania. Der seeme Weg henn sie Faasnacht g'hatt in de Pfalz Yaahre zerick:

Faasnacht

Sie tschumpe aus’em waarme Bett,
Sie schtehne uff minanner,
Sie duhne’s schnell un duhne’s gleich,
Des eent graad wie des anner.

Sie schparre ihre Meiler uff,
Henn Schloofdreck in de Aage,
Un well es aerscht waar aus’em Bett
Iss net so leicht zu saage.

Nau kenns will gaern die Faasnacht sei,
Wann sie es helfe kenne;
Sie dummle sich als wie verrickt,
Sie huddle un sie renne.

Die Mammi reisst die Schloofkapp ab,
Die Schtrimp kann sie net finne;
Sie fischbelt uff’em Boddem rum
Un duht die Naas verschinne.

Der Daadi schlubbt ganz unnich’s Bett,
Sie Iwwerhosse suche,
Un bumpt verdollt sei blodder Kopp,
Es macht ihn schier gaar fluche.

Er kleemt, er waer aerscht uff gewesst,
Sie secht, er deet ya liege;
Er schleeft die Hosse hie ans Bett,
Un duht sie schnell aaziehge.

Well aerscht uff waar, des weess mer net,
Sie duhne als noch schtreide;
Sie retze nanner der ganze Daag,
Un henn recht guude Zeite.

Un endlich hocke sie am Disch,
Sie dunke un sie lache;
‘S sinn blendi Faasnachtkuche datt,
Kann niemand bessre mache.

Nau, niemand will die Faasnacht sei,
Ferwas, kann niemand saage;
Es iss en Schand, so kleeme sie,
Doch gaar net schwer zu draage.

Mer henn B’such g’hatt vun Poland an dem Wochend, der Dr. Waldemar Szastak. Er iss en hochg’lannter Kall, wu die pennsylvaanisch-deitsch Schprooch am schtudiere iss. Am Mariye waar er der letscht, wu wacker warre iss, so denk ich, ass er die „Faasnacht" waar bei uns in dem Yaahr. Awwer mer henn ihn net geretzt dewehe.

Vergesst net, em Paul Bittner sei „Hiwwe wie Driwwe Webradio Program" abzuhariche. Im „Matz Program" hot er en lang Radio Schtick vun „Assebe un Sabina" druff, un sell iss wunnerbaar.

Sell schreibt der Michael Werner,
wu froh iss, ass die narrisch Zeit ball widder zum End kummt.

Beitrag erstellt 10:11 |
Link

23.2.03

15.2.03
'S KATZ DEITSCH SCHTICK

Dihr liewe Leit,

Der Winter iss als noch net verbei, un ’s will schiergaar net waarmer warre. ‘S iss en Elend. Die Kinner henn widder en Kalt g’fange g’hatt yuscht paar Daag zerick, un sell nemmt en Weil, bis sie widder ganz g’sund sinn.

Alliwwer in die Welt sinn die Leit alleweil am dischbediere, eb mer feschte sett ge-ich der Saddam in Iraq - odder verleicht net. Ich will net zu viel schreiwe vun sellem - sell iss der Blatz net fer ebbes wie sell schtaerte. Inschtatts vun sellem drucke mer yuscht ’n Deel vun en Gedicht, ass g’schriwwe waar beim Harvey M. Miller (1871-1939) zwischich 1915 un 1917. Sei Feddername waar „Solly Hulsbuck".

Gott helf em Unkel Sam

Sie fechte draus im alte Land,
Sie fechte uff’em See,
‘S iss Marderei uff allehand
Mit Bixe grooss un glee,
Es dunnert datt in alle Eck,
Mer kenne dankbaar sei
Deheem, dreidausend Meil eweck
Vun so’re Butcherei.

Doch bloosse Kalls in unser’m Land
Vun „national honor" heit,
Graad wie sie henn im alte Land
Zurick kenn lange Zeit.
Un was iss seller „honor" nau?
Nix ass en hellisch Schand,
En bidder Schtroof, mer meent somehow
Der Deiwel het’s in Hand.

Des English Watt - was iss es dann?
Wu kummt der „honor" nei?
Iss sell’s? - Krakele, wu mer kann?
Hunger un Marderei?
Dn Deye draage in de Hand,
En Hatz voll bidder Schpeit,
Un Blut vergiesse iwwer’s Land,
Iss sell’s Watt „honor" heit?

Odder iss am End en bessre Weg
Fer Druwwel iwwerkumme,
Mit guud Verstand un unne Schleeg,
Un net emol verschunne?
Fer ehrlich aergere fer recht
Un alsemol driwwer beete
Iss greesser „honor" ass en Fecht
Mit Daya un Muschkete. (...)

Sell schreibt der Michael Werner,
wu hofft, ass die Leit in Washington gudi Ohre henn fer heere, was en latt annri schmaerde Leit in Nei Yarick bei die UN saage.





Beitrag erstellt 09:09 |
Link

1.2.03
Dihr liewe Leit hiwwe wie driwwe,

Am zwett Hanning iss widder die Zeit fer die Grundsei wacker mache alliwwer in Pennsylvaani, Ohio, Illinois un anneri Schteets fer selli Gediere frooge, eb’s Friehyaahr ball kummt odder net: Sehnt en Grundsau ihr’n Schadde an sellem Daag, bleibt der Winter noch sex Woche - sehnt en Grundsau ihr’n Schadde awwer net, sinn die waarme Daage nimmie weit. Ich muss sell net verzehle, dihr kennt sell Grundsauwese besser wie ich.

Heit welle mer en Gedicht drucke vun die „Effridaa Dichterfraa", Gladys S. Martin. Sie waar gebore in 1937 un wuhnt in en glee Leen yuscht neegscht zu Ephrata, wu mer in die ganz Nochberschaft noch die Mudderschprooch schwetze kann. Sie hot en schee Bichli gepublisht in 1992 mit Title "Es Weibsmensch in der Schpiggel". Datt raus nemme mer’s Gedicht „Der Grundsau ihre Gedanke". Mer welle sie ehre un aa alli Grundsei, wu besser gegliche hette, noch en wennich laenger schlofe.

Der Grundsau ihre Gedanke

Ach mei, ich bin noch schlaeferich,
Awwer ich muss aus’em Bett.
Ass ich viel liewer schlofe deet,
Des glaawe die Mensche net.

Es iss der zwett vun Hanning,
So muss ich heit nausgeh
Fer Wedderberichte gewwe:
Watt’s glei waarm odder gebt’s noch Schnee?

Ich meen, die Mensche sette wisse,
Ass es middes Winder iss.
Awwer Leit sinn all so eiferich
Fer die Friehyaahrssunn, gewiss.

En g’scheiter Mensch sett wisse aa,
Unne all die Grundsei wecke,
Der Hanning iss en kaldi Zeit
Mit Schnee fer alles decke.

Doch die Mensche zaehle uff mich,
Sie gucke alli Yaahr,
Ass ich do aus meim Loch kumm
Un saag ne all, so wahr.

Yuscht wie die Widdring sei zaehlt,
Iss der Winder schier verbei?
Odder watt’s noch kalt un schtarmich?
Des kann ich saage glei.

Do naus zu geh middes Winder
Verleed mich wunnerbaar.
Awwer ich denk, des iss mei G’flicht,
Viel Leit sinn am gucke defor.

So schtehn ich uff un graeddel naus
Un guck e bissli rum.
Awwer ich tschump zerick in mei Bett,
Hot’s Rege odder Sunn.

Weil ich bin so en schmaerder Kall,
Es muss niemand schunscht mir saage,
Der Hanning iss net Friehyaahrszeit
Un des kannscht du mir glaawe.

Der Paul Bittner - „em Bubbie Bittner sei Bu" - hot uff seim „Hiwwe wie Driwwe Webradio Program" im Hanning der Richard Miller druff. Er iss am schwetze vun die Grundsei un lest aa etliche Gedichte in die Mudderschprooch. Sell iss ganz wunnerbaar - un dihr sett sell mol abhariche. Der Paul deet gern mol ausfinne, wie unser B’sucher unser Webradio gleiche. Dihr kenn sell schreiwe in unser Forum in die Category „Brieflin zu Hiwwe wie Driwwe". Datt kammer aa ebbes anneschreiwe, wammer mol ebbes Abbadiches gleiche deet zu heere in unser Webradio.

In unser Gallery hemmer nei en Pickter vum Program 1999 vun die "Grundsau Lodge No. 1 an de Lechaw". Datt kammer der President sehne vun die Schteets zu seller Zeit un was er als in sei Kopp g'hatt hot deel Zeit - 's waar net der Saddam ...

In unser „Hiwwe wie Driwwe Web-TV" hemmer in dem Munet der Manfred Dechert vun Ludwigshafen (Palatinate). Seller Kall hot im Harebscht 2002 der 50. „Mudderschprooch-Schreiwer Contest" in Bockenheim (Palatinate) gewunne. Er lest sei Gedicht „Kriech in meim Kopp", was meent in English „War in my Head". Dihr misst en „Real Player" odder en „Windows Media Player" hawwe fer sell MPG-File.

Net vergesse welle mer der „Rutschich Butch vun Yarick Kaundi", der Keith Reigart. Er iss en Pennsylvaanisch-Deitscher, wu alleweil in Deitschland wuhnt in en Schtettel neegscht zu Heidelbarick. Er schreibt nau allegebott en „Deitsch Schtick" in unser Forum, un mer sinn so froh, ass er aa mit uns zammeschafft.

En gudi Zeit zu alliebber hiwwe wie driwwe winscht der Michael Werner.



Beitrag erstellt 06:31 |
Link

15.1.03

1.1.03
Dihr liewe Leit,

Willkumm zu unser Heemetblatt „hiwwe-wie-driwwe.de" im Yaahr 2003. Mer winsche alliebber yuscht’s bescht fer die neegschte zwelf Munede, abbadich G’sundheet. ‘S nei Yaahr welle mer schtaarte mit der „Langschwammer Neiyaahrswinsch" (The Longswamp New Year’s Wish) vum Peter V. Fritsch aus Alburtis (PA). In Pennsylvaani waar’s der Gebrauch Yaahre zerick, ass Musiganter gezogge sinn vun Bauerei zu Bauerei in die Neiyaahrsnacht. Sie henn all die Familie en glicklich nei Yaahr gewinscht un aa ebbes Musick gemacht. Un ferschur henn sie aa ebbes zu drinke grickt am End. Der Peter - sei Elt iss 57 - hot uns verzehlt, ass sei Paep sell aa geduh hot fer Yaahre. Un nau hot er der Gebrauch uffgepickt un geht zamme mit paar annri Kalls und Weibsleit in die Neiyaahrsnacht zu die unnerschiddliche Bauereie in sei Gegend. Dihr kennt der „Neiyaahrswinsch" net yuscht lese - dihr kennt sell aa abhariche in unser „Hiwwe wie Driwwe Webradio" der ganz Yenner. Der Paul Bittner, "em Bubbie Bittner si Bu", hot der Peter Fritsch druff uff sei Deitsch Program. Un mer henn noch en Pickter, ass der Peter gemolt hot, in unser „Gallery". ‘S iss en Kaard mit der Neiyaahrswinsch, ass er als emol schickt zu Leit, ass er kennt, wann’s nei Yaahr schtaart.

Langschwammer Neiyaahrswinsch

Ich winsche dir un deini Hausfraa,
Soehni un Techter, Gnechti un Mechter,
Un alle in diesem Haus ein glickseeliches neies Yaahr.
Ich winsche eich all groosses Glick
Un alle Umglick weit zerick.
Des 2002 Yaahr geht aus in Namen Jesus Christ -
Weil des 2003 behanden ist.
Des aldes Yaahr geht nun dahie, dann fangen mir en neies an.
Weider winsch ich eich en hoch gelobtes neies Yaahr,
Bis ihr bekummet grohe Haar.
Mir gehn dohin un wandern
Vun einem Yaahr zum andern,
Darich viele Angscht un Plagen,
Darich zittriche Zeit un Zagen.
Darich Grieg un grosse Schrecken,
Was in unserem Welt bedecken.
Gott Lob un Dank, ass dieses Zeit -
Es iss erlaabt in Ruh un Friede.
Himmels Luscht, Gottes Wille, Gottes Geischt bleibt eich bewogen,
Bis ihr kummet in der Himmel geflogen.
Un eier Sitz, der bleibt bereit,
Datt in der ewich Seelichkeit.
Mir schtehne do, var eierm Dier, uff eierm Land,
Die Inschtrumenter in die Hand.
Wann mir raus die Inschtrumenter ziehgen,
Dann soll dihr heeren, des Neie Yaahr anschpielen.

Un naach sellem, wann die Musick schtaart, sinn mir am End fer heit.
Machet’s guud hiwwe wie driwwe, un bis ball.

Michael Werner

Beitrag erstellt 16:26 |
Link

15.12.02
Dihr liewe Leit hiwwe wie driwwe,

Mer sinn so froh, ass unser B’sucher ‘s „Hiwwe wie Driwwe Webradio" gleiche. ‘S henn schunt en latt Leit abgharicht, was der Leroy Heffentrager am schwetze un singe iss devun. Sitter heit hemmer aa en „Hiwwe wie Driwwe Web TV". Der Ron Hackett vun Wallenstein (Ontario) hot uns b’sucht, un dihr kennt nau sehne un heere, was er am duh iss im alde Land paar Daag eb Grischtdaag. Der Dr. Helmut Schmahl (Mainz, Germany) hot en E-Poscht g’schickt mit en pennsylvaanisch-deitsch Iwwersetzing vun die Grischtdaags-Schtori. Sell iss ebbes Abbadiches - un dihr kennt sell lese in unser Forum in die Category „Annere pennsylvaanisch-deitsche Schtories". Guckt yuscht mol rei. Heit welle mer awwer aa noch meh verzehle vum Belsnickel in Pennsylvania. Do iss en G’schicht, ass der Daniel Miller g’schriwwe hot in 1911:

Pennsylvanisch-deitscher Belsnickel

Frieher henn die pennsylvaanisch-deitsche Leit deel Gebreiche g’hatt, ass uns nau aardlich vorkumme. Uffkohrs viel vun dene Gebreiche sinn schun lang abg’schafft warre. Ich will en paar aafiehre:
Fuffzich Yaahr zerick iss der Belsnickel am Owet ver Grischtdaag rumgange un hot de Kinner Bresents gewwe. Er hot greislich geguckt, un die Kinner waare bang vor ihm. Er iss zum Haus neig’rennt kumme un hot gebollert zimmlich viel wie en Viergeilsfuhr uff’m Dreschdenn. Er hot en groosser Bart g’hatt mit’eme Sack uff’m Buckel un hot Belle aahenke g’hatt mit’ere Hickory-Gatt in de Hand. Er hot en paar Wadde gebrummelt un dann en Latt Kuche, Candy, kleene Schticker Brotwascht, Hickerniss un so Sache uff der Bodde g’schmisse. Die Kinner sinn uffkohrs devor g’schprunge, un dieweil sie uff ihre Knie waare fer die Sache uffzulese, hot der Belsnickel ihne mit seinre Gatt ihre Buckel gegarebt. Nochdem er en Paar g’schpassiche Kaepers gemacht g’hatt hot, iss er widder zum Haus naus un hot so viel Laerm g’macht wie meeglich. Die Kinner waare zimmlich vergelschtert, awwer sie henn’s enjoyed. Sie henn der ganz Owet uff ihn g’waart g’hatt, un die ganz Zeit hot eens odder’s anner zum Fenschter nausgeguckt un gewatscht. Uff emol henn die Kinner gegrische: „Do kummt er!" un alles waar in Exseitment.
Seller Gebrauch iss ausg’schtarewe, un am Blatz vum Belsnickel hot mer der Santa Klaus. Seller iss en grooss Impruufment. Er geht im Schlitte rum, ob’s Schnee hot odder net. Sei Schlitte watt gezogge vun vier Hasch, un sell geht schnell. Anschtatt owets geht er in der Nacht rum, graddelt darich der Schannschtee in’s Haus un fillt de Kinner ihre Schtrimp, wu sie uffg’henkt henn, mit Kuche, Zuckersach un allerhand scheene Sache. Ee Vordeel iss, ass mer dem Santa Klaus Brief schreiwe un ihm saage kann, was er de Kinner bringe soll. Oft bringt er Doll-Babies, Expresswaege, Schlitte un so Sach. Der alt Belsnickel iss schun lang doot, un der Santa Klaus verschteht die Bissniss viel besser.

Nau, sell waar’s erscht Yaahr vun unser Heemetblatt „hiwwe-wie-driwwe.de". Meh wie 10,000 Leit henn unser pennsylvaanisch-deitsch un paelzisch Schtofft schunt gelese in die Munete sitter Yenner. Mer welle hoffe, ass unser Freind hiwwe wie driwwe aa 2003 gleiche, was mer an dem Blatz drucke.

Mer winsche alliebber en hallicher Grischtdaag un en glicklich nei Yaahr.

Michael Werner

Beitrag erstellt 16:21 |
Link

1.12.02
Dihr liewe Leit hiwwe wie driwwe,

Henn dihr schunt aus’funne, ass ‘s ebbes Neies gebt uff „hiwwe-wie-driwwe.de"?

Sitter paar Daag hemmer en „Gallery" mit Pickter vun deitsche Blatzname un aa pennsylvaanisch-deitsche Schilder, ass mir odder anner Leit g’funne henn aryets in Pennsylvaani. Wann dihr meh Schtofft wie sell kennt, nemmt en Pickter un schickt’s zu uns, so ass mer’s ins weltweit Gewebb duh kenne.

Un mer henn sitter paar Daag aa en „Webradio" uff unser Heemetblatt. Wann dihr seller Button drickt, kennt dihr alleweil heere, was der Leroy Heffendrager am schwetze un singe iss devun. Sell Program bleibt „uff die Luft" bis zum End vum December, im Yenner welle mer noht en nei Program hawwe.

In die Pfalz iss „Nikolausdaag" nimmie weit. Der Nikolaus kummt December 6 (fer deel Leit iss der „Nikolaus" heit noch der Belsnickel - aa wann der „Belsnickel" Yaahre zerick yuscht en wieschter Kall waar, wu zamme mit’em Nikolaus in die Heiser kumme iss). Der Nikolaus bringt Bressends zu die Kinner - awwer yuscht, wann sie sich darich’s Yaahr guud beheeft henn. An Grischtdaag selwert kummt in die Pfalz ‘s „Grischtkind". Mer wisse, ass sell aa in Pennsylvaani kumme iss zu die Kinner eb 1830, awwer denoh hot erscht der „Kriss Kringle" un am End der „Santa Claas" der Tschapp iwwergenumme.

Heit welle mer’s Gedicht „Der Belsnickel" drucke, ass der Parre Henry Harbaugh g’schriwwe hot in die 1860s.

Der Belsnickel

Oh, kennscht du den wieschte, den gaschtige Mann?
Hu! Daref m’r den Kall e Mensch heesse?
Ya, ass er en Mensch iss, mag glaawe, wer kann,
Er guckt mir zu viel wie der Beese!

Seh yuscht mol sei Aage, sei Naas - alle Welt! -
Er duht’s Maul uff un zu wie die Schere;
‘N Schwanz wie ‘n Ox, ya, des hot er, gelt?
Un en horiger Belz wie die Baere.

Kummt der in dei Haus, dann gebt’s Laerme genunk,
Er sucht die nixnutzige Kinner!
Un find ‘r eens, geht er uff eemol zum Punkt,
Un dengelt gaar bummrisch die Sinder.

Er schtellt sich do hie mit d’r forchtbare Ruth,
Un brummelt sei drohende Rede;
Do warre die Kinner uff eemol arch guud
Un fange recht heftig aa bete.

Waar eens - wie’s manchmol der Fall iss - recht knitz;
Wollt d’ klee Fitz der Mudder verschpettle;
Ich wett, es lacht net for d’r Belsnickelfitz -
Es duht um guud Wetter g’schwind bettle.

Nau schiddelt d’r Belsnickel grausam sei Sack,
Raus falle die Kuche un Keschte;
Wer guud iss, kann lese, wer schlecht iss, den - whack! -
Den schmiert ‘r mit Fitzel zum Beschte.

Vum Belsnickel hawwich nau ebbes gelannt,
Des warr ich ah nie net vergesse:
Naach dem, ass mer saeht, watt ehm aa in der Aerndt
Die Frucht vun seim Warik ausgemesse.

Mer winsche alli Kinner hiwwe wie driwwe,
ass ihne der „Nikolaus" odder aa der „Santa Claas" ebbes Scheenes bringt.
Sell schreibt der Michael Werner.
Ho, ho, hoooh.

Beitrag erstellt 09:22 |
Link

15.11.02
Dihr liewe Leit,

Nau nemmt’s nimmie lang, un der Disember iss do. Sell iss die Zeit, ass die Kinner hiwwe wie driwwe abbadich gleiche wehich all die Sache, wu ehm draa gemahne, ass der Grischtdaag nimmie weit iss. Awwer eb selli Zeit kummt, hemmer noch paar duschbre, kalde un nasse Daage zu schtaende. Kann sei, ass aryets ball aa der erscht Schnee fallt. Der Ralph Samuel Funk hot 1938 en Gedicht g’schriwwe vum Winder, wu nimmie weit eweck iss:

Der Winder kummt

Der Winder kummt, er iss ball do,
Mit Schnee un Eis un Kelt;
Der Himmel guckt wie Blei so groo,
Der Reif, der greift die Welt.

Die Blumme ausgeblieht schun lang,
Die Bledder vun de Beem;
Die Veggel mit ihr’m scheene G’sang,
Die sinn schun weit vun Heem.

Der Wind blost um die Scheier rum,
Ya, der iss kalt un rau;
Er blost die Welschkann-Schocks all krumm,
Un iwwer’s Graas, nau brau.

Glei leit der Schnee un v’leicht deel Eis
In Feld un allem Eck,
Un deckt die schlofend Erd so leis,
Wie mit en Fedderdeck.

Ich gleich ‘n net, der Winter kalt,
Un aa net Eis un Schnee;
Ich saag dir, was es bescht mir g’fallt -
Sell iss ‘s Friehyaahr schee.

Sell iss, wie’s iss. Ich denk, er iss recht. Awwer wann ich zu mei Kinner saag, ass ich vaschich guck fer’s neegscht Friehyaahr, sinn sie net eenich mit mir. Sie saage, erscht sett Grischtdaag sei un’s Grischtkinnel - ya, sell kummt bei uns noch in die Pfalz - sett all sei Bresents unnich der Grischtbaam lege. Naach sellem kennt’s Friehyaahr kumme, wann’s kumme will.

Sell schreibt der Michael Werner,
wu sich yuscht paar Daag zerick
en Kalt g’fange hot.

Beitrag erstellt 08:25 |
Link

1.11.02
Dihr liewe Leit,

Nau watt’s widder frieh duschber am Owet, un in deel Naechte iss’s aa schunt widder aardlich kalt. Sell iss die Zeit, wu mer hiwwe wie driwwe Elbedritsche fange gehne kenne. Ich denk, die menschte vun unser Leser kenne die alte Schtories iwwer selli abbadiche Gediere. Sie sinn schei, un’s nemmt paar Mannsleit, wammer in der Busch geh un Elbedritsche fange will. ‘S sinn net zu viel Kalls un Weibsmensche, wu sie schunt g’sehne henn. Awwer in en Wattshaus in die Pfalz mittes im Busch kammer eens begucke, ass sie Yaahre zerick g’fange g’hatt henn. Weess net, eb sell recht iss, awwer sell iss, was sie allfatt saage. Do kennt dihr nau lese, was der Daniel Miller 1903 g’schriwwe hot iwwer Elbedritsche in Pennsylvaani.

Elbedritsche Fange

Hoscht du schun Elbedritsche g’fange? Ich hab net. (...) Die Sach iss so: En paar Leit nemme so en Kall am’me bitterkalte Owet naus ins Land un saage, sie wotte Elbedritsche fange. Der Kall muss en Sack mitnemme. Am’me Buscheck mache sie ihn hieschteh un der Sack uffhewe; dann gehne die annere fatt un saage, sie wotte die Elbedritsche uffschtaerte un in der Sack neiyaage. Awwer anschtatt sell, gehne sie schnurschtracks heem un losse der aarm Kall drauss am Buscheck schteh, bis er schier dootg’frore iss. Dann geht er ab heem un weess nau, was Elbedritsche fange iss. Nau watt er noch gedichtich ausgelacht un geblaeckgart, bis er recht bees iss (...).

Die Leit in die Pfalz gehne heit nimmie zuviel Elbedritsche fange. Scheint’s henn die Voreldre vun die Pennsylvaanisch-Deitsche sie schier all mitgenumme in die Nei Welt, wie sie gezogge sinn 300 Yaahr zerick.

En hallicher November winscht der Michael Werner,
wu froh iss, ass er nie net der Sack hot hewe misse im Busch.

Beitrag erstellt 15:23 |
Link

15.10.02
Dihr liewe Leit,

Nau bin ich widder deheem in mei Affis. Unser Rees naach Pennsylvanie hot uns zammegebrocht mit en latt alte un neie Freind - un’s waar ferschur en grosser G’schpass. Ich will ball mol meh schreiwe, was g'happent hot.

Weil’s awwer nau ball am kalt warre iss, will ich heit en Gedicht drucke, ass der Samuel Grob iwwerg’setzt hot vun English zu Deitsch in die 1930s:

Wann der Froscht iss uff de Karebse

Wann der Froscht iss uff de Karebse
un des Welschkannlaab iss g’schackt,
un mer heert der alt Welschhahne
wie er rumschtolziert un g’wackt.
Un’s Gegwecker vun de Ginnies
un des Schnattre vun de Gens
un der Hahne kraeht sei „Guck-mol-do-h"
un trippelt uff de Fens.
Oh, mer fiehlt dann grad am beschte
naach ’re ruhevolle Nacht,
wann die Maryiesunn ehm griesst
un hallich in die Aage lacht.
Blott-Kopps gehnt mer naach der Scheier
fiedert Vieh aus Fass un Sack,
wann der Froscht iss uf de Karebse
un des Welschkannlaab in Schack.

Es iss ebbes Aart vun hatzhaft
alldo ringsum in der Luft,
wann des Summers Hitz verbei iss
un der kiehle Harebscht voll Duft.
Mer vermisst wohl all die Blumme
un die Bliede vun de Behm,
(wu die schnurrend kleene Veggel
un die Ihme waar’n deheem).
Doch die Luft iss appetitlich,
un die Landschaft vor dem Aag
Am’me sunnich frische Maryie
vum ‘me friehe Schpootyaahrsdaag
iss en Bild, des schpott des Kinschtlers
allerfeinschter Farbgeschmack,
wann der Froscht iss uff de Karebse
un des Welschkannlaab in Schack.

Des rapplich, roh Geflatter,
wu aus Welschkannfahne lacht,
des rischple vum verwerrte Laab
in goldner Maryiepracht,
die Schtopple in der Farch - sinn wohl
en aart verlossnes Bild.
Doch saage sie vun reiche Aern
un Scheier aa gefillt.
Die Maehmaschien in Waggeschopp,
der Schtrohschtock in de Benn,
die Geil in ihre Schtaell un’s Hoi
in Bahr’ un Owwertenn!
Mei Hatz fangt aa zu kloppe, oh,
‘s geht wie die Uhr, „Tick, Tack,"
wann der Froscht iss uff de Karebse
un des Welschkannlaab in Schack.

‘S nemmt nimmie lang, un mer warre aa der erscht Froscht hawwe bei uns. Mer welle hoffe, ass all die Leit hiwwe wie driwwe ihr Haus un Scheier in Adder henn, eb der Winter kummt.

Sell schreibt der Michael Werner,
wu froh iss, ass er so gudi Freind hot in Pennsylvanie.


Beitrag erstellt 06:35 |
Link

27.9.02
Dihr liewe Leit hiwwe wie driwwe,

Der Gerhard Schröder hot die Leckschon gewunne - sell wisse mer all nau. Un mer wisse aa, ass ‘s en wennich Druwwel gebt alleweil zwischich die Schteets un Deitschland wehich ‘em Saddam Hussein. ‘S scheint, ass wann unser zwee Laenner alleweil net die seem Schprooch schwetze.

‘S iss schaad, ass der Bush und der Schröder kenn Pennsylvaanisch-Deitsch schwetze kenne - noht kennte sie nanner verleicht so guud versteh wie mir noch duhne - 300 Yaahr, naachdem ass die Voreldre vun die Pennsylvaanisch-Deitsche abg’schtaart sinn vun die Pfalz un annere Gegende im Daal vum Rewwer Rhine fer in die Nei Welt ziehge. ‘S iss, wie’s iss, un mer welle hoffe, ass sell Schtreit ball zum End kummt.

Der Ludwig August Wollenweber (1807-1888) iss aa eens vun die Kalls, wu gezogge sinn vun die alt Pfalz naach Pennsylvaani. Er hot guud g’fiehlt bei sei neie Freind un hot in die Yaahre eb 1869 en Gedicht mit Title "Ich bin en Pennsylvaanier" g’schriwwe iwwer sei nei Heemet, wu er noht so aarick gegliche hot. Der erscht Verscht geht wie sell:

Ich bin en Pennsylvaanier,
Druff bin ich schtolz un froh.
Des Land iss schee, die Leit sinn nett,
Bei Tschinks! Ich mach schier een’chi Wett,
Es biedt’s kee Land der Welt.

Maryie frieh gehn ich uff mei Rees mit’em Luftschiff naach Philadelphia. Mer welle unser guudi Freind b’suche in Lengeschter Kaundi, Baricks Kaundi un Lechaa Kaundi, awwer aa in Dauphin, Bucks un Montgomery Kaundi. Verleicht duhn ich deel vun unser Leser aadreffe Oct. 5 bei die West Berks Versammling in Robesonia. Ich guck faschich fer eich sehne.

En Gruss zu alliebber hiwwe wie driwwe
schickt der Michael Werner.

Beitrag erstellt 20:33 |
Link

15.9.02
Dihr liewe Leit,

nau nemmt's yuscht nimmie lang, un mer henn Leckschon in Deitschland. Der Chancellor vun Deitschland, Gerhard Schröder (Social Democrat), iss alleweil aardlich am fechte mit Wadde gehich der Edmund Stoiber (Conservative Party) vun Bavaria. Seller Kall iss datt "Ministerpräsident" - sell waer verleicht ebbes wie en "Gouverneur" in die Schteets.‘S nemmt noch paar Daag, noht iss die Campaign am End. Die Leckschon iss September 22. Mer welle yuscht hoffe, ass’s net ebbes gebbt wie beim Bush un’em Gore, so ass mer glei wisse, wer am End gewunne hot.

Der Ralph Funk (1889-1969) hot Yaahre zerick en Gedicht gedruckt im „Pennsylvaanisch Deitsch Eck" vum Allentown Morning Call mit Title „Die Leckschon":

Die Leckschon

Nau iss die Leckschon mol verbei,
Die Schtimmschtubb widder zu;
Die Kandidaate an ihr’m G’scheft,
Un mir henn widder Ruh.

Fer wochlang, do waar’n sie draa,
Ihr Harn schier abgerennt;
Un waarscht du noch so fremm gewesst,
Henn doch dich guud gekennt.

Des waar’n Gewewwer un en Zucht,
Mer weess schier net wu naus;
Fer alle Amt waar’n dutzend Mann,
Un v’leicht noch paar meh draus.

Un ehrlich waar’n sie all, un trei,
So henn sie all behaabt;
Kenn bess’rer hot bisher gelebt,
Wann nur mer alles glaabt.

Der Schtor waar voll, der Schopp waar voll
Vun Leit vun alle Kunscht;
Die Luft waar voll - vun Musik? Nee!
Vun Kandidaat - nix schunscht!

Mei Radio iss schier uffgebrennt
Vun all dem heesse Schtraahl:
Wu nausg’schickt waar in frei-i Luft,
Zu Barick, Flett un Daal.

Was henn sie nanner wiescht verschmiert,
Der Dreck waar grie un geel;
Un waar en Mann aa noch so guud,
Waar doch en Ratt im Mehl.

Ya well, ich denk, sie henn mol Ruh,
Ya, ennihau fer’n Yaahr;
No heert mer’s graad de seeme Weg
Vun Busch bis Scheierdoor.

En Gruuss zu alliebber schickt der Michael Werner,
wu aa froh iss, ass sell „Leckschon Bissniss"
ball en End finne duht.



Beitrag erstellt 10:42 |
Link

1.9.02
Dihr liewe Leit hiwwe wie driwwe,

Wann der Summer ball fattgeht un der Harebscht am kumme iss, fangt die Zeit im Yaahr aa, wu die Leit Yaahre zerick als Lattwarick gekocht henn. ‘S hot lang genumme, bis der Lattwarick als faddich waar - oftmols bis Mittnacht un noch laenger.

Sell waar Fann net yuscht fer die Leit, wu uff en Bauerei g’lebt henn. Vun alliwwer in die Nochberschaft sinn abbadich die yungi Buwe un Meed kumme fer helfe. Mer kann denke, ferwas sie sell gaern geduh henn. ‘S waar ferschur en hatter Tschabb, awwer ‘s hot genunk Zeit gewwe fer en wennich karessiere, un sell waar blessierlich. Der Thomas Jefferson Boyer (1837 - 1919) hot baut 1900 ‘s Gedicht g’schriwwe „S Lattwarickkoche fer Alders", wu er verzehlt vun sellem.

In die Pfalz henn die Leit Yaahre zerick aa en latt Lattwarick gekocht, awwer sie henn kenn Ebbel geyuust. Im alde Land waar der Lattwarick gemacht vun Gwetsche. ‘S hot aa guud g’schmackt - un deel Baure koche un verkaafe sell heit noch. ‘S gebbt Leit bei uns rum, wu sell abbadich gleiche.

‘S Lattwarickkoche fer Alders

Fer alders waar’s als immer Ruul, bei kiehle Schpotyaahrwoche
Enanner mitzuhelfe, um der Lattwarick guud zu koche;
Die Weibsleit henn die Ebbes g’schnitt, die Buwe ‘s Holz gedraage,
Der Seider vun der Miehl gebrocht - do heert mer niemand glaage,
Die yunge Leit henn manche Nacht ihr guuder Schloof gebroche,
Zur rechte Zeit uff Hand zu sei, der Lattwarick helfe koche.

Die Zeit waar b’schtimmt, der Daag waar do, der Seider muss mer mache;
Die siesse Ebbel misse bei, ‘s Gewaerz un annre Sache,
Du Buwe un die Meed sinn naus, die Ebbel uffzulese
Un selle groosse Ebbelbeem, do brauch mer niemand heesse.
Die Arwet uff der Bauerei, die kann en Daag yo leie,
Der Lattwarick muss mer koche, fer sell brauch sich niemand scheie.

Dann sinn mer naach der Ebbelmiehl, die Ebbel zu vermahle,
(Mer henn die Miehl yo selwer g’hatt, do brauch mer nix bezahle.)
Datt geht der Gaul im Gringel rum, en Schtang dutt ihn rumfiehre,
Ich heer die Miehl noch graunse heit, un meen, mer sott sie schmiere.
Ich sehn der Seider laafe, un ich sehn die Dreschter falle
Datt im Droog graad bei der Miehl, meh wie en hunnert Galle.

Datt in der Kich im Feiereck, der Grahne sehn ich schwenke;
Ich sehn datt an der Feierhohl der Kupperkessel henke;
Sell Schtumbe Holz am Brenne datt; der Schmook, der sehn ich grolle
All iwwer um der Kessel rum un owwenaus dann rolle;
Die Funke sehn ich fliege un ich heer sell Holz als grache,
Wie sell als heftich brenne dutt - ich sehn aa annre Sache.

Die scheene yunge Bauremeed am Zuwwer sehn ich sitze
In weisse Schatz, mit Haar gebreed, die sinn am Ebbelschnitze;
Sie sinn so schtarick wie Eechebeem, sinn saund un all vollkumme;
Un henn en frischi Fareb im G’sicht, wie’n Roseschtock voll Blumme;
Sie schaffe uff’em Feld im Daag mit Reche un mit Hacke;
Sell bringt en gudi Fareb uff die scheene rote Backe.

Sie scheie sich net vor der Sunn, un wann sie aa schwatz brenne,
Sie heesse sell en guudi Fareb un schaffe, wie sie kenne;
Sie reche un sie binne Frucht, so guud wie eeniche Menner
Un wann’s die Not erfoddert kenne faahre mit Viergeilschpenner,
Sie kenne wesche, koche, backe, ya, allerlei vun Kuche,
Sell iss es Schtofft fer Buwe, wann sie sich en Paertner suche.

Der Zuwwer iss voll Schnitz gemacht, der Seider iss am Koche,
‘S Feier watt als oft gemacht - sell dutt ihn g’schwind eikoche;
Die Mammi scheppt der Schaam als ab un dutt sell Feier tende,
Un bringt die guude Kuche bei, do brauch mer gaar nix schpende.
Die Schnitz, die dutt die Mammi nei, en paar, die duhne riehre,
Bis sie verkocht, sinn guud un fei, schunscht kann mer’s yo net schmiere.

Was duhne dann die yunge Leit, die Nacht herumzubringe?
Yuscht geh mit mir naus in der Hof, datt sehnt mer annre Dinge.
Datt „Pussy wants the corner" duhne Yunge eifrich schpiele,
Odder Blummsack uff’re lange Bank - den kann mer oftmols fiehle,
Mer kann’s als heere gnalle, wann sie als der Buckel globbe;
Mer gleicht en als zu fange, awwer kann ihn oft net schtoppe.

Datt sitzt der Tschaerri Boyer uff’em Schtuhl un iss am Geige,
Un wann mer interfiere dutt, dann grickt mer oft Ohrfeige;
Sie danse, ass es glebbert, in der Mammi ihre Zimmer,
Sinn hallich un sinn uffgelegt un guud gepliest als immer,
Der Lumbekarebet uff’m Floor, den henn sie nausgedraage,
Un henn en widder neigelegt, do waar noh nix zu saage.

Der Seider iss all eigekocht, die Schnitz sinn all vergange,
Dann dutt die Memm ‘s Gewaerz aa nei un denne frisch aafange
Mit Riehrleffel zu riehre un sell Schtofft all guud zu mixe;
‘S Feier watt gezoge un die Heffe duhn sie fixe,
Der Lattwarick in die Heffe g’scheppt, dann geht’s ans Kesselschlecke,
Im Hof, noh kumme yung un alt herbei vun alle Ecke.

Die Fann iss nau veriwwer - sehn, der Daag iss yo am Bleeche;
Sie eile naach der Heemet zu - will kenns kenn Schloof meh breche.
Doch wann der Owet widder kummt, dann geht’s zu annre Bauere,
Wu aa am Lattwarickkoche sinn - do brauch mer sie net dauere.
Sell iss yuscht Fann, sie duhne gaern debei viel Schloof verliere
Un duhne oftmols uff’em schlei en wennich karessiere.

En hallicher September winscht der Michael Werner,
wu froh iss, ass ‘s aa bei uns ball widder Lattwarick gebt.

Beitrag erstellt 12:05 |
Link

15.8.02
Dihr liewe Leit,

was waar’s am reggere die letschte Daage un Woche bei uns. Mer welle hoffe, ass ‘s Wedder aryets, wu die Mudderschprooch noch g’schwetzt watt, alleweil besser iss wie bei uns. Die Gricklin sinn nimmie, wie sie als waare. ‘S ganze Wasser brauch meh Blatz, un so iss ‘e alsfatt am gucke, in welle Schteddel ‘s noch laafe kann. Alles iss’s unnerscht ‘s ewwerscht un’s hinnerscht vedderscht alleweil. Sell gemahnt mich an en alt Gedicht, ass der Ezra Grumbine (1845-1923) g’schriwwe hot um’s Yaahr 1900 rum:

Es unnerscht ‘s ewwerscht Land

Ich weess en Blatz, du weescht en aa
Un bischt en guud bekannt;
Du draewelscht oft im Draam dedarch -
Es unnscht ‘s ewwerscht Land.

Des Land, des iss gaar weit vun do,
Doch eb du’s weescht, bischt datt.
Wann d’ meenscht, du waerscht deheem im Bett,
So bischt uff ee Mol datt.

In sellem Land iss nix wie do,
Was graad iss, datt iss grumm;
Wann eener schlooft un leit im Bett,
So schpringt er wacker rum.

Was schlecht iss, datt iss immer’s bescht,
Des sauer iss alsfatt siess;
Die Schtiwwele waert mer uff de Kepp,
Die Bannets an de Fiess.

Die Haase lege Oier datt,
Der Schmierkees waxt uff Beem,
Un wann en Mann ans draewle geht,
So bleibt er schee deheem.

Der Hunnich watt gemacht vun Holz,
Die Ieme mache Schpee;
Die soobre Leit, die saufe Dramm,
Die Siffer drinke Tee.

Der Schtaahl un Eise, die sinn weich,
Un Fedderdecke hatt;
Die beese sinn die guude Leit,
Die liewe warre g’matt.

‘S watt uffg’schpielt vor’m Esse datt,
Was sauwer iss, iss dreckich;
Es Wasser laaft der Hiwwel nuff,
Was rund iss datt, iss eckich.

Datt sinn die Schteddel all im Busch,
Die Baryie in de Deicher;
Es Hausdach unnich’m Fundament,
Der Keller uff’em Schpeicher.

Die Veggel schwimme dief im See,
Die Pasching sinn im Grund,
Die Oischders briehe uff de Beem
Un gauze wie die Hund.

Sex Sunndaag sinn in eenre Woch,
Un yuscht ee Daag watt’s g’schafft,
Un wann mer heilt, dann iss mer froh,
Im Druwwel watt’s gelacht.

Die Weibsleit draage Hosse datt,
Die Mannsleit seidne Fracks,
‘S brauch niemand nix bezahle datt,
Kee Schulde un kee Tax.

O, was en tappsi-tarrwi Blatz,
Des unnerscht ‘s ewwerscht Land!
Des Gegedeel, un iwwerzwarch,
Des hinnerscht vedderscht Land!

„S Wasser laaft der Hiwwel nuff" - so fiehle mer alleweil, awwer mer welle hoffe, ass ‘s Wedder ball brecht un der Augscht noch paar scheene Daage bringt.

Sell schreibt der Michael Werner,
ass froh iss, ass er net neegscht zum Wasser wuhnt.

Beitrag erstellt 06:07 |
Link

1.8.02
Dihr liewe Leit hiwwe wie driwwe,

Der Irwin Klinger vun Elizabethville (PA) iss g’schtarewe yuscht paar Daag zerick. Er iss 82 Yaahr alt warre. Der Irwin waar eens vun die beschte Schticke-Schreiwer in die Mudderschprooch, hot seilewes g’schafft ass en Schulmeeschter un hot en latt Leit g’holfe, Pennsylvaanisch-Deitsch zu lanne. Mer watt ihn nau aarick misse in Pennsylvania. Mer welle awwer hoffe, ass deel vun sei Plays als emol noch gewwe warre bei en deitsch Kariche-Picnic odder aa en Versammling. Mer welle ihn ehre heit mit en Gedicht, ass der Charles C. More (1848-1940) vun Allentown (PA) g’schriwwe hot in 1907:

Die Schadde uff der Grick

An der Leecha hawwich g’sotze
Un in die Welle g’schaut.
Um mich rum henn Veggel g’sunge
Un Neschter sich gebaut.
Ihre Schadde, wie die Wolke,
Sinn g’schwumme uff der Grick.
Dann in weiter Fern verschwumme;
Doch ihr Lied, des blieb zerick.

So sitz ich doch gaar manichmol
Un schau mit driewem Blick.
Die Erinn’rung ruft mer Schadde bei,
Mei Gedanke sinn die Grick.
Wu die Schadde driwwer schwewe
Ball hier, ball do, ball datt;
Dann verschwinne sie im Wasser,
Un der Schtrom, der dragt sie fatt.

So mancher macht mer Freede,
Un mancher dutt mer weh,
En mancher glingt ass wie en Lied
Vum’me Schadde, ass ich seh.
Er schwebt datt uff de Welle,
Er sinkt datt in die Grick;
Der Schtrom, der draagt des Bild mir fatt
Un losst mei Schmatz zerick.

Wie watt es dann mit mir mol geh,
Wann ich aa nimmie bin,
Wann ich muss heemwatts wandre
Ins Schaddeland weit hin?
Watt aa mei Bild so schwewe,
Dann versinke aus’em Blick?
Der Doot, der dann mei Schmatz fatt nemmt,
Losst er mei Lied zerick?

Der Irwin Klinger hot sei Lied zerick g’losst in Pennsylvaani - sell iss gewiss.
Sell schreibt der Michael Werner,
ass froh iss, ass er der Irwin aa gekennt hot.

Beitrag erstellt 06:11 |
Link

15.7.02
Dihr liewe Leit,

Yuscht zwee Daag zerick hemmer B’such g’hatt vun Millersburg (Ohio): Der Enos Stutzman mit sei Fraa Mary, sei Gschwei Anna Weaver un noch en Weibsmensch, ass guud bekannt iss zu ihne, die Sarah Beachy. Die vier Leit sinn Beachy Amish, un sie welle ausfinne in Deitschland, wie’s guckt in dem Land, wu ihr Voreldre fattgezogge sinn meh wie 200 Yaahr zerick. ‘S waar aarick blessierlich, mer henn en gudie Zeit g’hatt minanner un aa ausg’funne, ass ‘s Deitsch in Ohio en wennich annerscht laut wie in Pennsylvaanie. Yuscht fer en Beispiel gewwe: Sie saage „deetsch“ fer „deitsch“. Awwer mer henn uns guud verschteh kenne. Die Anna Weaver iss die Schweschter vun die Mary Stutzman, un der Enos iss ihr Schwerbruder (Schwoger). Sell Freindschaft iss ferschur net verwickelt.

Vun en aarick verwickelte Freindschaft verzehlt awwer der Henry Lee Fisher (1822-1909) in sei Gedicht „En verwickelte Verwandschaft“. Un do iss, wie’s geht:

En verwickelte Verwandschaft

Ich hab en liewie Wittfraa g’heiert,
Die hot en gewaxnie Dochter;
Mei Vadder waar en Wittmann g’west
Un heiert mei Schtiefdochter;
so waar mei Daed mei Dochtermann
Un ich sei Schwiegervadder;
Sei Fraa, die waar mei Dochter g’west
Un allerdings mei Mudder.

Wie ich en Zeitlang g’heiert waar,
Do grickt mei Fraa en Soh,
Der waar dann Schwoger zu meim Vadder,
Un ich waar sei Neffyu;
Meim Daed sei Fraa grickt aa en Soh,
Der waar uffkors mei Bruder,
Zu gleiche Zeit mei Enkelche,
Dann ich waar sei Groossvadder.
Mei Fraa, die waar mei Gemmem g’west
Un ich waar ihre Enkel;
Ich waar mei eegner Granddaed ‘s letscht -
Un dann waar’s Zeit zu henke ...

Mer winsche alle Leit hiwwe wie driwwe en gudie Zeit bis zu unser neegscht Kalemn am erscht Augscht.

Sell schreibt der Michael Werner,
ass froh iss, ass er net so en verwickelte Freindschaft hot.


Beitrag erstellt 08:05 |
Link

1.7.02

15.6.02
Dihr liewe Leit hiwwe wie driwwe,

Ich waar en wennich ruhich die letschte zwee Woche - mer waare uff Vacation im Nadde vun Deitschland uff en schee alt Bauerei mit unser Kinner. Ich hab gegliche, wie die Leit datt am schwetze sinn. Sie heesse 's "Niederdeutsch" odder "Plattdeutsch". 'S laut ferschur net wie Pennsylvaanisch-Deitsch, meh wie English. Sie saage "Water" fer "Wasser" "lütge" (little) fer "glee" un noch en latt meh Wadde, ass mer net guud verschteh kann, wammer kenn English schwetzt. Sie sinn aa en latt am schaffe fer ihr Mudderschprooch uffhalte. Im Forum vun "hiwwe-wie-driwwe.de" hot der Frank Kessler en Weil zerick ebbes g'schriwwe, was die gudie Leit datt owwe alles am duh sinn. Guckt yuscht mol rei.

Mer henn nau datt im Nadde widder g'lannt, ass die Bauereleit im June en latt zu schaffe henn. Mer kann denke, ass die Hoiet nau aa in Natt America schunt rum iss. Sell Arewet iss ferschur kenn G’schpass - abbadich fer die Yunge, ass verleicht meh gleiche deete, ebbes anneres zu duh inschtatts vun Schaffe uff’m Feld. Sell iss net yuscht heit so, sell waar schunt so Yaahre zerick. Dihr kennt nau lese, was der Charles Calvin Ziegler (1854-1930) g’schriwwe hot iwwer sell:

Samschdaag Owet

Die letscht Lood Hoi! Nau Buwe, huree!,
Faahrt in die Scheier un losst sie schteh
Bis Muundaag Mariye frieh. Waahrhaft!
Den Owet watt kenn Schtrech meh g’schafft;
‘S iss Samschdaag.

Wesch die Fiess am Wasserdroog;
Blaeck die Schtiwwel - (verflammdie Bloog!
Mei Griehaag dutt mer widder weh -
Die Schtiwwel sinn mer ganz zu glee -
Oh Elend!)

Well, Schtiwwel odder net - ich muss
Ins Schteddel zu der scheene Suss;
Die letscht Woch henn mer’s ausgemacht,
Ich sett sie sehne Samschdaag Nacht -
Den Owet.

Die annere Meed un ihre Boos
Schpaziere uff un ab die Schtrooss;
Die seeme Zeit karessiere ich
Mei Meedel hinne in der Kich -
Gedichtich.

Die Suss hot alles eigericht;
Die Uhr schteht schtill, mer henn kenn Licht;
Die Alde sinn in ihrem Nescht -
‘S iss uns net bang - sie schloofe fescht
Un schnarickse.

Die Uhr schteht schtill - awwer net die Zeit;
Iss es nau mariye odder heit?
Es macht nix aus - so ganz allee
Lieblich umaarmt. Ach! Muss ich geh?
‘S iss Sunndaag.

Nau, iss sell net Ebbes? Sell waar g’schriwwe meh wie achtzich Yaahr zerick. Deel Dinge verennere sich mit die Yaahre, annere diehne net. Macht’s guud hiwwe wie driwwe un duht nix, ass ich net deet.

Sell schreibt der Michael Werner,
ass awwer doch froh iss,
ass er nau widder deheem iss
un an sei Waddefresser schaffe kann ...


Beitrag erstellt 12:18 |
Link

1.6.02
Dihr liewe Leit,

‘S Wedder watt alle Daag besser nau, un die Kinner gleiche rumschpringe drauss im Gaarde un im Busch. Sell iss die Zeit, wu sie gucke, wie alles am waxe iss um sie rum: erscht die Pissebett-Blumme, schpeeder dann der Klee un aa ‘s Welschkann. Un sie sinn froh, ass mer nau widder en latt unnderschiddliche Gediere finne un gucke kann, was sie am duh sinn. ‘S iss en halliche Zeit - abbadich im Tschuun, wann der Summer nimmie weit iss. Der Ralph Samuel Funk (1889-1969) aus Stockerton (PA) hot en schee Poem g’schriwwe iwwer’s Friehyaahr in 1949:

Friehyaahr

Wann der Bloovoggel kummt,
Un Forell widder tschumpt,
Un der Haas iss wusslich im Klee;
Wann der Piewie schee peift,
Un die Nacht nimmie reift,
Un am Dach gebt’s kenn Eiszappe meh.

Wann die Pissebett-Blumm,
Weist sich alliwwer rum,
Un’s Graas in de Felder iss grie;
Wann der Bauer im Feld
Welschkann-Farrich graad schtellt,
Un Beem weisen Bledder un Blieh.

Wann die Sunn in der Heeh
Scheint so waarm un so schee,
Un die „kneedeeps", die greischen im Schwamm;
Wann die Eil un Schpeckmaus
Sinn mol nachts widder drauss,
Un der Bullfrack singt Bass im Damm.

Wann die Blumme so neis
Bliehe rot, bloo un weiss,
Im Gaarde, im Busch un im Feld;
Wann die Yunge im Land
Laafen rum Hand in Hand,
Iss alles ball recht in der Welt.

Noh iss Winter verbei
Un vun Schnee sinn mir frei -
Wie iss doch der Himmel so bloo!
Was en lieblichie Zeit
Un so hallich die Leit,
Wann Friehyaahr iss widder do.

En Gruuss zu alliebber hiwwe wie driwwe schickt der Michael Werner, ass weess, wie kalt der Winter in Pennsylvaani, Ohio, Ontario un aryets schunscht in Natt America sei kann - abbadich im Yenner.

Beitrag erstellt 05:56 |
Link

15.5.02
Dihr liewe Leit,

Nau iss die Zeit vum Yaahr, wu die Baure hiwwe wie driwwe widder aardlich schaffich sinn mit saehe un blanze. Ich meind noch, wie mei Gremmem - sie waar die letscht Bauersfraa in unser Familie - mit die deitsch Sens g’schtanne hot im Gaardeschtick hinnich em Heisli un hot Hoi g’macht. Un ich meind noch, wie guud, ass sell frisch Hoi als geroche hot.

Wann dihr noch Schtories wisst vum Lewe un Bauere Yaahre zerick, schickt uns sell ass en Post im Forum vun „Hiwwe wie Driwwe". ‘S hot en abbadiche „Category" fer Schtories wie sell. Dihr finnt leicht aus, wu sell iss ...

„Wann ich yuscht en Bauer waer" hot der David B. Brunner (1835-1903) gerufe in sei Gedicht, ass’s erscht mol gedruckt waar in die Zeiding „The Pennsylvania German" in 1903. Weess net, eb ich sell aa gleiche deet. Verleicht waer die Arewet doch en wennich hatt - ich denk, ich besser bleib bei mei Waddefresser un schick deitscher Schtufft zu die Leit hiwwe wie driwwe.

Wann ich yuscht en Bauer waer

Oh, wann ich yuscht en Bauer waer,
Un hett en guud Schtick Land,
Dann hett ich aa mei Seck voll Geld,
Un aa noch in der Hand.

Der Bauer iss sei eegner Baas,
Er iss en freier Mann,
Er dutt gewehnlich, wie er will,
Un ich duh, wie ich kann.

Im Friehyaahr saeht er’s Hawwerfeld,
Un blanzt, aafangs im Moi.
Grummbiere, Welschkann un so Sach,
Im Juni macht er Hoi.

Der Bauer schafft im Summer hatt,
In Hoiyet, Aern un Seehe.
Un bloogt sich arrig in der Sunn,
Muss schwitze viel im Meehe.

Im Schpotyaahr bascht er’s Welschkann als
Un schebbt’s uff mit der Schipp.
Es Laab dutt er uff lange Schteck,
Die Kolwe in die Gribb.

Er sammelt alles fer der Winter,
Die Riewe un die Greider,
Un dutt die Ebbel in der Keller
Un macht sich paar Baerl Seider.

Sei letschte Arwet in dem Yaahr
(Nooch sell’m hot er Weil Ruh)
Iss Weeze, Kann un Hawwer dresche
Un in die Kammer duh.

Nau kummt sei beschtie Zeit im Yaahr,
Die Scheier un es Haus
Voll Lewesmiddel aller Satt,
Un wennich Arwet draus.

Yuscht denk mol draa: vier Munet lang
Die Arwet uffzuhenke,
Eksept die Hinkel, Kieh un Sei
Zu fiedre un zu drenke.

Der Disch ganz voll vun gude Sache,
Vun Kuche, Pei un Weck,
Un frische Wascht un Schunkefleesch
Un Sauergraut un Schpeck.

Un Welschhahne, beim dutzendweis,
Um die Gebeier laafe;
Wann ich vor Grischtdaag eener will,
Muss ich ihn alsfatt kaafe.

Un wann’s viel schneet, dann hot er ball
Der Schlidde vum Hoibarre,
Un schpannt sei schwiffte Geil g’schwind ei,
Un fangt aa Schliddefahre.

Nau, ich muss schaffe alle Daag
Un hab kee Schlidde un Gaul,
Un wann ich yuscht en Woch net schaff,
Dann mangelt’s schun im Maul.

Ich muss mei Lewesmiddel kaafe,
Un ‘s iss so oft der Fall,
Ass yuscht en wennich iwwrich iss,
Un manchmol iss’s ganz all.

Oh, wann ich yuscht en Bauer waer,
Wann’s aa yuscht dauere deet,
Bis ass’s guud Sach all gesse iss,
Un’s an die Arwet geht!

Ah ya. Nau hemmer am End doch noch g’lannt, ass der David Brunner die Arwet uff en Bauerei aa zu hatt iss. ‘S Esse deet er gleiche, awwer wann’s ans schaffe geht, will er nix wisse devun. Sell iss, wie's iss.

En Gruuss abbadich zu die Bauere hiwwe wie driwwe
schickt der Michael Werner,
ass weess, ass die Arewet draus heit als noch en hatter Tschabb iss.


Beitrag erstellt 06:35 |
Link

1.5.02
Dihr liewe Leit,

153 Yaahr zerick hot mer’s erscht mol ebbes wie „Literature" in die Mudderschprooch gedruckt kenne lese in Pennsylvania. ‘S Gedicht "Maryets un Owets" waar gepublisht uhne Name vum Schreiwer 1849 in die Auguscht-Ausgab vun die Zeiding "Deutscher Kirchenfreund". Erscht Yaahre schpeeter hot die Elisabeth Rondthaler em H. A. Schuler verzehlt, ass ihr Paep, der Emanuel Rondthaler, sell g’schriwwe g’hatt hot um’s Yaahr 1835 rum. Er hett yuscht browiere welle, eb mer ebbes wie en Gedicht in die Mudderschprooch schreiwe kann.
‘S schafft, wie mer all wisse, un sitter seller Zeit henn verleicht zwischich 300 un 500 unnerschiddliche Schreiwer alliwwer in Natt America ebbes g’schriwwe - un deel aa gepublisht - in die Mudderschprooch. Mer welle hoffe, ass ‘s aa in 90 odder 100 Yaahr noch Leit gebt, wu Pennsylvaanisch-Deitsch schwetze un schreiwe kenne.

Maryets un Owets (Owetlied)

Maryets scheint die Sunn so schee,
Owets geht der geel Muhnd uff;
Maryets leit der Daa im Glee,
Owets dreet mer drucke druff.

Maryets singe all die Veggel,
Owets greischt die Laabgrott arrig;
Maryets globbt mer mit dem Fleggel,
Owets leit mer schun im Sarrig.

Alles dutt sich ennere do,
Nix bleibt immer so wie nau;
Was ehm Freed macht, bleibt net so,
Watt gaar arrig ball hatt un rauh.

Drowwe watt es annerscht sei,
Datt, wu’s nau so bloh aussicht;
Datt iss maryets alles fei,
Datt iss owets alles licht.

Maryets iss datt Freed die Fill,
Owets iss es aa noch so;
Maryets iss ehm’s Hatz so schtill,
Owets iss mer aa noch froh.

Ach, wie dutt’s mich doch gelischte
Naach der blohe Wohning datt;
Datt mit alle guude Grischde,
Freed zu hawwe, Ruh alsfatt.

Wann sie mich ins Graab neidraage,
Greint net, denn ich hab’s so schee;
Wann sie "Es iss Owet" saage,
Denkt, bei Ihm iss’s eenerlee.

g’schriwwe beim
Emanuel Rondthaler
(1815-1848)

En hallicher Moi hiwwe wie driwwe
winscht der Michael Werner.

Beitrag erstellt 09:44 |
Link

15.4.02
Dihr liewe Leit hiwwe wie driwwe,

Erscht vun allem muss ich zugewwe, ass ich in mei letscht Kalemn en glee April-G’schpass gemacht hab - un deel Leit henn sell aa vermarickt: ‘S gebt kenn Drupp Pennsylvaanisch-Deitsche, wu hawwe welle, ass die „Signs" vun die Schtettel die Schtettelname in English un in Deitsch weise. Un die anner G’schicht mit „Mer schwetze noch die Mudderschprooch" iss aa net waahr. Awwer: Iss sell net schaad? Ferschur iss es. Verleicht waer sell mol ebbes fer schtaerte. Ich hoff, ass niemand gebaddert iss wege sellem G’schpass ...

‘S Friehyaahr geht aa, un dihr wisst, was sell meent abbadich zu yunge Leit alliwwer in de Welt. Do iss en Gedicht, ass der Charles Calvin Ziegler (1854-1930) g’schriwwe hot Yaahre zerick:

Kitzel mich net!

Kitzel mich net! Wann ich yuscht aagereegt warr,
Dann kitzelt’s mich, ass ich ganz zammeschnarr!
Nee, nau! Du weescht, ass ich’s net schtaende kann;
Bin gaar net draa gewehnt wie du bischt, Tschann.
Der Paepp? Ach was, Er iss schun lang im Bett.

Kitzel mich net!

Sell dutt’s nau! Heer doch uff un loss mich geh!
Hab mich ganz grank gelacht - mei Seit dutt weh.
Da maagscht mich bosse, maagscht aa dann un wann
Mich bissel dricke - yuscht en wennich, Tschann!
Doch was du duhscht, duh’s wie’s geduh sei sett -

Kitzel mich net!

Mer hoffe, ass alliebber vun unser Leser ebber hot, wu ehm alsemol en wennich bosst, drickt un kitzelt. Sell schreibt der Michael Werner, ass yuscht ewwe gekitzelt iss warre vun sei zwee gleene Meedlin Marlene (5 Yaahr alt) un Pauline (yuscht 3 Yaahr alt). So misse mer schtoppe fer heit. Machts guud un duht nix, ass ich net deet.


Beitrag erstellt 06:37 |
Link

1.4.02
Dihr liewe Leit,

glaabt’s odder net, awwer in Deitschland hemmer der alt Gebrauch, am erscht Daag vum April anner Leit en wennich retze un narre. Un wann ich net letz bin, henn die Pennsylvaanisch-Deitsche sell aa geduh Yaahre zerick. Der Thomas R. Brendle hot in sei „Collection of Pennsylvania German Folklore" en alt Schpruch nunnerg’schriwwe, ass en Kall mit Name Dan Moser aus Pennsylvania ihm g’saat hot: „Uff der erscht Abril schickt mer die Narre hie, wu mer will!" Awwer losse mer seller alt Gebrauch un verzehle mer vun ebbes anneres:

Ebber hot uns wisse losse, ass en Drupp Kalls un Weibsleit in Barricks Kaundi ebbes Abbadiches am duh iss: Die paar deitsche Leit welle hawwe, ass die Schtettel, wu en latt Pennsylvaanisch-Deitsche lewe, newich die englische aa noch deitsche „Place Name Signs" gricke. Sie henn schunt g’schwetzt wehich sellem mit’em Goverment: Wammer naach „Seisholtzville" kummt, kammer verleicht ball aa uff en Sign „Siesholtzschtettel" lese, odder „Kutzeschtettel" uff en Sign in Kutztown un als so fatt. Waer sell net ebbes? Sie welle aa noch „Plaques" hawwe fer die Deere vun die Heiser, wu noch deitsche Leit wuhne: „Mer schwetze noch die Mudderschprooch" schteht datt druff. Sellerweg wisse B’sucher glei, ass mer noch deitsch schwetze kann zu die Leit, wu in sellem Gebei wuhne. Awwer fer sell brauche sie net’s Goverment. Nau, iss sell net ebbes? Mer welle aarick hoffe, ass sell schafft un ass ‘s aa ebbes batt, so ass die Mudderschprooch net verlore geht ...

‘S Friehyaahr iss nau endlich kumme, un mer sinn so froh, ass ‘s nimmie so kalt iss wie’s die ganz Zeit waar. Die erschte Blumme sinn am bliehe, un aa deel Veggeli sinn schunt widder zerick kumme. Der Henry Harbaugh (1817-1867) hot en abbadich Gedicht g’schriwwe in 1862 iwwer der „Piewie", un sell iss, wie’s geht:

Der Piewie

Piewie, Piewie, Piewittitie!
Ei, Piewie, bischt zerick?
Nau hock dich uff der Poschde hie
Un sing dei Mariyeschtick.

Hoscht lang verweilt im Summerland,
Bischt seit Oktower fatt;
Bischt drunne aardlich guud bekannt?
Wie geht’s de Veggel datt?

‘S iss schee datt uff de Aarenschbeem:
Gell, datt gebt’s gaar kee Schnee?
Doch fiehlscht du als recht grank fer heem
Wann’s Zeit iss fer zu geh!

Bischt doch uns all recht willkumm do;
Denk, du bischt net zu frieh,
Der Mariye guckt emol net so -
Gell net, du glee Piewie?

Piewie, wu bauscht du des Yaahr hie?
Kannscht waehle, wu du witt;
Witt du am Haus en Bletzeli?
Ich deel dir’s willich mit.

Ich geb der neier Dreck fer nix,
Geilshaar un Flax un Helm;
Nemmscht’s eenihau! - Ich kenn dei Dricks,
Du schmaerder, gleener Schelm!

Des iss yuscht Schpass, mei Piewiefreind,
Ich rechel dich kee Dieb!
Hettscht mit meim Gold dei Nescht geleint,
Du waerscht mir yuscht so lieb.

En Fruchtyaahr unne dich, Piewie,
Waer wie en leerie Welt!
Dei Dinscht, mei liewes Veggeli,
Bezahlt mer net mit Geld!

Piewie, wie’n mildie Luft du bringscht!
Die Friehyaahrssunn, wie schee!
‘S gebt nau, weil nu mol mariyets singscht,
Kee Winderdaage meh.

Piewie, Piewie, Piewittitie!
Bin froh, du bischt zerick;
Nau hock dich uff der Poschde hie,
Un sing dei Mariyeschtick!

En Gruuss zu alliebber hiwwe wie driwwe
schickt der Michael Werner,
ass froh iss, ass ‘s Friehyaahr nau endlich kumme iss.

Beitrag erstellt 10:31 |
Link

15.3.02
Dihr liewe Leit hiwwe wie driwwe,

nau nemmt’s nimmie lang, un Oschtre iss widder do. Sell gemaahnt mich an en Zeit Yaahre zerick, wu ich noch selwert en ganz gleener Schpringer waar. Am Oschtersunndaag simmer als naus aus’em Schtettel g’fahre mit meim Paep sei Machine zu die Gremmem, ass aryets draus im Busch g’wuhnt hot in die Pfalz. Mei Graempaep waar kenn Bauer - er hot seilewes bei die Riggelweg-Kumpni g’schafft, awwer er un sei Fraa henn newebei noch en ganz glee Bauerei g’hatt mit en Gaarde mit unnerschiddliche Satte Gemies, en groosser Bungert mit Eppel, Kasche un anner Satte Obscht un aa en latt Hinkel (deel Zeit aa noch Geesse un en Hundli). Oh, was waar ich als bang, die Hinkel deete mer naachgeh un mich petze mit ihrm Schnawwel. Un an Oschtre hot der Oschterhaas deel vun die siesse Oyer aus Chocolate un Candy als verschteckt g’hatt yuscht datt, wu die Hinkel rumgeloffe sinn. Sell waar gewiss ebbes, ass ich net gegliche hab. Awwer: Am End hot’s als doch g’schafft, un mer henn all die Oyer g’funne.

Der Ezra Grumbine (1845-1923) aus Fredericksburg (Lebanon Kaundi, PA) hot in 1917 en glee Bichli gepublisht mit Title „Der Prahl-Hans". Aus sellem Bichli hemmer’s Gedicht „Zum Oschterhaas" rausgepickt:

Zum Oschterhaas

Oh, Oschterhaas, Du guudes Dier!
Du bischt mir lieb un siess;
Dei Oyer tasta besser als
Des bescht gekochtes G’mies!

Dei Ohre, die sinn grooss un lang,
Dei Schwanz iss katz gebappt; -
Dieweil mir schloofe, kummscht du schtill
In unser Haus gedappt.

Du legscht dei Oyer in mei Hut,
Un gackscht kenn eenzich Watt;
Duhscht alles in de schtille Nacht,
No gehscht du widder fatt.

M’r heert dich net, m’r seht dich net,
Doch bischt en guuder Haas;
Du kummscht un gehscht dei eegner Weg,
Graad wie der Santy Claus.

Du bischt kenn brauner Choc’lat-Haas
Mit Ohre lang un g’schpitzt;
Mit schteife Bee un schteifer Hals,
Wu in de Fenschtre sitzt.

Oh nee! Du bischt kenn Zucker-Haas,
Dei Oy kenn Zucker-G’schleck;
Net g’macht in Fact’ries un in Schepp -
Net halwer Fareb un Dreck!

Dei Oyer, die sinn glatt un brau,
Sie sinn kenn Choc’lat-Trash;
Sie fiedra, wann m’r hungrich iss
So guud wie Brot un Hasch!

Halliche Oschtre
winscht der Michael Werner,
ass froh iss, ass die Pennsylvaanisch-Deitsche
der Oschterhaas net vergesse henn.

Beitrag erstellt 06:14 |
Link

1.3.02
Dihr liewe Leit,

Nau simmer yuscht paar Daag im Gewebb mit unser nei Heemetblatt, un schun henn meh wie 350 unnerschiddliche Leit beguckt, was mer geduh henn in „hiwwe-wie-driwwe.de". Sell macht uns ferschur guud fiehle.
Wammer bedenkt, ass neegscht noch kenn Mensch ebbes vun unser Heemetblatt weess - mer schreiwe erscht in die neegscht Ausgab vun Hiwwe wie Driwwe ebbes devun, un all die Copies sinn noch uff der Weg mit die Schneckeposcht zu unser Leser - iss sell schun ebbes Abbadiches. Sell meent, ass die paar Leit, wu ebbes vun „hiwwe-wie-driwwe.de" wisse, annere Mudderschprooch-Schwetzer saage, sie sette sell Heemetblatt emol uffgucke im Gewebb. Mer sinn aa froh, ass deel vun selle B’sucher schun ebbes g’schriwwe henn im „Forum", un saage „Grooss Dank" zu alliebber.
Heit welle mer an dem Blatz en Gedicht drucke vun die „Effridaa Dichterfraa" (Gladys Martin) vun Lengeschter Kaundi. Was sie g’schriwwe hot en paar Yaahr zerick iwwer die Mudderschprooch, iss ebbes wariklich Abbadiches:

Die Mudderschprooch iss am verschwinne

Des pennsilfaanisch-deitsche Schprooch,
Des schteht verleicht im G’faahr.
Ya, unser Mudderschprooch iss net
So rein, ass wie devor.

Ich weess beschur, ass noch viel Leit
Des Deitsch hoch eschtimiere,
Awwer harich zu die Mensche,
Wie sie Deitsch un Englisch riehre.

Die englische Wadde schleiche nei,
Wie Dieb, so eens bei eens.
Sie schtehle unser deitsche Schprooch,
Es gross Watt un es gleens.

Naddierlich gebt´s viel Wadde heit,
Ass nei sinn un aa fremm --
Wadde net in der deitsche Schprooch,
Ass mer g’lannt henn vun die Memm.

Wadde, so wie Telephone,
Radio un Actor,
Typewriters un Stereos,
Planes un Chiropractor.

Awwer ich schwetz net vun der Satt Wadd,
Die gehne so mit nei,
Verzoddelt darich unser Schprooch –
Mer nemmt´s in acht net glei.

Awwer´s sinn noch blendi Wadde,
Im Deitsche bekannt zu ehm,
Viel gude deitsche Wadde,
Ass mer g’lannt henn als deheem.

Yuscht darich die Yaahre heert mer,
Ass die deitsche Wadde vergehne.
Sie sinn verlore vun die Schprooch,
Weil Leit vun Englisch lehne.

Mit so viel Englisch neigeriehrt,
Dann wunnert mer ferwas,
Mir so viel Deitsch vergesse hen –
Sinn mir verleicht zu lass?

Ferwas saage deel Leit „Christmas,"
Wann´s alt Watt „Grischdaag" iss?
Deel saage „paint" fer „Fareb,"
Un „peanut" fer „Grundniss."

Deel saage „sink" fer „Schpielbank,"
Un die Daage vun die Woch
Heert mer oft g’saat in Englisch –
Leit wisse besser doch.

Ferwas saage deel Leit „different,"
Wann sie „unnerschittlich" meene?
Sie saage´s „baby" hot ya „tears."
Es sett „Bobbli" sei un „Draene."

Un noch so gleene Wadde
So wie „awwer" odder „deel,"
Sinn ebmols gsaat in Englisch,
„But" un „some" noch, meiner Seel!

Die Wadde laude g’schpassich,
Wann mer Deitsch am schwetze sinn.
Doch heert mer so Sach meh un meh:
Deitsch mit viel Englisch drin.

Vun dem sin mir all schuldich!
Ich zehl mich graad debei.
Vum Englisch Wadde lehne
Sinn kenns vun uns ganz frei.

Wann mir net achtsam sinn,
Dann iss des Deitsch glei g’runne
Wie Wasser darich en grosser Sieb,
Un´s Deitsch iss ganz verschwunne!

So wann mir Deitsch dann schwetze,
Lass uns all hatt browiere,
Die alte deitsche Wadde net
Vun unser Schprooch verliere!

Gladys S. Martin
(Ephrata, PA)

Sell schee Gedicht waar gedruckt in 1992 im Bichli „Es Weibsmensch in der Schpiggel".

En Gruss zu alliebber hiwwe wie driwwe
schickt der Michael Werner,
ass hofft, ass die Mudderschprooch net ball
„g’runne iss wie Wasser darich en groosser Sieb".

Beitrag erstellt 06:12 |
Link

15.2.02
Dihr liewe Leit,

mer henn Faasnacht g’hatt letscht Woch in Deitschland - un abbadich im Daal vum Rewwer Rhine. Sell waar verleicht en Wese. En latt Leit sinn rumgeloffe in g’schpassiche Kutte un Wammes, un aa die Kinner henn widder gegliche, ebbes aazuduh, was mer schunscht im Yaahr net aageduh hawwe kann: Sie waare Insche, Cowboys, Hexe un was weess ich net alles. Un in die Schtettel henn sie blendi Parades g'hatt. Ebbes wie sell hot’s awwer net gewwe fer alters. Die Faasnacht waar annerscht g’wesst Yaahre zerick. Sell iss, was der Edward Hermany (1832-1896) g’schriwwe hot baut Faasnacht in Pennsylvania in die 1830s un 1840s:

Faasnacht

Was waar’s doch als en Luscht gewest,
Wann’s g’heesse hot, die Faasnacht kummt;
Mer hot sich g’freet schun wochelang,
Gepiffe, g’sunge un getschumpt;
Die Mammi hot ehm lengscht gedrillt:
„Nau, Buwe, schaffen Oier bei,
Wann’s Faasnacht Kuche gewwe soll,
Do missen latt vun Oier nei."

Noh iss mer naach der Scheier ab,
Uff’s Schtroh un Hoi, uff’s Welschkannlaab,
Un g’sucht, eb’s aryets Oier hett -
Mer waar ganz zu mit G’frees un Schtaab.
Un wammer noh eens g’funne hot,
Was hot mer g’scharrt fer naach em Haus.
„Do, Mammi, iss eens, nemmt’s noch meh? -
„Ya, Buwe, schunscht gebt’s schur nix draus."

Wann als der Daag ball kumme iss,
Noh hot en yeders noch gezarrt,
„Ich wunner, wer die Faasnacht gebt,
Wen’s drefft, der watt ins Seifass g’schparrt."
Mer hot sich awwer als gewehrt,
Un’s waar ehm doch so halwer bang,
Mer waer verleicht der letscht im Bett,
Noh misst mer’s heere wochelang.

Was hot mer g’scharrt fer maryets raus,
So ass mer net die Faasnacht waer;
Der Mammi waar’s mol rufe g’schpaart,
So frieh waar’s Bett schun lang net leer.
Noh hot mer iwwer die gelacht,
Wu nix geduh henn wie gezarrt,
„Do kummt die Faasnacht hinnenoh,
Nau watt sie mol ins Seifass g’schparrt."

Wann’s Breckfescht mol veriwwer waar,
Un all die Arewet aus’em Weg,
Noh hot die Mammi ‘s Backbord grickt,
Un holt en groosser Wambe Deeg,
Un legt en druff un drickt en rum,
Un rollt en in so Scheiwe aus;
Noh hot sie’s Reedel haddich grickt,
Un schneid die schenschte Kuche raus.

Bis alles noh recht gange waar,
Datt hinner’m Offe uff der Kischt,
Waar’s Fett am Koche in der Pann, -
Mer hot sich’s Maul schun abgewischt.
Datt hot sie noh die Kuche nei;
Die sinn datt g’schwumme wie die Gens.
Was henn sie scheene Backe grickt,
Ganz dunkelbrau mit geele Krenz!

Sie waare schee, sie waare guud;
Was hot’s ehm Abbeditt gemacht,
Sie yuscht zu sehne uff’em Disch! -
Der Bauch, der hot ehm recht gelacht.
Uff kors, die Mammi hot’s gewisst,
Wie hungrich, ass so Buwe sinn;
Was hot sie groosse Schissle g’hatt,
Un Kuche, ass wie Hoischteck drin.

‘S maag sei, wie’s will, ‘s iss net, wie’s waar,
Ihr alte Kalls, ihr wisst’s zu guud;
So Dings vergesst sich net so leicht,
So ebbes draagt mer net im Hut.
Ach! Wammer alsemol draa denkt,
Wie’s waar in seine yunge Yaahr,
Mer geebt der beschte Gaul im Schtall
Fer’n Woch wie sellemols, net waahr?

‘S hot noch Faasnachtskichlin in Deitschland heit, un aa noch deel vun die alte Gebreich. Meh lese dezu kammer im Forum vun „hiwwe-wie-driwwe.de".

Eb mer schtoppe, welle mer net vergesse, ebber in die Brunneschtrooss vum Millerschteddel (PA) en Gruuss zu schicke: Der Bischli Gnippli yaehrt sich heit, am 15. Hanning, un so warefe mer unser deitscher Schtrohhut in die Heh yuscht fer saage: Mer winsche en hallicher Gebottsdaag un en guudie Zeit, bis mer uns widder sehne.

Sell schreibt der Michael Werner,
ass froh iss, ass deel B’sucher vun unser Heemetblatt
schun ebbes g’schriwwe henn im Forum.




Beitrag erstellt 05:36 |
Link

2.2.02
Dihr liewe Leit,
ya, heit iss Grundsaudaag. Bei uns in die Pfalz hot der Dax - mer henn kenn Grundsei - sei Schadde g'sehne heit maryie, un dihr wisst, was sell meent!

Dihr misst uns en Post schicke un verzehle, was die Grundsau g'sehne hot in PA un annere Gegende, wu mer noch deitsch am schwetze iss! Dihr misst eich yuscht ei-logge bei "hiwwe-wie-driwwe.de".

Un sell iss, was der John Birmelin g'schriwwe hot iwwer der Grundsaudaag en Weil zerick:



Am zwette Hanning


Zum Wedderbrophet:

Grundsau! Grundsau!
Saag uns mol vum Wedder nau!
Iss der Winder ball verbei,
Odder watt’s noch wieschter sei?

Die Grundsau

Waart emol! Am zwette Hanning
Weis ich dihr mei Wedderlanning:
Ya, des weess ich viele besser
Wie die Dokter un Brofesser!

Deel, die gucke naach die Stanne,
Wolle’s Wedder datte lanne;
Dann sinn annre Weddermenner,
Deide’s Wedder vum Kalenner.

Meene noch, die Gensbrophete
Wunners, was sie wisse deete;
Was sie bralle, was sie boche,
Mit’me dumme Gensegnoche!

Glaabt net yedre alde Fraa!
Ich geh annerschter do draa:
Hawwich net en gudie Naas,
Besser wie en Wedderglaas?

Wann ich aa noch schlaefrich bin,
Hawwich’s awwer doch im Sinn,
Iwwerdem mol uffzuschteh
Un mol aus’em Loch zu geh.

Iss es dann en wennich drieb,
Well, des waer mer graad so lieb;
Schnee un Kelt waer dann verbei,
Friehyaahrswedder hett mer glei.

Un dann fang ich aa zu danze,
Fress mer mol en voller Ranze;
Ya - des macht mich immer lache -
Brauch aa net emol zu schaffe!

Awwer, scheint en bissel Sunn,
Bleibt der Winter, weess ich schun,
Immer noch sex Woche lang;
Un do watt’s mer angscht un bang.

Ei, was hett ich dann zu lewe?
Ya, do kaemt ich wiescht deneewe!
Kalter Wind un Schnee so dief -
Kaemt am End noch uff „Relief!"

Oh, des waer fer mich en Schand!
Grundsau hot doch meh Verschtand,
Losst sich net dehinner finne,
Brauch sich aa net zwee mol b’sinne.

Un im neegschte Aageblick,
Bin ich schun im Loch zurick;
Winter losst mer Winter sei,
Un dann schlof ich widder ei.

JOHN BIRMELIN (1938)



En Gruuss zu alliebber
hiwwe wie driwwe!

Michael Werner

Beitrag erstellt 09:19 |
Link

29.1.02
Dihr liewe Leit,

Alles schafft, un mer sinn nau aa im weltweit Gewebb mit "Hiwwe wie Driwwe", unser pennsylvaanisch-deitsch Zeiding. Iss sell net ebbes? Awwer was wolle mer datt mit unser Heemetblatt?

Mer denke, ass es en Blatz gewwe sett, wu sich die Pennsylvaanisch-Deitsche un Paelzer versammle un minanner in Contact kumme kenne. Unser Address "hiwwe-wie-driwwe.de" sett aa en Blatz sei, wu mer guude G'schichte un Gedichte in die Mudderschprooch hieschicke kann, so ass mit die Zeit ebbes wie en "Online Archive" vun pennsylvaanisch-deitschem Schtofft waxe duht.

Alles, was mer duhne muss, iss sell: En Registration gricke, en Password gricke (un net vergesse) un sich "ei-logge" in unser Heemetblatt. 'S koscht kenn Geld, yuscht en wennich Zeit.

So hoffe mir, ass en latt Leit "hiwwe-wie-driwwe.de" gleiche un uns blendi "Posts" schicke, so ass aa all die annere Pennsylvaanisch-Deitsche un Paelzer, wu sell Gewebb-Wese schunt haendle kenne, en wennich G'schpass henn, wann sie sell lese. Macht mit, so ass die Mudderschprooch net zu nix geht. 'S iss en Weg fer sie uffhalte.

Grooss Dank welle mer saage zu die Melanie Langenhan vun Nieder-Olm. Sie hot uns g'holfe fer "hiwwe-wie-driwwe.de" ans geh gricke. Sie hot aa en Heemetblatt, ass heesst "rheinhessenarchiv.de". Wann ebber am gucke iss fer sei Voreldre, wu vun die Pfalz abg'schtaert sinn naach America im 18. odder 19. Yaahrhunnert, sett sell Gewebb-Address emol uffgucke.

En Gruuss zu alliebber hiwwe wie driwwe
Michael Werner

Beitrag erstellt 21:09 |
Link

28.1.02